কাৰ্বি আংলং স্বায়ত্তশাসিত পৰিষদৰ (Karbi Anglong Autonomous Council) মুখ্য কাৰ্যবাহী সদস্য তুলিৰাম ৰংহাঙৰ (Tuliram Ranghang) বিৰুদ্ধে ক্ষুণ্ণ হৈছে কাৰ্বি পাহাৰৰ ছয়টাকৈ প্ৰাক্তন বিদ্ৰোহী সংগঠন। তেওঁলোকৰ অভিযোগ, কাৰ্বি স্বায়ত্ত পৰিষদৰ চৰকাৰ প্ৰতিশ্ৰুতি ৰক্ষা কৰাত ব্যৰ্থ হৈছে।
উল্লেখ্য যে ২০২১ চনৰ ৪ ছেপ্টেম্বৰত কেন্দ্ৰীয় আৰু ৰাজ্য চৰকাৰে কাৰ্বি আংলং জিলাৰ কেএলএনএলএফ (KLNLF), ইউপিএলএ (UPLA), পিডিচিকে (PDCK) আৰু কেপিএলটিৰ (KPLT) তিনিটা গোটকে ধৰি ছয়টা বিদ্ৰোহী সংগঠনৰ সৈতে শান্তি চুক্তি স্বাক্ষৰ কৰিছিল৷
এই চুক্তিত কাৰ্বি আংলং জিলাৰ বিভিন্ন উন্নয়নমূলক প্ৰকল্পৰ বাবে কেন্দ্ৰীয় আৰু ৰাজ্য চৰকাৰে ১০০০ কোটি টকা দিয়াৰ প্ৰতিশ্ৰুতি দিছিল৷ ইতিমধ্যে চৰকাৰে ইয়াৰে ৫০০ কোটি টকা মোকলাই যদিও সেই ধন খৰচৰ সঠিক হিচাপ নোপোৱাৰ অভিযোগ চুক্তি স্বাক্ষৰকাৰী সংগঠনকেইটাৰ নেতৃবৰ্গৰ৷ শান্তি চুক্তি স্বাক্ষৰৰ ৫ বছৰ হোৱা উপলক্ষে ডিফুত আয়োজিত এক সভাত ইয়াকে লৈ সংগঠনকেইটাৰ নেতৃবৰ্গই ক্ষোভ উজাৰে৷
আনহাতে, সংবাদ মাধ্যমৰ আগত দুই শান্তি চুক্তি স্বাক্ষৰকাৰী নেতা জন বে আৰু বিনোদ তিমুঙে ক্ষোভ প্ৰকাশ কৰি কয় যে শান্তি চুক্তিৰ ৫০০ কোটিৰ পৰিষদে অপব্যৱহাৰ কৰিছে৷ তেওঁলোকৰ অভিযোগ, ডিফু গান্ধী পাৰ্কৰ পৰা অসম বিশ্ববিদ্যালয়ৰ ডিফু চৌহদলৈ ৰাষ্ট্ৰীয় ঘাইপথ প্ৰাধিকৰণৰ অন্তৰ্গত পথটোৰ কোনো আপত্তিবিহীন পত্ৰ নোলোৱাকৈ ৮ কিলোমিটাৰ ফ’ৰলেন পথ নিৰ্মাণ কৰি ১০৫ কোটি টকা খৰচ কৰা হ’ল৷ কিন্তু এই পথটোৰ বাবে এতিয়া ৰাষ্ট্ৰীয় ঘাইপথ প্ৰাধিকৰণৰ তৰফৰ পৰা নিবিদা আহৱান কৰা হৈছে৷ আনহাতে, হামৰেণত ৬৫ কোটি টকাৰে কোনটো পথ নিৰ্মাণ কৰা হ’ল সেয়া তেওঁলোকে নাজানে বুলি কয়৷ বৰ্তমান সমগ্ৰ বিষয়টো মুখ্যমন্ত্ৰীৰ দৃষ্টিগোচৰ কৰা বুলিও তেওঁলোকে কয়৷ উল্লেখ্য যে চুক্তিত স্বাক্ষৰ নকৰিলেও ছংবিজিত ইংতি কাথাৰ আছিল এই ৬টা সংগঠনৰ অন্যতম নেতা৷ কিন্তু শেহতীয়াভাৱে কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে কেন্দ্ৰীয় চৰকাৰে ছংবিজিতৰ লগতহে আলোচনা কৰাত আগ্ৰহী বুলি উল্লেখ কৰাক লৈ ক্ষুণ্ণ হৈ সংগঠনকেইটাই ইয়াৰ প্ৰতিবাদ কৰে৷
উল্লেখ্য যে ২০২১ চনৰ ৪ ছেপ্টেম্বৰত শান্তি চুক্তি স্বাক্ষৰ কৰাৰ পিছতে ৯ অক্টোবৰত সকলো নেতা আৰু কেডাৰে বিজেপি দলত যোগদান কৰে৷ আনহাতে, সংগঠনকেইটাৰ ১৯২৬ গৰাকী প্ৰাক্তন বিদ্ৰোহীক ৰাজনৈতিক সংস্থাপন দিয়াৰ আশ্বাস দিয়া হৈছিল যদিও তেওঁলোকক বাৰে বাৰে প্ৰতাৰণা কৰাৰ অভিযোগ৷ যাৰ বাবে ২০২৭ চনৰ কাৰ্বি আংলং স্বায়ত্তশাসিত পৰিষদৰ নিৰ্বাচনত এই ৬টা সংগঠনৰ পৰা মনোনীত নেতাক বিজেপি দলে দলীয় প্ৰাৰ্থিত্ব প্ৰদান নকৰিলে বিজেপিৰ বিৰুদ্ধে থিয় দিয়াৰ প্ৰস্তাৱ গ্ৰহণ কৰা বুলিও প্ৰাক্তন বিদ্ৰোহী নেতাসকলে ঘোষণা কৰে৷
