প্রথমবাৰৰ বাবে ভাৰতৰ মাটিৰ পৰা উৰা মাৰিলে জাপানৰ বায়ুসেনাৰ যুদ্ধবিমান। ভাৰত আৰু জাপানে ভাৰত-প্ৰশান্ত মহাসাগৰীয় অঞ্চলত প্ৰতিৰক্ষা সমীকৰণ শক্তিশালী কৰাৰ দিশত আন এক পদক্ষেপ গ্ৰহণ কৰিছে। ভাৰতীয় বায়ুসেনাৰ মুৰব্বী এ পি সিঙে কয় যে দ্বিপাক্ষিক সামৰিক সহযোগিতাৰ ইতিহাসত এয়া এক ডাঙৰ মাইলৰ খুঁটি।
যোৱা ৯ ছেপ্টেম্বৰৰ পৰা ৰাজস্থানৰ যোধপুৰ বিমানঘাটিত ভাৰত আৰু জাপানৰ যৌথ বিমান অনুশীলন ‘বীৰ গাৰ্ডিয়ান-২০২৬’ আৰম্ভ হয়। ২২ ছেপ্টেম্বৰলৈকে চলিব। জাপানী বায়ুসেনাৰ ‘এফ-২এ’ যুদ্ধ বিমানেও এই অনুশীলনত যোগদান কৰিছে। ইয়াৰ লগতে ভাৰতত আছে ‘তেজছ’, ‘সুখয়-৩০ এম কে আই’ আৰু ‘ৰাফেল’ৰ দৰে প্ৰথম শ্ৰেণীৰ যুদ্ধ বিমান। দেওবাৰৰ অনুশীলনৰ সময়ত ৰাজস্থানৰ আকাশত সৃষ্টি হয় এক বিশেষ মুহূৰ্তৰ। জাপানৰ বায়ু আত্মৰক্ষা বাহিনীৰ মুৰব্বী জেনেৰেল তাকেহিৰো মৰিটা ভাৰতৰ নিজা প্ৰযুক্তিৰে নিৰ্মিত লঘু যুদ্ধবিমান ‘তেজছ’ত উঠে। আনহাতে, ভাৰতীয় বায়ুসেনাৰ মুৰব্বীগৰাকীয়েও এককভাৱে তেজছ উৰুৱাই আকাশত ঘূৰে। অনুশীলনৰ শেষত ইজনে সিজনৰ লগত বেজৰ আদান-প্ৰদান কৰি দুয়োটা শক্তিৰ মাজত পাৰস্পৰিক সন্মান আৰু সহযোগিতাৰ বাৰ্তা প্ৰেৰণ কৰে।
অনুশীলনৰ অন্তত এক সংবাদমেলত এয়াৰ চীফ মাৰ্শ্বাল এ পি সিঙে কয় যে জাপানৰ যুদ্ধ বিমান ভাৰতলৈ আহি পোনপটীয়াকৈ এই অনুশীলনত যোগদান কৰিছে, যিটো ভাৰত-জাপান সম্পৰ্কৰ ইতিহাসত প্ৰথমবাৰৰ বাবে ঘটিছে। এই যৌথ অনুশীলনে আঞ্চলিক শান্তি বজাই ৰখাৰ বাবে দুয়োটা শক্তিৰ মাজত দায়বদ্ধতাক আৰু অধিক শক্তিশালী কৰিব। তেওঁ কয়, “একেলগে অনুশীলন কৰিলে ইজনে সিজনৰ কৰ্ম পদ্ধতিৰ পৰা শিকিবলৈ সুযোগ পোৱা যায়। ইয়াৰ ফলত দুয়োপক্ষৰ সামৰ্থ্য বৃদ্ধি পায়।”
জাপানৰ বায়ুসেনাৰ মুৰব্বীগৰাকীয়েও একে আৱেগকে প্ৰতিধ্বনিত কৰে। তেওঁ কয় যে ভাৰতৰ মাটিত জাপানী যুদ্ধ বিমানৰ উপস্থিতিয়ে প্রমাণ কৰে যে প্রয়োজন হ’লে সমগ্ৰ ভাৰত-প্ৰশান্ত মহাসাগৰীয় অঞ্চলত বায়ুসেনা নিয়োগ কৰিবলৈ সাজু৷ তেজছ উৰণৰ অভিজ্ঞতাক অমূল্য বুলি অভিহিত কৰি তেওঁ কয়, “তেজছ ভাৰতৰ প্ৰযুক্তিগত উদ্ভাৱন আৰু ‘মেক ইন ইণ্ডিয়া’ পদক্ষেপৰ এক উজ্জ্বল প্ৰতীক। আগন্তুক দিনতো ই দুয়োখন দেশৰ বায়ুসেনাৰ বাবে বিশ্বাস আৰু বন্ধুত্বৰ প্ৰতীক হৈ থাকিব।”
১৪ দিনীয়া অনুশীলনত দুয়োখন দেশৰ বাহিনীয়ে আকাশমাৰ্গ সুৰক্ষা, উন্নত আকাশ কৌশল আৰু কাৰ্যকৰী পৰিকল্পনাৰ বিষয়ে আলোচনা কৰি আছে। কাৰিকৰী ৰক্ষণাবেক্ষণ আৰু বায়ুমণ্ডলৰ সুৰক্ষাৰ ওপৰতো আলোচনা চলি আছে। ভাৰতৰ নিজা যুদ্ধবিমান কাৰ্যসূচী সন্দৰ্ভত বায়ুসেনাৰ মুৰব্বীগৰাকীয়ে কয় যে যদিও বৃহৎসংখ্যক তেজছ বিমানৰ অৰ্ডাৰ দিয়া হৈছে, তথাপিও বিশ্বব্যাপী যোগান শৃংখলৰ সমস্যাৰ বাবে ডেলিভাৰীত কিছু পলম হৈছে। অৱশ্যে পৰৱৰ্তী প্ৰজন্মৰ তেজছ মাৰ্ক-দ্বিতীয় আৰু এডভান্সড মিডিয়াম কম্বেট এয়াৰক্ৰাফ্ট (এএমচিএ) সাজু হ’লে ভাৰতৰ প্ৰতিৰক্ষা প্ৰযুক্তিয়ে অধিক উচ্চতা লাভ কৰিব বুলি আশা প্ৰকাশ কৰে।
