নীট পৰীক্ষাৰ আয়োজন কৰা সংস্থা National Testing Agency (NTA)ৰ অনুৰোধত ভাৰত চৰকাৰে টেলিগ্ৰাম এপটোৰ ওপৰত সাময়িকভাৱে নিষেধাজ্ঞা আৰোপ কৰিছে যাতে প্ৰশ্নকাকত ফাদিল আৰু উৰাবাতৰি ৰোধ কৰিব পৰা যায়।
লগতে ঘোষণা কৰা হৈছে যে ২১ জুনত অনুষ্ঠিত হ’বলগীয়া NEET-UG পুনৰ পৰীক্ষাত স্বচ্ছতা বজাই ৰাখিবলৈ ২২ জুনলৈকে এই প্লেটফৰ্মখন বন্ধ থাকিব।
কিন্তু ‘ইণ্ডিয়া টুডে’ত প্ৰকাশিত এক প্ৰতিবেদনত দাবী কৰা হৈছে যে এই নিষেধাজ্ঞাৰ পিছতো ভাৰতত টেলিগ্ৰাম সক্ৰিয় হৈ আছে। মঙলবাৰে বিয়লি কেন্দ্ৰীয় চৰকাৰে তথ্য প্ৰযুক্তি আইন, ২০০০ৰ ৬৯এ ধাৰা অনুসৰি ‘ইনষ্টেণ্ট মেছেজিং প্লেটফৰ্ম’ টেলিগ্ৰামক ‘নিষিদ্ধ’ ঘোষণা কৰিছিল। কিন্তু নিষেধাজ্ঞাৰ ঘণ্টাৰ পিছতো বেছিভাগ ক্ষেত্ৰতে ই কাম কৰা বুলি খবৰ ওলাইছে ।
এই ঘটনাই টেলিগ্ৰাম ব্লক কৰাৰ ক্ষেত্ৰত ভাৰতৰ কাৰিকৰী ক্ষমতাক লৈ প্ৰশ্ন উত্থাপন কৰিছে। উল্লেখ্য যে ইতিমধ্যে জনা গৈছিল যে চেন্সৰশ্বিপ আৰু নিষেধাজ্ঞাৰ পৰা হাত সাৰিবলৈ এই এপটোত কিছু কাৰিকৰী সুৰক্ষা আছে। বহুতে বিশ্বাস কৰে যে এই ঘটনাই তাৰ ইংগিত দিয়ে।
প্ৰকাশিত প্ৰতিবেদনত দাবী কৰা হৈছে যে এই এপটো ‘গুগল প্লে ষ্ট’ৰ’ৰ পৰা আঁতৰাই দিয়া হৈছে আৰু সম্ভৱতঃ অতি সোনকালে ‘আই অ’ এছ প্লে ষ্ট’ৰৰ পৰাও আঁতৰোৱা হ’ব। কিন্তু ইয়াৰ ফলত বিশেষ পাৰ্থক্য নহ’ব, কিয়নো টেলিগ্ৰাম এতিয়াও সক্ৰিয় আৰু ৱেবত থকা বিভিন্ন এপ ষ্ট’ৰ আৰু এ পি কে ফাইলৰ জৰিয়তে প্ৰৱেশযোগ্য।
মঙলবাৰে কেন্দ্ৰীয় চৰকাৰে টেলিগ্ৰামক ভাৰতীয় ব্যৱহাৰকাৰীৰ বাবে ‘এডিট মেছেজ’ ফিচাৰটো ৩০ জুনলৈকে সম্পূৰ্ণৰূপে নিষ্ক্ৰিয় কৰি ৰাখিবলৈ নিৰ্দেশ দিছিল। কিন্তু ইয়াক কাৰ্যকৰী কৰিব পৰা যাব নে নোৱাৰে সেই লৈ সন্দেহৰ সৃষ্টি হৈছে। মঙলবাৰে নতুন দিল্লীৰ এই সিদ্ধান্তক লৈ টেলিগ্ৰামৰ মুৰব্বী পাভেল ডুৰভে ক্ষোভ প্ৰকাশ কৰি কয়, “ভাৰত চৰকাৰে আমাৰ এপ ব্যৱহাৰ কৰা ১৫ কোটি ভাৰতীয়ক শাস্তি দিছে।”
উল্লেখ্য যে টেলিগ্ৰাম এপটোৰ বিৰুদ্ধে ভুৱা একাউণ্ট খুলি প্ৰশ্নকাকত ফাদিল কৰাৰ অভিযোগ এইটোৱে প্ৰথম নহয়। ইয়াৰ পূৰ্বেও এই এপটো ব্যৱহাৰ কৰি অবৈধভাৱে ধন উলিওৱা আৰু জুৱা নিয়ন্ত্ৰণ কৰাৰ অভিযোগ উত্থাপন কৰা হৈছিল।
সেই অভিযোগৰ ভিত্তিত ২০২৪ চনৰ আগষ্ট মাহত কেন্দ্ৰীয় চৰকাৰে তদন্তৰ নিৰ্দেশ দিছিল। সেই বছৰতে টেলিগ্ৰামৰ মুৰব্বী ডুৰভক লে ব’ৰ্গেট বিমানবন্দৰত অবৈধ বিত্তীয় লেনদেনৰ অভিযোগত গ্ৰেপ্তাৰ কৰা হৈছিল। পিছত ফ্ৰান্সৰ আদালতে তেওঁক জামিনত মুকলি কৰি দিয়ে। এই এপটোৰ ভাৰতত ৫০ লাখতকৈ অধিক ছাবস্ক্ৰাইবাৰ আছে।
জনপ্ৰিয়তাৰ ক্ষেত্ৰত এই মেছেজিং এপটো হোৱাটছএপৰ পিছতে দ্বিতীয় স্থানত আছে। ইয়াৰ কিছুমান বৈশিষ্ট্যৰ বাবে ব্যৱহাৰকাৰীয়ে ইয়াক ভালপায়। ইয়াৰে এটা হ’ল ‘ব্যক্তিগত তথ্য সুৰক্ষা প্ৰযুক্তি’, যি প্ৰযুক্তিয়ে মঙলবাৰে চৰকাৰৰ চাইবাৰ সুৰক্ষা ব্যৱস্থাক প্ৰশ্নৰ সন্মুখীন কৰিছে।
