চিৰাঙৰ আমগুৰী থানাৰ অন্তৰ্গত তুলসীঝোৰাত মঙলবাৰে নিশা সংঘটিত একাধিক পথ দুৰ্ঘটনাক কেন্দ্ৰ কৰি তীব্ৰ উত্তেজনাৰ সৃষ্টি হয়। আমগুৰী থানাৰ উপ-পৰিদৰ্শক ৰিতুমণি বৰাই সুৰামত্ত অৱস্থাত গাড়ী চলাই দুখন ই-ৰিক্সা আৰু এখন মটৰচাইকেলত খুন্দিওৱাৰ অভিযোগ উত্থাপিত হৈছে।
স্থানীয় লোকৰ অভিযোগ অনুসৰি, নিয়ন্ত্ৰণহীন গাড়ীখনে প্ৰায় পাঁচ কিলোমিটাৰ পথত এখনৰ পাছত আনখন বাহনত খুন্দিয়াই আতংকময় পৰিস্থিতিৰ সৃষ্টি কৰে। দুৰ্ঘটনাত এগৰাকী মহিলা আৰু এটি শিশুসহ মুঠ পাঁচজন লোক গুৰুতৰভাৱে আহত হয়।
পাছত স্থানীয় ৰাইজে গাড়ীখন খেদি গৈ ৰিতুমণি বৰাক কৰায়ত্ত কৰে। উত্তেজিত একাংশ লোকে আৰক্ষী বিষয়াজনক প্ৰহাৰ কৰাৰো অভিযোগ উঠিছে।
আমগুৰী থানাৰ ভাৰপ্ৰাপ্ত বিষয়া ৰহিম বৰীয়ে ঘটনাস্থলীত উপস্থিত হৈ উপ-পৰিদৰ্শকজনক ৰাইজৰ মাজৰ পৰা উদ্ধাৰ কৰে। সেই সময়ত তেওঁ স্থানীয় লোকৰ সৈতে দুৰ্ব্যৱহাৰ কৰাৰ অভিযোগো উত্থাপন হৈছে।
ঘটনাস্থলীত চিৰাঙৰ জ্যেষ্ঠ আৰক্ষী অধীক্ষক উপস্থিত হৈ ৰাইজৰ সৈতে মতবিনিময় কৰে। অভিযোগৰ তদন্ত কৰি দোষী আৰক্ষী বিষয়াৰ বিৰুদ্ধে উপযুক্ত ব্যৱস্থা গ্ৰহণ কৰা হ’ব বুলি তেওঁ আশ্বাস দিয়ে।
উপ-পৰিদৰ্শকজন সঁচাকৈয়ে সুৰামত্ত অৱস্থাত আছিল নে নাই, সেয়া চিকিৎসা পৰীক্ষা আৰু আৰক্ষীৰ তদন্ততহে নিশ্চিত হ’ব। ঘটনাটো সন্দৰ্ভত আৰক্ষীৰ আনুষ্ঠানিক বক্তব্যৰ অপেক্ষা কৰা হৈছে।
