বেংগালুৰুত পুৰণি আৰু ম্যাদ উকলি যোৱা খাদ্য নতুন পেকেজিঙত বিক্ৰী কৰাৰ অভিযোগ উত্থাপন হৈছে। খাদ্য সুৰক্ষাৰ নিয়ম মানি চলিছেনে নাই সেয়া পৰীক্ষা কৰিবলৈ কৰ্ণাটক খাদ্য আৰু ঔষধ প্ৰশাসনে এসপ্তাহজোৰা এক অভিযান চলায়। এই সপ্তাহজোৰা অভিযানত তেওঁলোকে আমাজন আৰু ইনষ্টামাৰ্টৰ গুদামকে ধৰি বিভিন্ন স্থানৰ পৰা নতুন ভুৱা লেবেল লগোৱা ম্যাদ উকলি যোৱা খাদ্য সামগ্ৰী উদ্ধাৰ কৰিছে। তদুপৰি এই কামৰ লগত জড়িত এটা চক্ৰও ধৰা পৰিছে। এই অভিযানত প্ৰায় ৩ কোটি টকাৰ খাদ্য সামগ্ৰী জব্দ কৰা হৈছে।
মঙলবাৰে কৰ্ণাটকৰ স্বাস্থ্যমন্ত্ৰী ইউ টি কোৱাডাৰে কয় যে নিয়ম মানি নচলাৰ বাবে বেংগালুৰুত এটা ‘পেপটাইড পাৰ্টি’ বাতিল কৰা হৈছিল। ইয়াতেই গেংটো পোৱা গৈছিল। তেওঁ কয়, “আমি বিভিন্ন তথ্যৰ পৰা জানিব পাৰো যে তেওঁলোকে এই সামগ্ৰীসমূহ ক’ৰ পৰা ক্ৰয় কৰিছিল। আমি এইটোও জানো যে তেওঁলোকে আমাজনৰ এটা ডাৰ্ক ষ্টোৰৰ পৰা আনিছিল।”
দেৱনাহল্লীৰ ‘বিএলআৰ৬’ নামৰ আমাজনৰ গুদামত কেএছএফডিএৰ বিষয়াসকলে অভিযান চলায়। ১৪ লাখ টকাৰ ভুৱা লেবেল থকা খাদ্য সামগ্ৰী, ১০ লাখ টকাৰ ম্যাদ উকলি যোৱা খাদ্য সামগ্ৰী আৰু ২.৪৫ লাখ টকাৰ অনুজ্ঞাপত্ৰ অবিহনে মজুত কৰা ঔষধ জব্দ কৰে। তদুপৰি মাডিৱালাৰ ‘বিএলআৰ৭’ নামৰ আমাজনৰ এটা গুদামত তালাচী চলোৱাৰ লগতে ১৯ লাখ টকাৰ ভুৱা লেবেল থকা খাদ্য সামগ্ৰী আৰু ১৩ লাখ টকাৰ ম্যাদ উকলি যোৱা সামগ্ৰী জব্দ কৰা হয়। ইয়াৰ উপৰি ১.৫৭ লাখ টকাৰ অনুজ্ঞাপত্ৰবিহীন ঔষধো উদ্ধাৰ কৰা হৈছে।
স্বাস্থ্যমন্ত্ৰীগৰাকীয়ে কয়, “লিংগৰাজাপুৰমৰ এটা চেডৰ পৰা ‘লিঅ’ ৭ এণ্টাৰপ্ৰাইজেছ’ নামৰ এজেন্সী এটা চলি আছিল। আমি তাত ম্যাদ উকলি যোৱা খাদ্য সামগ্ৰী পাইছিলোঁ, যাৰ মূল্য প্ৰায় ৫.৭ লাখ টকা।” অভিযানৰ অন্তত চেণ্টাৰটো বন্ধ কৰি দিয়া হৈছে বুলিও তেওঁ জানিবলৈ দিয়ে।
হোস্কোটেৰ এটা ইনষ্টামাৰ্ট চেণ্টাৰো বন্ধ কৰি দিছে বিষয়াসকলে। তাৰ পৰা এতিয়ালৈকে প্ৰায় ৪২ লাখ টকাৰ ম্যাদ উকলি যোৱা খাদ্য সামগ্ৰী জব্দ কৰা হৈছে। কেএছএফডিএয়ে কয় যে চেণ্টাৰটোত এতিয়াও তদন্ত চলি আছে আৰু তাত পোৱা ভুৱা লেবেলযুক্ত আৰু ম্যাদ উকলি যোৱা সামগ্ৰীৰ মুঠ মূল্য প্ৰায় এক কোটি টকা হ’ব পাৰে। অভিযোগৰ ভিত্তিত এইচবিআৰ লেআউটত থকা ‘সপ্ত বজাৰ’ নামৰ এখন দোকানত বিষয়াসকলে অভিযান চলায়। তাৰ পৰা ম্যাদ উকলি যোৱা কাজু বিস্কুট, ৰাগি আটা, চিকেন পেটি, পনীৰ, কুকিজ, বাদাম, কণী আৰু আটা জব্দ কৰা হয়। ইয়াৰ মূল্য প্ৰায় ১০ হাজাৰ টকাৰ।
স্বাস্থ্যমন্ত্ৰীগৰাকীয়ে লগতে কয়, “আমি আইন বিভাগ আৰু কেন্দ্ৰীয় চৰকাৰলৈ লিখিছোঁ যাতে এনে কাৰ্যক ফৌজদাৰী অপৰাধ হিচাপে গণ্য কৰা হয়।” তেওঁ অভিযোগ কৰে, “বৰ্তমান এই প্ৰতিষ্ঠানসমূহৰ মালিকসকলে কেৱল জৰিমনা দিয়েই ৰক্ষা পৰে। কিন্তু এয়া অপৰাধমূলক কাণ্ড। এই সন্দৰ্ভত আমি আইন প্ৰণয়ন কৰিম। আৰু সাধাৰণ ৰাইজক আৰু অধিক অভিযোগ দাখিল কৰিবলৈ অনুৰোধ জনাইছোঁ যাতে এনেধৰণৰ নিয়ম উলংঘা ৰোধ কৰিব পৰা যায়।”
