অসম চৰকাৰে প্ৰয়াত সংগীত শিল্পী ভূপেন হাজৰিকাৰ কলকাতাস্থিত স্মৰণীয় ঘৰখন সংৰক্ষণৰ উদ্যোগ লৈছে। মুখ্যমন্ত্ৰী হিমন্ত বিশ্ব শৰ্মাই বৰ্তমানৰ মালিকৰ পৰা ঘৰটো ক্ৰয় কৰিবলৈ প্ৰস্তাৱ আগবঢ়াইছে। এই সন্দৰ্ভত মুখ্যমন্ত্ৰী শুভেন্দু অধিকাৰীলৈ তেওঁ এখন পত্ৰও প্ৰেৰণ কৰিছে।
মঙলবাৰে এক্স পোষ্টত এই পত্ৰখন প্ৰকাশ কৰি মুখ্যমন্ত্ৰীয়ে লিখিছে, “ভূপেনদাৰ জীৱনত কলকাতাই এক অতি গুৰুত্বপূৰ্ণ স্থান দখল কৰিছিল। টালিগঞ্জৰ সেই ঘৰটো তেওঁৰ বহু কালজয়ী সৃষ্টিৰ সাক্ষী। আমি সেই ঐতিহ্যক আগন্তুক প্ৰজন্মৰ বাবে সংৰক্ষণ কৰিব বিচাৰো। ভূপেনদাৰ শতবাৰ্ষিকী উদযাপনৰ সময়ত অসমৰ গৌৰৱময় ঐতিহ্য সংৰক্ষণৰ প্ৰচেষ্টাক ফলপ্ৰসূ কৰি তুলিবলৈ পশ্চিমবংগৰ সন্মানীয় মুখ্যমন্ত্ৰী মুখ্যমন্ত্ৰী শুভেন্দুজীলৈ এখন পত্ৰ লিখিছো।”
উল্লেখ্য যে ভূপেন হাজৰিকাই ১৯৫০ চনৰ আৰম্ভণিতে অসমৰ পৰা কলকাতালৈ যোৱাৰ পিছৰে পৰা টালিগঞ্জৰ ৭৭বি গলফ ক্লাব ৰোডত থকা তিনিমহলীয়া ঘৰটোত বহুদিন ভাড়াতীয়া হৈ আছিল। ১৯৮১ চনত তেওঁ এই ঘৰটো কিনিছিল। তাতেই তেওঁ বহু কালজয়ী গীত আৰু সুৰ ৰচনা কৰিছিল। জন্ম শতবাৰ্ষিকী উপলক্ষে অসমে পশ্চিমবংগৰ সংশ্লিষ্ট কৰ্তৃপক্ষৰ সৈতে যোগাযোগ কৰি ঘৰটো ঐতিহ্য সম্পত্তি হিচাপে সংৰক্ষণৰ আইনী আৰু প্ৰশাসনিক পদ্ধতি সম্পূৰ্ণ কৰে। ইতিমধ্যে অসম চৰকাৰৰ এটা প্ৰতিনিধি দলে কলকাতাৰ সেই ঘৰটো পৰিদৰ্শন কৰিছে।
