কল্পনা চাওলা, সুনীতা উইলিয়ামছ, ৰাজা চাৰিৰ পিছত এইবাৰ মহাকাশলৈ ৰাওনা (Heading to space) হৈছে আন এজন ভাৰতীয় মূলৰ আমেৰিকান (Indian origine American) মহাকাশচাৰী অনিল মাধৱন সমোইলেংকো মেনন (Astronaut Anil Madhavan Samoilenko Menon)। মঙলবাৰে তেওঁ কাজাখস্তানৰ বাইকনুৰ কচমোড্ৰমৰ পৰা ৰাছিয়াৰ ছয়ুজ এমএছ-২৯ মহাকাশযানত আন্তৰ্জাতিক মহাকাশ কেন্দ্ৰলৈ ৰাওনা হয়।
আমেৰিকাৰ মহাকাশ সংস্থা নাছাৰ অভিযন্তা তথা চিকিৎসক অনিলে ৰাছিয়াৰ মহাকাশ সংস্থা ৰস্কোচমছৰ ‘এক্সপেডিচন-৭৫’ৰ ক্ৰু মেম্বাৰ আৰু ফ্লাইট ইঞ্জিনিয়াৰ হিচাপে কাম কৰিব। এয়া তেওঁৰ প্ৰথম মহাকাশ যাত্ৰা। এই অভিযানত অনিলৰ সৈতে আছে ৰাছিয়াৰ মহাকাশচাৰী পিয়ট্ৰ ডুব্ৰভ আৰু আন্না কিকিনা।দুয়োৰে বাবে এইটো অৱশ্যে দ্বিতীয় মহাকাশ যাত্ৰা। এই তিনিজন মহাকাশচাৰীয়ে প্ৰায় ৮ মাহ মহাকাশত থাকিব। তাত তেওঁলোকে কেইবাটাও গুৰুত্বপূৰ্ণ গৱেষণামূলক কামৰ লগত জড়িত হ’ব। ভাৰতীয় মূলৰ অনিলৰ জন্ম আমেৰিকাৰ মিনেছ’টাৰ মিনিয়াপলিছত।
তেওঁ ইউক্ৰেইন আৰু ভাৰতৰ প্ৰব্ৰজনকাৰী পিতৃ-মাতৃৰ পুত্ৰ। অনিলে মিনেছ’টাৰ ছেইণ্ট পল একাডেমী আৰু ছামিট স্কুলৰ পৰা প্ৰাথমিক শিক্ষা সমাপ্ত কৰে। ১৯৯৫ চনত তেওঁ স্নাতক ডিগ্ৰী লাভ কৰে। তাৰ পিছত ১৯৯৯ চনত হাৰ্ভাৰ্ড বিশ্ববিদ্যালয়ৰ পৰা স্নায়ু জীৱবিজ্ঞানত স্নাতক ডিগ্ৰী লাভ কৰে। ২০০৪ চনত ষ্টেনফ’ৰ্ড বিশ্ববিদ্যালয়ৰ পৰা মেকানিকেল ইঞ্জিনিয়াৰিঙত স্নাতকোত্তৰ ডিগ্ৰী লাভ কৰে।
তাৰ পিছত তেওঁ ২০০৬ চনত ষ্টেনফ’ৰ্ড মেডিকেল স্কুলৰ পৰা মেডিকেল ডিগ্ৰীও লাভ কৰে। ২০০৯ চনত ষ্টেনফ’ৰ্ডত জৰুৰীকালীন চিকিৎসাৰ ডিগ্ৰী সম্পূৰ্ণ কৰে। ২০১০ চনত তেওঁ ৱাইল্ডাৰ্নেছ মেডিচিনত ফেল’শ্বিপ লাভ কৰে। ৪৮ বছৰীয়া অনিলে দীৰ্ঘদিন ধৰি আমেৰিকাৰ বায়ুসেনাত কাৰ্যনিৰ্বাহ কৰি আহিছে। ২০১৪ চনত তেওঁ নাছাত ফ্লাইট ইঞ্জিনিয়াৰ হিচাপে যোগদান কৰে। অনিলে ছয়ুজ টিএমএ-১৩এম আৰু ছয়ুজ টিএমএ-১৭এমৰ ডেপুটি ক্ৰু চাৰ্জন হিচাপে আৰু ছয়ুজ এমএছ-৬ৰ প্ৰাথমিক ক্ৰু চাৰ্জন হিচাপে কাম কৰি আহিছে। তেওঁৰ ১০০০ ঘণ্টাৰো অধিক বিমান উৰণৰ অভিজ্ঞতা আছে।
