বিৰোধীয়ে আৰম্ভণিৰে পৰাই আপত্তি কৰি থকাৰ মাজতে এইবাৰ মুখ খুলিলে কেন্দ্ৰই। মহাৰাষ্ট্ৰৰ গৰ্বা-দাণ্ডিয়া উৎসৱত মুছলমানক প্ৰৱেশ বন্ধ কৰিবলৈ বিশ্ব হিন্দু পৰিষদে যি দাবী উত্থাপন কৰিছে সেয়া অসাংবিধানিক। বুধবাৰে এই কথা স্পষ্ট কৰি দিলে কেন্দ্ৰীয় সামাজিক ন্যায় ৰাজ্যিক মন্ত্ৰী ৰামদাস আথাৱালেয়ে।
শেহতীয়াকৈ বিশ্ব হিন্দু পৰিষদৰ এই দাবীক লৈ বিভিন্ন পক্ষৰ পৰা বহু সমালোচনাৰ সন্মুখীন হৈছে। বিৰোধী ৰাজনৈতিক দলসমূহে আৰম্ভণিৰে পৰাই কৈ আহিছে যে বিশ্ব হিন্দু পৰিষদৰ দাবী অসাংবিধানিক। মহাৰাষ্ট্ৰ চৰকাৰৰ এটা অংশয়ো এই দাবীক সমৰ্থন কৰিছে। উদাহৰণস্বৰূপে, ৰাজ্যখনৰ বন্দৰ উন্নয়ন মন্ত্ৰী নীতেশ ৰাণে বিশ্ব হিন্দু পৰিষদৰ দাবীক ৰাজহুৱাভাৱে সমৰ্থন জনাইছে। আনহাতে, মুখ্যমন্ত্রী দেৱেন্দ্র ফাড়নবিছৰ পত্নী অমৃতা ফাড়নবিছৰ মতে এই উৎসৱ সকলোৰে৷ তেনে ক্ষেত্ৰত মুছলমান সম্প্ৰদায়ৰ লোকে এই উৎসৱত যোগদান কৰিলে ভুল নহয় বুলি তেওঁৰ মত।
এই বিতৰ্ক আৰু সমালোচনাৰ মাজতে বুধবাৰে ছত্তীশগড়ৰ ৰায়পুৰত কেন্দ্ৰীয় মন্ত্ৰীগৰাকীক এই বিষয়ত প্ৰশ্ন কৰা হয়। বিশ্ব হিন্দু পৰিষদৰ দাবী সন্দৰ্ভত আথাৱালৰ স্পষ্ট বাৰ্তা হ’ল এই স্থিতি শুদ্ধ নহয়। ধৰ্ম বা জাতি নিৰ্বিশেষে প্ৰতিজন ব্যক্তিৰ ইজনে সিজনৰ উৎসৱত যোগদান কৰাৰ অধিকাৰ আছে।
বুধবাৰে দিনজোৰা ভ্ৰমণসূচীৰে চত্তীশগড়লৈ গৈছিল কেন্দ্ৰীয় মন্ত্ৰীগৰাকী। আজি ৰায়পুৰৰ স্বামী বিবেকানন্দ বিমানবন্দৰ চৌহদত সাংবাদিকৰ প্ৰশ্নৰ উত্তৰত তেওঁ কয়, “ভাৰত সংবিধান অনুসৰি চলি থাকে। বাবাচাহেব আম্বেদকাৰে লিখা সংবিধানত সকলো ধৰ্মৰ লোকৰ ন্যায়ৰ কথা কোৱা হৈছে। হিন্দু, মুছলমান, শিখ, খ্ৰীষ্টান, জৈন, বৌদ্ধ, পাৰ্চী আদিকে ধৰি বিভিন্ন ধৰ্মৰ লোকে ভাৰতত বাস কৰে। সংবিধানে সকলো ধৰ্মকে সুৰক্ষা প্ৰদান কৰে।”
বিজেপি নেতৃত্বাধীন এনডিএ চৰকাৰৰ মন্ত্ৰীগৰাকীয়ে কয়, “গৰ্বা উদযাপনত মুছলমানে অংশগ্ৰহণ নকৰিব বুলি কোৱাটো সঠিক নহয়, হিন্দু আৰু মুছলমান উভয়ে দেশৰ বাবে একেলগে কাম কৰিব লাগে।” এই কথা কওঁতে তেওঁ ৰাজস্থানৰ আজমীৰ শ্বৰীফৰ উদাহৰণো উল্লেখ কৰে। মন্ত্ৰীগৰাকীয়ে সোঁৱৰাই দিয়ে যে বহু হিন্দু তীৰ্থযাত্ৰীও তালৈ যায়। আথাৱালে কয়, “ভাৰত এনে এখন দেশ য’ত সকলো ধৰ্মৰ মানুহে ইজনে সিজনৰ উৎসৱত অংশগ্ৰহণ কৰিব লাগে।ইয়াৰ বিৰুদ্ধে যদি কোনো স্থিতি লোৱা হয় তেন্তে আমি ইয়াৰ বিৰোধিতা কৰোঁ। এনে স্থিতি সংবিধানৰ বিৰুদ্ধে।”
উল্লেখ্য যে ১১ অক্টোবৰৰ পৰা আৰম্ভ হ’ব নৱৰাত্ৰি। তাৰ পূৰ্বে বিশ্ব হিন্দু পৰিষদৰ দাবীক লৈ মহাৰাষ্ট্ৰত বিতৰ্কৰ সৃষ্টি হৈছে। তেওঁলোকৰ দাবী, গৰ্বা-দাণ্ডিয়া উৎসৱত মুছলমানক প্ৰৱেশ কৰিবলৈ দিয়া উচিত নহয়। লগতে অনুষ্ঠানৰ আয়োজকলৈ বিশেষ নিৰ্দেশনা প্ৰেৰণ কৰে। তাত কোৱা হৈছিল যে গৰ্বা-দাণ্ডিয়াত যোগদান কৰিব বিচৰা সকলোৰে কপালত তিলক থাকিব লাগিব। লগতে কোৱা হৈছিল যে প্ৰৱেশৰ অনুমতি দিয়াৰ আগতে তেওঁলোকৰ পৰিচয়-পত্ৰ পৰীক্ষা কৰিব লাগে।
