ভাৰতৰ প্ৰথমটো ব্যক্তিগত মহাকাশ ৰকেট ‘বিক্ৰম ১’ অন্ধ্ৰপ্ৰদেশৰ শ্ৰীহৰিকোটা কেন্দ্ৰৰ পৰা মহাকাশলৈ ৰাওনা হৈছে। শনিবাৰে দিনৰ ১২.০৫ বজাত সফলতাৰে উৎক্ষেপণ কৰা হয় ৰকেটটো।
প্ৰধানমন্ত্ৰী নৰেন্দ্ৰ মোদীৰ দুটা শব্দৰ বাৰ্তা থকা কাৰ্ড এখনো বিক্ৰম ১ৰ লগত মহাকাশলৈ প্ৰেৰণ কৰা হয়।
স্কাইৰুট এৰ’স্পেছে নিৰ্মাণ কৰা এই ৰকেটটো মূলতঃ মহাকাশলৈ কৃত্ৰিম উপগ্ৰহ প্ৰেৰণৰ বাবে ব্যৱহাৰ কৰা হ’ব। উপগ্ৰহসমূহক এক নিৰ্দিষ্ট কক্ষপথত স্থাপন কৰিবলৈ বিশেষভাৱে ডিজাইন কৰা হৈছে এই ৰকেট।
ই এক সম্পূৰ্ণ কাৰ্বন কম্পোজিট গঠনেৰে গঠিত। এই ৰকেট তৈয়াৰ কৰিবলৈ ব্যৱহাৰ কৰা সামগ্ৰী ৰকেট গ্ৰেডৰ তীখাতকৈ লঘু আৰু বহুত শক্তিশালী। ফলত নিৰ্মাতাসকলে দাবী কৰে যে ইয়াৰ কাৰ্যক্ষমতা অন্যান্য ৰকেটতকৈ অধিক।
বিক্ৰম ১ৰ লগত প্ৰেৰণ কৰা কাৰ্ডখনত আছে প্ৰধানমন্ত্ৰীৰ বাৰ্তা- বন্দে মাতৰম। ইয়াৰ বাহিৰেও ভাৰতৰ মহাকাশ অভিযানৰ বাবে বিশ্বৰ বিভিন্ন প্ৰান্তৰ পৰা শুভেচ্ছা আহিছে। সেয়াও কাৰ্ডসহ পঠিয়াই দিয়া হৈছে। বিক্ৰম ১ৰ লগত গৈছে বিক্ৰম চাৰাভাই, চি ভি ৰমণ আৰু এ পি জে আব্দুল কালামৰ তিনিটা সৰু সৰু মূৰ্তিও।
এই ৰকেটৰ সহায়ত মহাকাশলৈ প্ৰেৰণ কৰা পেলোডসমূহৰ ভিতৰত এটা হ’ল ‘এম্ব্ৰেচ মিছন’। মহাকাশৰ কক্ষপথ আৰু কাষৰীয়া অঞ্চলবোৰ ধ্বংসাৱশেষৰ পৰা মুক্ত কৰি ৰাখিবলৈ বিজ্ঞানীসকলে ৰব’টিক আৰ্ম প্ৰযুক্তি ব্যৱহাৰ কৰি এক বিশেষ যন্ত্ৰ প্ৰস্তুত কৰিছে।
সেই যন্ত্ৰটো বিক্ৰম ১ৰ সৈতে প্ৰেৰণ কৰা হৈছে। এইদৰে ভাৰতৰ প্ৰথমটো ব্যক্তিগত মহাকাশ ৰকেটৰ সৈতে নতুন যন্ত্ৰটোও পৰীক্ষা কৰা হৈছে। স্কাইৰুট এৰ’স্পেছে এই অভিযানৰ নাম ৰাখিছে ‘মিছন আগমন’।
শ্ৰীহৰিকোটাত আৰম্ভ হৈছিল ৰকেট উৎক্ষেপণৰ অন্তিম ১০ ছেকেণ্ডৰ কাউণ্টডাউন। শেষ হোৱাৰ লগে লগে ই উজ্জ্বল কমলা ৰঙৰ শিখাৰে প্ৰচণ্ড গতিৰে মহাকাশলৈ উৰি যায়। গোটেই অঞ্চলটো ডাঠ বগা ধোঁৱাই আৱৰি ধৰে।
ভাৰতীয় মহাকাশ গৱেষণা সংস্থায়ো এই উৎক্ষেপণৰ ভিডিঅ’ প্ৰকাশ কৰিছে। স্কাইৰুটৰ এই পদক্ষেপৰ জৰিয়তে ব্যক্তিগত মহাকাশ অন্বেষণৰ জগতখনত ভাৰতৰ স্থান আৰু অধিক সুদৃঢ় হৈছে। ইছৰোৱে কয় যে বিক্ৰম ১ৰ জৰিয়তে ভাৰতত বাণিজ্যিক মহাকাশ উৰণৰ যুগ আৰম্ভ হৈছে।
