উপ-ৰাষ্ট্ৰপতি (Vice President) হিচাপে দায়িত্ব গ্ৰহণৰ পিছত প্ৰথমবাৰৰ বাবে অসমত উপস্থিত চি পি ৰাধাকৃষ্ণন। দুদিনীয়া কাৰ্যসূচীৰে অসম ভ্ৰমণলৈ অহা উপ-ৰাষ্ট্ৰপতিগৰাকীৰ আগমনক কেন্দ্ৰ কৰি গুৱাহাটী মহানগৰীত কটকটীয়া কৰা হৈছে নিৰাপত্তা ব্যৱস্থা।
ভ্ৰমণসূচী অনুসৰি, আজি শ্ৰীমন্ত শংকৰদেৱ কলাক্ষেত্ৰত অনুষ্ঠিত হ’বলগীয়া গীতানগৰ কলেজৰ সোণালী জয়ন্তী বৰ্ষৰ উদ্বোধনী অনুষ্ঠানত মুখ্য অতিথি হিচাপে অংশগ্ৰহণ কৰিব উপ-ৰাষ্ট্ৰপতি ৰাধাকৃষ্ণনে।
ইয়াৰ পিছতে জ্যোতি-বিষ্ণু আন্তঃৰাষ্ট্ৰীয় কলা মন্দিৰত অনুষ্ঠিত হ’বলগীয়া শ্ৰীমন্ত শংকৰদেৱ স্বাস্থ্য বিজ্ঞান বিশ্ববিদ্যালয়ৰ (SSUHS) সমাৱৰ্তন অনুষ্ঠানতো অংশগ্ৰহণ কৰিব তেওঁ।
সন্ধিয়া অসমৰ ৰাজ্যপাল লক্ষ্মণ প্ৰসাদ আচাৰ্যই ৰাজভৱনত আয়োজন কৰা নৈশভোজত অংশ ল’ব উপ-ৰাষ্ট্ৰপতিগৰাকীয়ে।
৭ ছেপ্টেম্বৰত পুৱা ঐতিহাসিক মা কামাখ্যা মন্দিৰ দৰ্শন কৰি পূজা-অৰ্চনা কৰিব চি পি ৰাধাকৃষ্ণনে। ইয়াৰ পিছতে গুৱাহাটী বিশ্ববিদ্যালয়ত অনুষ্ঠিত এক অনুষ্ঠানত অংশ লৈ মুখ্যমন্ত্ৰী ড° হিমন্ত বিশ্ব শৰ্মাই ৰচনা কৰা এখন গ্ৰন্থ উন্মোচন কৰিব।
ইয়াৰ উপৰি অসম চৰকাৰৰ প্ৰায় ১১০ কোটি টকা ব্যয় সাপেক্ষ কেইবাটাও গুৰুত্বপূৰ্ণ প্ৰকল্পৰ আধাৰশিলা স্থাপন কৰিব উপ-ৰাষ্ট্ৰপতিগৰাকীয়ে।
গুৱাহাটীৰ কাৰ্যসূচী সমাপ্ত কৰি তেওঁ উত্তৰ-পূৰ্বাঞ্চলৰ আন তিনিখন ৰাজ্য—মেঘালয়, মণিপুৰ আৰু অৰুণাচল প্ৰদেশলৈ ৰাওনা হ’ব।
উপ-ৰাষ্ট্ৰপতিৰ ভ্ৰমণক কেন্দ্ৰ কৰি গুৱাহাটী মহানগৰীৰ বিভিন্ন স্থানত নিৰাপত্তা আৰু যান-বাহন নিয়ন্ত্ৰণৰ ব্যৱস্থা কটকটীয়া কৰা হৈছে।
