ব্ৰিকছ শীৰ্ষ সন্মিলনত অংশগ্ৰহণ কৰিবলৈ প্ৰায় সাত বছৰৰ মূৰত ভাৰতলৈ আহি আছে চীনৰ ৰাষ্ট্ৰপতি ছি জিনপিং। শনিবাৰৰ পৰা নতুন দিল্লীত আৰম্ভ হ’ব দুদিনীয়া ব্ৰিকছ সন্মিলন। একাধিক সংবাদ মাধ্যমৰ বাতৰি অনুসৰি, শীৰ্ষ সন্মিলনৰ প্ৰথমদিনাই প্ৰধানমন্ত্ৰী নৰেন্দ্ৰ মোদী আৰু জিনপিঙৰ দ্বিপাক্ষিক বৈঠক অনুষ্ঠিত হ’ব পাৰে। যদিও বিষয়টো প্ৰায় চূড়ান্ত হৈছে, তথাপিও এই সন্দৰ্ভত এতিয়ালৈকে কোনো কথা আনুষ্ঠানিকভাৱে ঘোষণা কৰা হোৱা নাই।
জিনপিঙে শেষবাৰৰ বাবে ভাৰত ভ্ৰমণ কৰিছিল ২০১৯ চনৰ অক্টোবৰ মাহত। উল্লেখ্য যে পিছৰ বছৰত পূব লাডাখৰ গালৱান উপত্যকাত প্ৰকৃত নিয়ন্ত্ৰণ ৰেখা (LAC) উলংঘা কৰা চীনা সেনাৰ সৈতে ভাৰতীয় সেনাৰ সংঘৰ্ষ হয়। সেই ৰক্তাক্ত সংঘাতত এজন কৰ্ণেলকে ধৰি ২০ জন ভাৰতীয় সৈনিক নিহত হৈছিল। চীনে আনুষ্ঠানিকভাৱে স্বীকাৰ কৰে যে তেওঁলোকৰ চাৰিজন জোৱানৰ মৃত্যু হৈছে। অৱশ্যে গালৱানত কমেও ৩৮ জন চীনা জোৱান নিহত হোৱা বুলি বিভিন্ন সূত্ৰই দাবী কৰিছে। সেই সংঘৰ্ষৰ পিছৰে পৰা ভাৰত আৰু চীনৰ সম্পৰ্কৰ দ্ৰুতগতিত অৱনতি ঘটিছে। ‘অপাৰেচন সিন্দুৰ’ আৰু তাৰ পাছৰ ভাৰত-পাকিস্তান সংঘাতত চীনে মুকলিকৈ পাকিস্তানৰ কাষত থিয় দিছিল।
২০২৪ চনত গালৱান সংঘৰ্ষৰ পিছত ৰাছিয়াৰ কাজানত মোদী আৰু জিনপিঙৰ সাক্ষাৎ হৈছিল। ইয়াৰ পিছত দুয়োখন দেশৰ সম্পৰ্ক কিছু ভাল হোৱাৰ লক্ষণ দেখা গ’ল। ২০২৫ চনৰ ৩১ আগষ্টত প্ৰধানমন্ত্ৰী মোদীয়ে দুদিনীয়া ভ্ৰমণত চীনলৈ গৈছিল। সেই সময়ত তেওঁ টিয়ানজিনত অনুষ্ঠিত হোৱা চাংহাই সহযোগিতা সংস্থাৰ শীৰ্ষ সন্মিলনত অংশগ্ৰহণ কৰিছিল আৰু জিনপিঙৰ সৈতে পাৰ্শ্বীয় বৈঠক অনুষ্ঠিত কৰিছিল। যদিও আগষ্টৰ শেষৰ ফালে কিৰ্গিস্তানৰ ৰাজধানী বিচকেকত অনুষ্ঠিত এছচিঅ’ৰ বৈঠকত দুয়োজনেই উপস্থিত আছিল যদিও মোদী আৰু জিনপিঙৰ মাজত দ্বিপাক্ষিক বৈঠক হোৱা নাছিল। সংবাদ সংস্থা ৰয়টাৰে প্ৰকাশ কৰা অনুসৰি, প্ৰায় সাত বছৰৰ মূৰত চীনৰ ৰাষ্ট্ৰপতিগৰাকীৰ ভাৰত ভ্ৰমণ নতুন দিল্লী-বেইজিঙৰ কূটনৈতিক সম্পৰ্কত ‘বৰফ গলা’ৰ সূচনা হ’ব পাৰে। ব্ৰিকছ সন্মিলনত অংশগ্ৰহণৰ বাবে শনিবাৰে ভাৰতত উপস্থিত হোৱাৰ কথা আছে জিনপিং। তেওঁ প্ৰায় ৪০০ জনীয়া প্ৰতিনিধি দল লৈ আহিব। ইতিমধ্যে জনা গৈছে যে ব্ৰিকছ শীৰ্ষ সন্মিলন আৰম্ভ হোৱাৰ এদিন পূৰ্বে শুকুৰবাৰে নতুন দিল্লীত প্ৰধানমন্ত্ৰী নৰেন্দ্ৰ মোদী আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনে দ্বিপাক্ষিক বৈঠকত মিলিত হ’ব। ক্ৰেমলিনৰ মুখপাত্ৰ দিমিত্ৰী পেস্কোভে মঙলবাৰে কয়, “দুয়োজন নেতাই পাৰমাণৱিক সহযোগিতা, প্ৰস্তাৱিত ‘ছুখয় ছু-৫৭’ আৰু ৰাছিয়াৰ খাৰুৱা তেলৰ ওপৰত আমেৰিকাৰ শুল্ক আৰু নিষেধাজ্ঞাৰ দৰে বিষয়ত আলোচনা কৰিব পাৰে।”
অহা ১২-১৩ ছেপ্টেম্বৰত দিল্লীৰ ভাৰত মণ্ডপমত অনুষ্ঠিত হ’ব ১৮ সংখ্যক ব্ৰিকছ সন্মিলন। ২০১২, ২০১৬ আৰু ২০২১ চনৰ পিছত ভাৰতে চতুৰ্থবাৰৰ বাবে ব্ৰিকছৰ আতিথ্য আৰু অধ্যক্ষতা কৰিব। সামগ্ৰিকভাৱে এইবাৰ ব্ৰিকছৰ মূল বিষয়বস্তু হৈছে উদ্ভাৱন, সহযোগিতা আৰু বৰ্ধিত স্থিতিশীলতা। কিন্তু শীৰ্ষ সন্মিলনৰ আঁৰত জিনপিঙে প্ৰধানমন্ত্ৰী নৰেন্দ্ৰ মোদীৰ সৈতে বিভিন্ন দ্বিপাক্ষিক বিষয়ত আলোচনা কৰিব পাৰে বুলি বৈদেশিক পৰিক্ৰমা মন্ত্ৰালয়ৰ এক সূত্ৰই প্ৰকাশ কৰিছে। ৰয়টাৰৰ বাতৰি অনুসৰি, নতুন দিল্লীত থকা চীনৰ দূতাবাসৰ বিষয়াসকল এতিয়া হোটেল আৰু নিৰাপত্তাৰ প্ৰট’কল চূড়ান্ত কৰাত ব্যস্ত।
