জুবিন গাৰ্গৰ মৃত্যুৰ ঘটনাৰ (Zubeen Garg murder case) তদন্তৰ মাজতে আজি শৰ্মিষ্ঠা ভূঞাৰ আদালতত হাজিৰ হয় পৰীক্ষিত শৰ্মা। জুবিন গাৰ্গৰ সৈতে য়টত উপস্থিত থকা লোকসকলৰ ভিতৰত পৰীক্ষিত শৰ্মাই প্ৰথমজন সাক্ষী হিচাপে আদালতত হাজিৰ হোৱা বুলি জানিব পৰা গৈছে।
তদন্তত প্ৰকাশ পোৱা অনুসৰি, ঘটনাৰ সময়ত য়টত জুবিন গাৰ্গৰ সৈতে উপস্থিত আছিল অভিমন্যু তালুকদাৰ, তন্ময় ফুকন, ৰূপকমল কলিতা, জিঅ’ লাংচাট নাৰ্জাৰী, সিদ্ধাৰ্থ বৰা, সুস্মিতা গোস্বামী, ভাস্কৰজ্যোতি দত্ত, দেবজ্যোতি হাজৰিকা আৰু প্ৰতিম ভূঞা।
ইতিমধ্যে ১০গৰাকী প্ৰবাসী অসমীয়াই SITৰ সন্মুখত সাক্ষ্য প্ৰদান কৰিছে বুলি জানিব পৰা গৈছে। তদন্তৰ অংশ হিচাপে তেওঁলোকৰ বক্তব্য লিপিবদ্ধ কৰা হৈছে।
ইফালে, শীঘ্ৰেই আন ১০গৰাকী প্ৰবাসী অসমীয়াক আদালতত হাজিৰ কৰোৱাৰ সম্ভাৱনা আছে। তেওঁলোকৰ সাক্ষ্যও গোচৰটোৰ তদন্তৰ ক্ষেত্ৰত গুৰুত্বপূৰ্ণ হিচাপে বিবেচিত হৈছে।
আনহাতে, সেইদিনা য়টত উপস্থিত থকা ৱাজিদ আহমেদ ছিংগাপুৰৰ নাগৰিক হোৱাৰ বাবে তেওঁ বৰ্তমান তদন্তৰ আওতালৈ অহা নাই বুলি জানিব পৰা গৈছে।
জুবিন গাৰ্গৰ মৃত্যুৰ ঘটনাৰ সময়ত য়টত প্ৰকৃততে কি ঘটিছিল, সেই বিষয়ে অধিক তথ্য সংগ্ৰহৰ বাবে SITৰ তদন্ত আৰু আদালতীয় প্ৰক্ৰিয়া অব্যাহত আছে।
