মহানগৰীৰ ৰিয়া তালুকদাৰ গোস্বামী হত্যাকাণ্ডৰ তদন্ত আগবঢ়াৰ লগে লগে পোহৰলৈ আহিছে অধিক শিহৰণকাৰী তথ্য। পত্নীক হত্যা কৰাৰ পাছতো অভিযুক্ত ৰামানুজ গোস্বামীয়ে স্বাভাৱিকভাৱে চলাফুৰা কৰি দুবাৰকৈ সুৰা কিনিবলৈ ওলাই যোৱাৰ দৃশ্য চিচিটিভি কেমেৰাত বন্দী হৈছে।
চিচিটিভি দৃশ্য অনুসৰি, হত্যাকাণ্ডৰ পাছত ৰামানুজে প্ৰথমবাৰ ৰিয়াৰ স্কুটী লৈ ঘৰৰ পৰা ওলাই গৈছিল। কিছু সময়ৰ পাছত এটা ক’লা পলিথিনৰ মোনা লৈ তেওঁ পুনৰ ফ্লেটত প্ৰৱেশ কৰা দেখা যায়। আৰক্ষীয়ে ৰিয়াৰ ছিন্ন মুণ্ড ক’লা পলিথিনেৰে মেৰিয়াই ফ্ৰিজৰ ভিতৰত উদ্ধাৰ কৰিছিল। অৱশ্যে চিচিটিভিত দেখা মোনাটো আৰু ফ্ৰিজৰ পৰা উদ্ধাৰ কৰা মোনাটো একেটাই আছিল নে নাই, সেয়া আৰক্ষীৰ তদন্ত তথা ফৰেনছিক পৰীক্ষাতহে নিশ্চিত হ’ব।
ইয়াৰ পাছত নিশা ৰামানুজে পুনৰ সুৰা কিনিবলৈ ওলাই যায়। এইবাৰ তেওঁ স্কুটীৰ পৰিৱৰ্তে নিজৰ বাণিজ্যিক বাহনখন লৈছিল। নিচাগ্ৰস্ত যেন লগা ৰামানুজে বাহনখনৰ দুৱাৰ খুলিবলৈও বহু সময় লোৱাৰ দৃশ্য চিচিটিভিত বন্দী হৈছে।
তদন্তকাৰী সূত্ৰৰ মতে, পত্নীৰ নিথৰ দেহ ফ্লেটৰ মজিয়াত পৰি থকাৰ সময়তে ৰামানুজে সুৰাপান কৰাৰ লগতে ভাত ৰান্ধি খাইছিল বুলিও সন্দেহ কৰা হৈছে। মৃতদেহৰ পৰা দুৰ্গন্ধ ওলোৱাৰ পাছত ঘটনাটো পোহৰলৈ আহে। পৰৱৰ্তী সময়ত ৰামানুজে হাতীগাঁও আৰক্ষীৰ ওচৰত আত্মসমৰ্পণ কৰে।
বুধবাৰে আৰক্ষীয়ে ৰামানুজক লৈ বশিষ্ঠপুৰৰ অঞ্জলি গৃহ এপাৰ্টমেণ্টত ঘটনাস্থল পুনৰ্নিৰ্মাণ কৰে। দণ্ডাধীশৰ উপস্থিতিত সমগ্ৰ প্ৰক্ৰিয়াটোৰ ভিডিঅ’ ৰেকৰ্ডিং কৰা হয়।
ঘটনাস্থলীৰ পৰা ৰিয়াৰ ছিন্ন মুণ্ড ৰখা ফ্ৰিজটো, হত্যাকাণ্ডত ব্যৱহাৰ কৰা বুলি সন্দেহ কৰা চোকা অস্ত্ৰ, ঘটনাৰ সময়ত অভিযুক্তই পৰিধান কৰা কাপোৰ আৰু অন্যান্য সামগ্ৰী আৰক্ষীয়ে জব্দ কৰিছে। দুটা ম’বাইল ফোনো ফৰেনছিক পৰীক্ষাৰ বাবে প্ৰেৰণ কৰা হৈছে।
ইপিনে, দুদিন পূৰ্বে সংবাদ মাধ্যমৰ সন্মুখত কোনো অনুশোচনা নাই বুলি দাবী কৰা ৰামানুজে বৃহস্পতিবাৰে সুৰ সলনি কৰি কয়—“বেয়া কাম কৰিছোঁ, আনে নকৰিব।” ইয়াৰ পাছতেই তেওঁ “জয় শ্ৰীৰাম” ধ্বনি দিয়ে। অভিযুক্তৰ এই পৰস্পৰবিৰোধী আচৰণে পুনৰ প্ৰতিক্ৰিয়াৰ সৃষ্টি কৰিছে।
ইয়াৰ পূৰ্বে ৰামানুজে ৰিয়াৰ সৈতে সম্পৰ্ক থকা বুলি সন্দেহ কৰা এজন ব্যক্তিক হত্যা কৰাৰ ভাবুকিও দিছিল। আৰক্ষীয়ে অভিযুক্তই উল্লেখ কৰা ব্যক্তিজনৰ পৰিচয় আৰু অভিযোগৰ সত্যতা সন্দৰ্ভত তথ্য সংগ্ৰহ কৰি আছে। প্ৰয়োজন হ’লে তেওঁক সোধ-পোছৰ বাবে তলব কৰা হ’ব পাৰে।
অৱশ্যে ৰিয়াৰ সৈতে সংশ্লিষ্ট ব্যক্তিজনৰ কোনো সম্পৰ্ক থকা বুলি উত্থাপিত দাবী এতিয়াও আৰক্ষীৰ তদন্তত প্ৰমাণিত হোৱা নাই। হত্যাকাণ্ডৰ আঁৰৰ প্ৰকৃত উদ্দেশ্য, অভিযুক্তৰ নিচাসক্তিৰ সম্ভাব্য ভূমিকা আৰু হত্যাৰ আগ-পিছৰ সম্পূৰ্ণ ঘটনাক্ৰম উদ্ঘাটনৰ বাবে হাতীগাঁও আৰক্ষীৰ তদন্ত অব্যাহত আছে।
