বেদখলীকৃত ভূমি ঘূৰাই পালে প্ৰধানমন্ত্ৰী নৰেন্দ্ৰ মোদীৰ শৈশৱৰ বন্ধু আছগৰ আলী বোহৰাই। মোদীক সাক্ষাৎ কৰাৰ পিছত অৱশেষত বিষয়টো সমাধান হ’ল। উল্লেখযোগ্য যে বিজেপি বিধায়ক নৰেন্দ্ৰ মেহতাৰ নিৰ্মাণ কোম্পানীটোৰ বিৰুদ্ধে বোহৰাৰ মাটি বেদখল কৰাৰ অভিযোগ উত্থাপন হৈছিল। কিছুদিন পূৰ্বে মুম্বাইৰ মীৰা ৰোডৰ বাসিন্দা বোহৰাই সেই অভিযোগ সন্দৰ্ভত মোদীক সাক্ষাৎ কৰিছিল। ইয়াৰ পিছত প্ৰধানমন্ত্ৰীয়ে নিজেই উদ্যোগ লয় নিজৰ শৈশৱৰ বন্ধুক সেই মাটি ঘূৰাই দিবলৈ।
মঙলবাৰে অভিযুক্ত বিজেপি বিধায়ক মেহতাই কয় যে তেওঁ সেই মাটিখিনি বোহৰালৈ ঘূৰাই দিছে। কেৱল সেয়াই নহয়, বোহৰাৰ বিৰুদ্ধে থকা অভিযোগো প্ৰত্যাহাৰ কৰা বুলি দাবী কৰে মেহতাই। উল্লেখ্য যে মোদীক সাক্ষাৎ কৰাৰ পাছত প্ৰশাসনে দ্ৰুত পদক্ষেপ গ্ৰহণ কৰি সেই মাটিখিনি বোহৰালৈ ঘূৰাই দিয়ে। মঙলবাৰে মহাৰাষ্ট্ৰৰ কেবিনেটত এখন বৈঠক আহ্বান কৰা হয়। তাত উপস্থিত থাকে মুখ্যমন্ত্ৰীৰ প্ৰধান সচিব শ্ৰীকৰ পাৰ্দেশী, অভিযোগকাৰী আছগৰ আলী বোহৰা, অভিযুক্ত বিধায়ক নৰেন্দ্ৰ মেহতা আৰু মিৰ-ভয়ান্দৰ পৌৰ আয়ুক্ত বিনোদ শৰ্মা, নগৰ পৰিকল্পনাকাৰী পুৰুষোত্তম শিণ্ডে।
সূত্ৰ অনুসৰি, তেওঁলোকৰ উপস্থিতিত বিধায়ক মেহতাই নগৰ উন্নয়ন বিভাগক এখন পত্ৰ প্ৰদান কৰে। ইয়াৰ সমান্তৰালকৈ তেওঁ বিবাদিত ভূমি ত্যাগ কৰিছে বুলিও কয়। অৱশ্যে মেহতাই ২০১৯ চনত মাৰ্ভিন ফাৰ্নাণ্ডেজ নামৰ এজন ব্যক্তিৰ পৰা মাটি ক্ৰয় কৰা বুলিও দাবী কৰে। আৰক্ষী আয়ুক্তলৈ লিখা এখন সুকীয়া পত্ৰত মেহতাই বোহৰাৰ বিৰুদ্ধে উত্থাপিত অভিযোগ প্ৰত্যাহাৰ কৰা বুলি উল্লেখ কৰে। দুয় পক্ষই আপোচত উপনীত হৈছে।
ভূমি অধিগ্ৰহণৰ বিষয় সন্দৰ্ভত যোৱা ৮ ছেপ্টেম্বৰত বোহৰাই প্ৰধানমন্ত্ৰীক সাক্ষাৎ কৰে। তেওঁ কয় যে পূব ভয়ান্দৰ অঞ্চলৰ এটুকুৰা মাটি সন্দৰ্ভত এটা দশক পুৰণি গোচৰ একেবাৰেই সমাধান হোৱা নাই। এই সন্দৰ্ভত কেন্দ্ৰীয় তদন্তকাৰী সংস্থাৰ হস্তক্ষেপ বিচাৰি মোদীৰ কাষ চাপিছিল। বোহৰাই দাবী কৰে যে সকলো আইনী বুজাবুজিৰ অন্তত তেওঁ ১৯৮৯ চনত বিবাদিত ২৮১০ বৰ্গমিটাৰ মাটি ক্ৰয় কৰিছিল। ২০১১ চনত বলপূৰ্বকভাৱে এই মাটি অধিগ্ৰহণ কৰা হৈছিল। তেওঁৰ অভিযোগত স্বয়ং বিল্ডাৰ্ছ আৰু ছেভেন ইলেভেন কনষ্ট্ৰাকচন নামৰ দুটা নিৰ্মাণ কোম্পানীৰ নাম আহিছিল। উল্লেখ্য যে ছেভেন এলেভেন কনষ্ট্ৰাকচনৰ স্বত্বাধিকাৰী বিজেপিৰ বিধায়ক মেহতা।
বৰ্তমান এই বিষয়টো আদালতত বিচাৰাধীন হৈ আছে। ১৬ ছেপ্টেম্বৰৰ বাবে শুনানিৰ তাৰিখ নিৰ্ধাৰণ কৰা হৈছে। কিন্তু তাৰ ২৪ ঘণ্টা পূৰ্বেই বোহৰাই মাটিখিনি ঘূৰাই পালে।
