কাৰ্বি আংলং ক্ৰীড়া সন্থাৰ (Karbi Anglong Sports Association) ৬৮ সংখ্যক প্ৰতিষ্ঠা দিৱস (Foundation Day) শনিবাৰে ডিফু ষ্টেডিয়ামত উদযাপন (Celebration at Diphu Stadium) কৰা হয়। কাছা ইনড’ৰ ষ্টেডিয়ামত অনুষ্ঠিত এই প্ৰতিষ্ঠা দিৱসৰ অনুষ্ঠানত মুখ্য অতিথি হিচাপে কাছাৰ সভাপতি তথা কাৰ্বি আংলং স্বায়ত্তশাসিত পৰিষদৰ মুখ্য কার্যবাহী সদস্য, বিধায়ক ডঃ তুলিৰাম ৰংহাঙে অংশগ্ৰহণ কৰে। উল্লেখ্য যে ১৯৫৮ চনত গঠন হৈছিল কাৰ্বি আংলং ক্ৰীড়া সন্থা।
প্ৰতিষ্ঠা দিৱস উপলক্ষে ক্ৰীড়া সন্থাৰ প্ৰতিষ্ঠাকালৰে পৰা সভাপতি আৰু সাধাৰণ সম্পাদকৰ পদ অলংকৃত কৰাসকলক বিশেষভাৱে সম্বৰ্ধনা জনোৱা হয়। ইয়াৰ লগতে জিলাখনৰ ক্ৰীড়া ক্ষেত্ৰলৈ বিশেষ অৱদান আগবঢ়োৱাৰ লগতে ৰাজ্যিক তথা ৰাষ্ট্ৰীয়-আন্তঃৰাষ্ট্ৰীয় পৰ্যায়ত জিলাখনক প্ৰতিনিধিত্ব কৰা ক্ৰীড়া ব্যক্তিত্বসকলো সম্বৰ্ধনা জনোৱা হয়।
অনুষ্ঠানৰ আৰম্ভণিতে বিধায়ক তুলিৰাম ৰংহাঙে প্ৰতিষ্ঠাকালৰে পৰা বৰ্তমানলৈকে বিভিন্ন ক্ৰীড়া সন্থাৰ বিভিন্ন সময়ৰ ফটো আৰু তথ্য সন্নিবিষ্ট এখন ফটো গেলেৰী উদ্বোধন কৰে। আনহাতে, কাৰ্বি আংলং জিলা ক্ৰীড়া সন্থাৰ সাধাৰণ সম্পাদক ডঃ পংকজ টেৰণৰ সঞ্চালনাত অনুষ্ঠিত হয় প্ৰতিষ্ঠা দিৱসৰ মুকলি সভা। এই সভাত মুখ্য অতিথি হিচাপে অংশগ্ৰহণ কৰি তুলিৰাম ৰংহাঙে কয় যে ১৯৫৮ চনত কাৰ্বি আংলং ক্ৰীড়া সন্থা গঠন হোৱাৰ পিছৰে পৰা সন্থাটোৱে দোপতদোপে উন্নতি কৰি আজিৰ এই পর্যায়ত উপনীত হ’বলৈ সক্ষম হৈছে।
আনহাতে, প্ৰতিষ্ঠাকালৰ পৰা বৰ্তমানলৈকে ক্ৰীড়া সন্থালৈ আগবঢ়োৱা ব্যক্তিসকলৰ অৱদানৰ কথা উল্লেখ কৰি তেওঁ কয়, “২০১২ চনত সভাপতিৰ দায়িত্ব লৈয়েই মই কাৰ্বি আংলঙৰ ক্ৰীড়া খণ্ডক আগুৱাই নিয়াৰ সংকল্প লৈছিলোঁ। আজি ডিফুত ৰাষ্ট্রীয় পৰ্যায়ৰ এখন খেলপথাৰ আছে, য’ত ফুটবল, ভলীবল, বাস্কেটবল, টেনিছ, এথলেটিকছ, মল্লযুঁজ আদি সকলো উন্নত ৰাজ্যিক পৰ্যায়ৰ। ষ্টেডিয়ামত আন্তঃৰাষ্ট্রীয় পৰ্যায়ৰ ছুইমিং পুল নিৰ্মাণ কৰা হৈছে। জিলাখনৰ ল’ৰা-ছোৱালীয়ে ৰাজ্য, দেশ, আনকি আন্তর্জাতিক পর্যায়তো নিজৰ প্ৰতিভা প্ৰদৰ্শন কৰিবলৈ সক্ষম হৈছে।”
লগতে তেওঁ কয় যে এই কাম কেৱল তেওঁৰ বা কাছাৰ দ্বাৰাই কৰাটো সম্ভৱ হোৱা নাই। সকলোৰে সমন্বিত প্ৰচেষ্টাত ই সফল হোৱা বুলি উল্লেখ কৰি এটা দল হিচাপে সকলোকে আগবাঢ়ি আহিবলৈ আহ্বান জনায়। আনহাতে, অহা দুবছৰৰ পাছত কাছা ৭০ বছৰ সম্পূৰ্ণ কৰা উপলক্ষে প্লেটিনাম জয়ন্তী কাৰ্যসূচী বিশেষভাৱে অনুষ্ঠিত কৰাৰ পৰিকল্পনাৰ কথা তুলিৰাম ৰংহাঙে ব্যক্ত কৰে।
