ভোটাৰ তালিকাত জালিয়াতিৰ অভিযোগ উত্থাপন হোৱাৰ অভিযোগত চাপত পৰিছে কংগ্ৰেছ নেত্ৰী ছোনিয়া গান্ধী। ২০২৫ চনৰ ছেপ্টেম্বৰ মাহত দিল্লীৰ ৰৌজ এভিনিউ আদালতৰ অতিৰিক্ত মুখ্য ন্যায়িক দণ্ডাধীশ বৈভৱ চৌৰাছিয়াই এই গোচৰত ছোনিয়াৰ বিৰুদ্ধে এফআইআৰ দাখিল কৰাৰ আবেদন খাৰিজ কৰিছিল। কিন্তু সোমবাৰে দ্বাৰকা বিশেষ আদালতৰ ন্যায়াধীশ বিশাল গগনে সেই ৰায়ক “যুক্তিহীন আৰু ত্ৰুটিপূৰ্ণ” বুলি অভিহিত কৰি বাতিল ঘোষণা কৰে। উল্লখ্য যে এই গোচৰটো ৰৌজ এভিনিউ আদালতত দাখিল কৰিছিল চেণ্ট্ৰেল দিল্লী ক’ৰ্ট বাৰ এছ’চিয়েশ্যনৰ উপ-সভাপতি বিকাশ ত্ৰিপাঠীৰ অধিবক্তা পৱন নৰঙে। নিহত প্ৰধানমন্ত্ৰী ইন্দিৰা গান্ধীৰ বোৱাৰীয়েকে ভাৰতীয় নাগৰিক হোৱাৰ পূৰ্বে দেশৰ নিৰ্বাচনী তালিকাত নাম পঞ্জীয়ন কৰিছিল বুলি অভিযোগ উত্থাপন কৰি তদন্তৰ দাবী জনাই এই এফআইআৰ দাখিল কৰে। চৰকাৰী সংস্থাটোক ‘প্ৰৱঞ্চনা’ কৰি ‘প্ৰতাৰণা’ কৰা বুলি তেওঁ দাবী কৰে। ২০২৫ চনৰ ১০ ছেপ্টেম্বৰত ৰৌজ এভিনিউ আদালতে সেই গোচৰত অভিযোগকাৰীৰ তদন্তৰ আবেদন নাকচ কৰে। ন্যায়াধীশ চৌৰাছিয়াই কয় যে অভিযোগকাৰীৰ হাতত কোনো উপযুক্ত প্ৰমাণ নাই।
কিন্তু সোমবাৰে ন্যায়াধীশ গগনে ৰৌজ এভিনিউ আদালতৰ ৰায়দান বাতিল কৰি কয় যে ইয়াত কোনো যুক্তি দেখুওৱা হোৱা নাই আৰু ইয়াত সঠিক আইনী ৰায় প্ৰয়োগ কৰা হোৱা নাই। অভিযোগত তথ্যৰ অভাৱ বুলি দাবী কৰি দণ্ডাধীশে ভুল কৰিলে। আদেশত স্পষ্ট আইনী ভুল আছে। ন্যায়াধীশ গগনে কয় যে ২৯ ছেপ্টেম্বৰৰ পৰা বিশেষ আদালতত তদন্তৰ আবেদন পৰীক্ষাৰ শুনানি আৰম্ভ হ’ব। চলিত বৰ্ষৰ আৰম্ভণিতে আদালতে এই গোচৰৰ উত্তৰ দিবলৈ ছোনিয়া আৰু দিল্লী আৰক্ষীক চমন কৰিছিল।
তুলনামূলকভাৱে বিজেপিৰ আইটি চেলৰ তেতিয়াৰ সৰ্বভাৰতীয় মুৰব্বী অমিত মালব্যই প্ৰথমে যোৱা বছৰৰ আৰম্ভণিতে ছোনিয়াৰ ক্ষমতাৰ অপব্যৱহাৰ কৰি ভোটাৰ তালিকাত নাম অন্তৰ্ভুক্ত কৰাৰ অভিযোগ উত্থাপন কৰিছিল। মালব্যই ছ’চিয়েল মিডিয়াত অভিযোগ কৰিছিল যে ভাৰতীয় নাগৰিক হোৱাৰ পূৰ্বে ছোনিয়াৰ নাম ভোটাৰ তালিকাত অন্তৰ্ভুক্ত হৈছিল। সেই অভিযোগৰ ভিত্তিত মালব্যই তেওঁৰ দাবীৰ সমৰ্থনত ‘নথি’ও দেখুৱাইছিল। ৪৫ বছৰ পূৰ্বে ছোনিয়াই নিৰ্বাচন আয়োগৰ সৈতে ‘গোপন বুজাবুজি’ কৰি ভোটাৰ তালিকা জাল কৰা বুলি দাবী কৰিছিল বিজেপি নেতাগৰাকীয়ে। অভিযোগ মতে, সেই সময়ত তেওঁ ভাৰতীয় নাগৰিকো হোৱা নাছিল। কিন্তু তাৰ আগতে অবৈধভাৱে ভোটাৰ তালিকাত তেওঁৰ নাম অন্তৰ্ভুক্ত হৈছিল।
মালব্যই ১৯৮০ চনৰ ভোটাৰ তালিকাৰ এখন ছবি ‘প্ৰমাণৰ নথি’ হিচাপে পোষ্ট কৰিছিল । ১৯৪৬ চনত ইটালীত জন্মগ্ৰহণ কৰিছিল ছোনিয়াই। তেওঁৰ কুমাৰীকালৰ নাম আছিল ছোনিয়া মাইনো। ১৯৬৮ চনত ৰাজীৱ গান্ধীৰ সৈতে বিবাহপাশত আবদ্ধ হোৱাৰ পিছতেই ভাৰতীয় নাগৰিকত্ব লোৱা নাছিল তেওঁ। বিজেপিয়ে দাবী কৰিছে যে ১৯৮০ চনত লোকসভা নিৰ্বাচনৰ পূৰ্বে ছোনিয়াৰ নাম প্ৰথমবাৰৰ বাবে নতুন দিল্লী সমষ্টিৰ ভোটাৰ তালিকাত উঠিছিল। সেই সময়ত গান্ধী পৰিয়ালটো তেতিয়াৰ প্ৰধানমন্ত্ৰী ইন্দিৰা গান্ধীৰ চৰকাৰী বাসগৃহত বাস কৰিছিল। বিজেপিয়ে লগতে দাবী কৰে যে ১৯৮২ চনলৈকে ছোনিয়াৰ নাম ভোটাৰ তালিকাত আছিল। কিন্তু ১৯৮৩ চনত তেওঁ ভাৰতীয় নাগৰিকত্ব লাভ কৰিছিল। আবেদনকাৰী বিকাশে আদালতত দাবী কৰিছিল যে ১৯৮৩ চনৰ এপ্ৰিল পৰ্যন্ত ছোনিয়াৰ ভাৰতীয় নাগৰিকত্ব নথকা সত্ত্বেও ১৯৮০ চনৰ ১ জানুৱাৰীত ভোটাৰ তালিকাত তেওঁৰ নাম পঞ্জীয়ন হৈছিল। সেয়েহে ছোনিয়াৰ বিৰুদ্ধে অপৰাধমূলক অভিযোগৰ তেওঁ তদন্তৰ দাবী জনায়।
