দিল্লীত আন এক দলবদ্ধ ধৰ্ষণৰ অভিযোগ উত্থাপন হৈছে। এইবাৰ দিল্লীৰ এখন পাৰ্কত আৰক্ষীৰ সাজ-পোছাক পৰিধান কৰি তিনিজন অভিযুক্তই অত্যাচাৰ চলাইছিল এগৰাকী নাবালিকাক। সোমবাৰে সন্ধিয়া দিল্লীৰ কলকাজী মন্দিৰ সংলগ্ন এখন উদ্যানত সংঘটিত হয় এই ঘটনা। ঘটনাৰ লগত জড়িত লোকসকলক বিচাৰি নিশা আৰক্ষীয়ে অভিযান চলায়। তালাচীৰ সময়ত মঙলবাৰে পুৱা এজন অভিযুক্তক আৰক্ষীয়ে গুলীচালনা কৰে। অৱশেষত তদন্তকাৰীয়ে তেওঁক গ্ৰেপ্তাৰ কৰে। বাকী অভিযুক্তসকলৰ সন্ধান অব্যাহত আছে।
আৰক্ষীৰ সূত্ৰ অনুসৰি, সোমবাৰে সন্ধিয়া প্ৰায় ৭.৩০ বজাত সংঘটিত হয় এই ঘটনা। ১৭ বছৰীয়া কিশোৰীগৰাকী বন্ধুৰ সৈতে কলকাজী মন্দিৰলৈ গৈ প্ৰাৰ্থনা কৰিবলৈ গৈছিল। বন্ধুজনো নাবালক। সন্ধিয়া প্ৰায় ৭ বজাত মন্দিৰত প্ৰাৰ্থনা কৰাৰ পিছত দুয়ো মন্দিৰৰ ওচৰৰ এখন পাৰ্কত গৈ বহে। সেই সময়ত আৰক্ষী বুলি পৰিচয় দিয়া তিনিজন যুৱকে কিশোৰজনৰ কাষ চাপে। অভিযোগ অনুসৰি, তিনিওজন যুৱকে কিশোৰীগৰাকীক তাত ভাবুকি দি দলবদ্ধ ধৰ্ষণ কৰে।
পিছত নিশা প্ৰায় ৮.৪৫ বজাত দিল্লী আৰক্ষীক খবৰ দিয়া হয়। কলকাজী মন্দিৰ আৰু ইস্কন মন্দিৰৰ মাজৰ এখন পাৰ্কত এগৰাকী কিশোৰীক ধৰ্ষণ কৰা বুলি পিচিআৰ কলৰ জৰিয়তে আৰক্ষীক অৱগত কৰা হয়। তথ্য লাভ কৰাৰ লগে লগে আৰক্ষীৰ এটা দল সেই স্থানত উপস্থিত হয়। দিল্লীৰ বাসিন্দা কিশোৰীগৰাকীৰ শাৰীৰিক পৰীক্ষাৰ ব্যৱস্থা কৰে আৰক্ষী জোৱানসকলে। তেওঁৰ বক্তব্যও লিপিবদ্ধ কৰা হয়।
ছোৱালীজনীৰ বক্তব্যৰ ভিত্তিত আৰক্ষীয়ে পক্সো (POCSO) ধাৰাত গোচৰ ৰুজু কৰে। উদ্যানখনৰ চিচিটিভি ফুটেজ পৰীক্ষা কৰাৰ পাছত নিশা অভিযুক্তক বিচাৰি অভিযান আৰম্ভ কৰা হয়। সেই সময়ত উদ্যানখনৰ আশে-পাশে থকা অঞ্চলত থকা লোকসকলৰ সৈতেও কথা পাতি তথ্য সংগ্ৰহ কৰে তদন্তকাৰীয়ে।
মঙলবাৰে নিশা তালাচী চলোৱাৰ অন্তত আৰক্ষীয়ে এজন অভিযুক্তৰ সন্ধান উলিয়ায়। সংবাদ সংস্থা এএনআইৰ এক প্ৰতিবেদন অনুসৰি, মঙলবাৰে পুৱা অভিযুক্তই গ্ৰেপ্তাৰ কৰিবলৈ চেষ্টা কৰি থকাৰ সময়তে তেওঁ আৰক্ষীৰ সৈতে সংঘৰ্ষত লিপ্ত হয়। অভিযুক্তই আৰক্ষীৰ ওপৰত গুলীচালনা কৰে। কিছু সময় পিছত তদন্তকাৰীয়ে অভিযুক্তক গ্ৰেপ্তাৰ কৰে।
শেহতীয়াকৈ দিল্লীত ইটোৰ পিছত সিটোকৈ দলবদ্ধ ধৰ্ষণৰ অভিযোগ উত্থাপন হৈছে। কেতিয়াবা চলন্ত বাছত, কেতিয়াবা টেম্পোত মহিলাক অত্যাচাৰ কৰাৰ অভিযোগ উত্থাপন হৈছে। এইবোৰ ঘটনাৰ বাবেই দিল্লীৰ আইন-শৃংখলাৰ পৰিস্থিতিক লৈ বহুতে প্ৰশ্ন উত্থাপন কৰিবলৈ আৰম্ভ কৰিছে।
