ভাৰতীয় মহাকাশ গৱেষণা সংস্থাই (ISRO) প্ৰথমটো ইমেজিং উপগ্ৰহ EOS-05 (GSAT-1A) সফলতাৰে উৎক্ষেপণ কৰে। শুকুৰবাৰে পুৱতিনিশা ২.৫৫ বজাত শ্ৰীহৰিকোটাৰ সতীশ ধৱন মহাকাশ কেন্দ্ৰৰ পৰা GSLV-F17 ৰকেটেৰে মহাকাশলৈ প্ৰেৰণ কৰা হয় এই উপগ্ৰহটো।
শুকুৰবাৰে পুৱা ইছৰোৱে কয় যে জিএছএলভি-এফ১৭ ৰকেটে জিএছএটি-১এক পূৰ্বনিৰ্ধাৰিত ‘ছাব-জিঅ’চিনক্ৰ’নাছ ট্ৰেন্সফাৰ অৰ্বিট’ত সফলতাৰে স্থাপন কৰিছে। ইছৰোৰ সঞ্চালক ভি নাৰায়ণনে কয়, “মই ঘোষণা কৰি অতি সুখী যে জিএছএলভি-এফ১৭ ৰকেটে অত্যাধুনিক পৃথিৱী পৰ্যবেক্ষণ উপগ্ৰহ বা ভাৰতৰ প্ৰথমটো জিঅ’চিনক্ৰ’নাছ-অৰ্বিট ইমেজিং উপগ্ৰহ ইঅ’এছ-০৫ক পূৰ্বনিৰ্ধাৰিত কক্ষপথত সফলতাৰে আৰু সঠিকভাৱে স্থাপন কৰিছে।” জিএছএলভিৰ মিছনৰ সঞ্চালক থমাছ কুৰিয়ানে কয় যে এইটোৱেই হৈছে জিএছএলভিয়ে জিটিঅ’ বা উপ-জিটিঅ’ কক্ষপথলৈ প্ৰেৰণ কৰা আটাইতকৈ গধুৰ উপগ্ৰহ। তেওঁ কয়, “জিএছএলভিৰ ১৯ সংখ্যক অভিযান সফল হৈছে।”
যদিও ইছৰোৰ অস্ত্ৰভাণ্ডাৰত এক ডজনতকৈও অধিক যোগাযোগ উপগ্ৰহ আছে, তথাপিও GSAT-1Aৰ দৰে চোৰাংচোৱা উপগ্ৰহ নিৰ্মাণ কৰা এইটোৱেই প্ৰথম। উৎক্ষেপণৰ পিছত ইঅ’এছ-০৫ক উপ-জিটিঅ’ত স্থান দিয়া হয়। পৰৱৰ্তী কক্ষপথ বিকাশ প্ৰক্ৰিয়াৰ জৰিয়তে ই প্ৰায় ৩৬,০০০ কিলোমিটাৰ উচ্চতাৰ ভূ-স্থিৰ কক্ষপথৰ পৰা (এই কক্ষপথত থকা কৃত্ৰিম উপগ্ৰহবোৰ পৃথিৱীৰ ঘূৰ্ণনৰ সমান বেগেৰে ঘূৰি থাকে, যাৰ বাবে উপগ্ৰহটো আকাশৰ এটা ঠাইত স্থবিৰ হৈ থকা যেন লাগে) ২৪ ঘণ্টাই ভাৰতৰ সীমা আৰু ভূখণ্ডৰ ওপৰত চোৰাংচোৱাগিৰি কৰিবলৈ সক্ষম হ’ব।
পাকিস্তান বা চীন সীমান্তকে ধৰি বিভিন্ন গুৰুত্বপূৰ্ণ অঞ্চলৰ সঘনাই চোৰাংচোৱাগিৰি আৰু পৰ্যবেক্ষণত সহায় কৰিব। তদুপৰি ঘূৰ্ণীবতাহ, বানপানী, ডাৱৰ বিস্ফোৰণ বা বন্য অগ্নিকাণ্ডৰ দৰে প্ৰাকৃতিক দুৰ্যোগৰ সময়ত এই উপগ্ৰহটোৱে ভাৰতৰ যিকোনো নিৰ্দিষ্ট অঞ্চলৰ ছবি মাত্ৰ ৫ মিনিটত আৰু সমগ্ৰ ভাৰতীয় ভূখণ্ডৰ ছবি প্ৰতি ৩০ মিনিটৰ মূৰে মূৰে ইছৰোৰ নিয়ন্ত্ৰণ কক্ষলৈ প্ৰেৰণ কৰিব পাৰিব। এই উপগ্ৰহটো খনিজ অনুসন্ধান আৰু হিমবাহ নিৰীক্ষণৰ বাবেও ব্যৱহাৰ কৰিব পাৰিব।
