সৰ্বভাৰতীয় প্ৰৱেশ পৰীক্ষা (NEET-UG) অনুষ্ঠিত কৰাক লৈ উচ্চতম ন্যায়ালয়ত (Supreme Court) তীব্ৰ সমালোচনাৰ সন্মুখীন হৈছে ৰাষ্ট্ৰীয় পৰীক্ষণ সংস্থা। বিগত প্ৰশ্নকাকত ফাদিলৰ (Paper leak) পৰা এনটিএয়ে (NTA) কোনো শিক্ষা লোৱা নাই বুলি উচ্চতম ন্যায়ালয়ে কয়। এইটো অতি দুৰ্ভাগ্যজনক বুলিও উল্লেখ কৰে। উল্লেখ্য যে সম্প্ৰতি নীট পৰিচালনাৰ দায়িত্বত আছে এনটিএ। কিন্তু শেহতীয়াকৈ প্ৰশ্নকাকত ফাদিল বিতৰ্কৰ পিছত উচ্চতম ন্যায়ালয়ত পৰীক্ষাৰ বাবে দায়বদ্ধ সংস্থাৰ পৰিৱৰ্তনৰ দাবীত গোচৰ ৰুজু কৰা হৈছে। ইয়াৰ পৰিপ্ৰেক্ষিতত আদালতে এনটিএ, কেন্দ্ৰীয় চৰকাৰ আৰু তদন্তকাৰী সংস্থা চিবিআইক চমন কৰিছে।
দুবছৰ পূৰ্বে ২০২৪ চনতো নীট প্ৰশ্নকাকত ফাদিলৰ অভিযোগ উত্থাপন হৈছিল। তেতিয়াও উচ্চতম ন্যায়ালয়ত গোচৰ ৰুজু হৈছিল। সোমবাৰে ন্যায়াধীশ পি এছ নৰসিংহ আৰু ন্যায়াধীশ আলোক আৰাধেৰ বিচাৰপীঠে এনটিএক পুৰণি গোচৰৰ কথা সোঁৱৰাই দিয়ে। উচ্চতম ন্যায়ালয়ৰ মন্তব্য, “তেওঁলোকে (এনটিএ) তেওঁলোকৰ অতীতৰ ভুলৰ পৰা কোনো শিক্ষা লোৱা নাই।
এয়া সঁচাকৈয়ে দুৰ্ভাগ্যজনক। এই বিষয়টো ইয়াৰ আগতেও এবাৰ আদালতলৈ আহিছিল। তেতিয়া এখন কমিটী গঠন হৈছিল। সেই কমিটীয়ে কেইবাটাও পৰামৰ্শ দিছিল, বহুকেইটা পৰামৰ্শ গ্ৰহণ কৰা হৈছিল।” উচচতম ন্যায়ালয়ে জানিবলৈ বিচাৰিছে যে এনটিএয়ে কমিটীয়ে প্ৰস্তাৱ কৰা পৰামৰ্শসমূহ কিমানদূৰ কাৰ্যকৰী কৰিছে। অহা বৃহস্পতিবাৰৰ ভিতৰত এনটিএক শপতনামা দাখিল কৰি বিষয়টো সন্দৰ্ভত নিজৰ স্থিতি প্ৰকাশ কৰিবলৈ কোৱা হৈছে।
প্ৰশ্নকাকত ফাদিল হোৱা আৰু পৰীক্ষা বাতিলৰ বিতৰ্কৰ মাজতে ‘ফেডাৰেচন অব অল ইণ্ডিয়া মেডিকেল এছোচিয়েচন’-এ উচ্চতম ন্যায়ালয়ৰ কাষ চাপিছিল। তেওঁলোকৰ অনুৰোধ আছিল যে এনটিএৰ আন্তঃগাঁথনি সংস্কাৰ কৰা উচিত বা এনটিএক দায়িত্বৰ পৰা আঁতৰাই স্বায়ত্তশাসিত আৰু নিৰ্ভৰযোগ্য সংস্থা এটাৰ হাতত গতাই দিব লাগে। পৰীক্ষা অনুষ্ঠিত কৰাৰ বিষয়টো নতুন সংস্থাৰ হাতত গতাই দিয়াৰ পূর্বে এখন উচ্চ ক্ষমতাসম্পন্ন কমিটী গঠন কৰিবলৈও দাবী উত্থাপন কৰে৷ এই সন্দৰ্ভত গোচৰটো সোমবাৰে উচ্চতম ন্যায়ালয়ৰ দুজন ন্যায়াধীশৰ বিচাৰপীঠত শুনানি গ্ৰহণ কৰে।
