চীন আৰু পাকিস্তানৰ যৌথ বিবৃতিত জম্মু-কাশ্মীৰৰ কথা উল্লেখ কৰাটোক লৈ ভাৰতে তীব্ৰ গৰিহণা দিয়ে (India China Conflict)। এই সন্দৰ্ভত নতুন দিল্লীয়ে পুনৰ নিজৰ স্থিতি প্ৰকাশ কৰিছে। একে সময়তে নৰেন্দ্ৰ মোদী চৰকাৰে আন দেশক জম্মু-কাশ্মীৰ বা লাডাখৰ দৰে কেন্দ্ৰীয়শাসিত অঞ্চল সন্দৰ্ভত মন্তব্যৰ পৰা বিৰত থাকিবলৈ অনুৰোধ জনাইছে।
চীন আৰু পাকিস্তানৰ যৌথ বিবৃতিৰ পাছত ভাৰতৰ বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছৱালে এই বিষয়ত নতুন দিল্লীৰ স্থিতি পুনৰ এবাৰ স্পষ্ট কৰি দি কয়, “ভাৰতৰ স্থিতি সামঞ্জস্যপূৰ্ণ আৰু সংশ্লিষ্ট সকলো পক্ষৰ বাবে সুপৰিচিত। জম্মু-কাশ্মীৰ, লাডাখ এই দুটা কেন্দ্ৰীয়শাসিত অঞ্চল পূৰ্বতেও ভাৰতৰ অবিচ্ছেদ্য অংগ আছিল, বৰ্তমানো আছে আৰু ভৱিষ্যতেও থাকিব।” তেওঁ লগতে কয় যে এই বিষয়ত আন কোনো দেশৰ মন্তব্য কৰাৰ অধিকাৰ নাই।
কেৱল জম্মু-কাশ্মীৰেই নহয়, দুয়োখন দেশৰ মাজত চীন আৰু পাকিস্তানৰ যৌথ বিবৃতিত উল্লেখ কৰা অৰ্থনৈতিক কৰিড’ৰ আৰু সীমা অতিক্ৰম কৰা জলসম্পদৰ সহযোগিতা বিষয়ত ভাৰতে চীন আৰু পাকিস্তানৰ বিৰুদ্ধে মাত মাতিছে।
ৰণধীৰে কয়, “চীন-পাকিস্তান ইকন’মিক কৰিড’ৰৰ কিছুমান প্ৰকল্প ভাৰতৰ ভূখণ্ডত অৱস্থিত। আমি আন দেশৰ এনে পদক্ষেপৰ তীব্ৰ বিৰোধিতা আৰু প্ৰত্যাখ্যান কৰোঁ। এই কথা কেইবাবাৰো পাকিস্তান আৰু চীন কৰ্তৃপক্ষক স্পষ্টভাৱে জনোৱা হৈছে।”
ভাৰতৰ বৈদেশিক পৰিক্ৰমা মন্ত্ৰালয়ৰ বিবৃতিত লগতে কয়, “আমি চীন আৰু পাকিস্তানৰ মাজত তথাকথিত ‘সীমা অতিক্ৰম কৰা জলসম্পদ সহযোগিতা’ৰ উল্লেখ দেখিবলৈ পাইছো। আমি স্পষ্ট কৰিব বিচাৰো যে চীন আৰু পাকিস্তানৰ মাজত কোনো সীমা নাই। সেয়েহে এই তথাকথিত ‘সীমা অতিক্ৰম কৰা জলসম্পদ সহযোগিতা’ৰ প্ৰশ্নটো উত্থাপন নহয়। পাকিস্তান আৰু চীনৰ মাজত ১৯৬৩ চনত স্বাক্ষৰিত সীমান্ত চুক্তিখন ভাৰতে কেতিয়াও স্বীকৃতি নিদিয়ে।”
উল্লেখযোগ্য যে ২৩ মে’ত পাকিস্তানৰ প্ৰধানমন্ত্ৰী শ্বাহবাজ শ্বৰীফে চীন ভ্ৰমণ কৰিছিল। শ্বাহবাজে চীনৰ ৰাষ্ট্ৰপতি ছি জিনপিং আৰু প্ৰধানমন্ত্ৰী লি কেকিয়াঙৰ সৈতে পৃথক পৃথক বৈঠকত মিলিত হয়।
এই ভ্ৰমণৰ অন্তিম দিনটোত ভাৰত আৰু চীনে মঙলবাৰে এক যৌথ বিবৃতি প্ৰকাশ কৰে। সেই বিবৃতিত উল্লেখ কৰা হৈছিল যে জম্মু-কাশ্মীৰৰ শেহতীয়া পৰিস্থিতিৰ বিষয়ে পাকিস্তানে চীনক অৱগত কৰিছে। চীনে কয় যে ৰাষ্ট্ৰসংঘৰ চনদ অনুসৰি এই সমস্যা সমাধান কৰিব লাগে। সেই প্ৰেক্ষাপটত ভাৰতে জম্মু-কাশ্মীৰ সন্দৰ্ভত নিজৰ স্থিতি স্পষ্ট কৰিলে।
