দিল্লী উচ্চ ন্যায়ালয়ে জৱাহৰলাল নেহৰু বিশ্ববিদ্যালয়ৰ প্ৰাক্তন ছাত্ৰ নেতা ওমৰ খালিদ আৰু শ্বাৰ্জিল ইমামৰ জামিন আবেদন স্থগিত ৰাখিছে। ন্যায়াধীশ প্ৰতিভা এম সিং আৰু ন্যায়াধীশ দীনেশ ভাটৰ বিভাগীয় বিচাৰপীঠে ৩০ ছেপ্টেম্বৰলৈ আবেদন স্থগিত ৰাখিছে।
সোমবাৰে ওমৰৰ জামিন গোচৰত চৰকাৰে কয় যে অতিৰিক্ত ছলিচিটৰ জেনেৰেল এছ ভি ৰাজু অসুস্থ। এই গোচৰত তেওঁ যুক্তি দিব। গতিকে আদালতে তেওঁক সময় দিব লাগে। সেই আবেদনৰ ভিত্তিত উচ্চ ন্যায়ালয়ে ৩০ ছেপ্টেম্বৰলৈতে শুনানি স্থগিত ৰাখিছে।
ইয়াৰ পূৰ্বে ওমৰ আৰু শ্বাৰ্জিলে যোৱা ৪ জুলাইত নিম্ন আদালতে জামিনৰ আবেদন নাকচ কৰাৰ পিছত দিল্লী উচ্চ ন্যায়ালয়ৰ কাষ চাপিছিল। দিল্লী হিংসাৰ গোচৰত ২০২০ চনৰ পৰা জেএনইউৰ প্ৰাক্তন ছাত্ৰ নেতা ওমৰ আৰু শ্বাৰ্জিল জে’লত আছে। ২০২০ চনৰ ছেপ্টেম্বৰ মাহত ওমৰক গ্ৰেপ্তাৰ কৰা হৈছিল। সেই বছৰৰ ২৫ আগষ্টত শ্বাৰ্জিলক গ্ৰেপ্তাৰ কৰা হৈছিল। দুয়োৰে বিৰুদ্ধে অবৈধ কাৰ্যকলাপ (প্ৰতিৰোধ) আইনৰ অধীনত গোচৰ ৰুজু কৰা হয়।
দিল্লী হিংসাত্মক ঘটনাত কমেও ৫৩ জন লোকৰ মৃত্যু হয়। প্ৰায় ৭০০ লোক আহত হয়। খালিদ ছাইফী আৰু তেতিয়াৰ আম আদমি পাৰ্টীৰ কাউন্সিলাৰ তাহিৰ হুছেইনৰ বিৰুদ্ধে বৃহত্তৰ ষড়যন্ত্ৰৰ বাবে গোচৰ ৰুজু কৰা হৈছিল। দিল্লী আৰক্ষীৰ বিশেষ কোষে তদন্ত কৰি আছিল। ইয়াৰ পূৰ্বে ওমৰ আৰু শ্বাৰ্জিলে জামিনৰ বাবে বাৰে বাৰে বিভিন্ন আদালতত আবেদন কৰি আহিছে। কিন্তু এতিয়ালৈকে তেওঁলোকৰ আবেদন অনুমোদন হোৱা নাই। উচ্চতম ন্যায়ালয়ে অবৈধ কাৰ্যকলাপ (প্ৰতিৰোধ) আইনৰ অধীনত জামিনৰ আইনী মাপকাঠী পুনৰীক্ষণ কৰিবলৈ সন্মত হয়।
