হাৰিয়ানাৰ ফৰিদাবাদত (Faridabad of Haryana) শিক্ষকৰ ঘৰৰ পৰা উভতি অহাৰ পথত দুগৰাকী কিশোৰীক অপহৰণ কৰি ধৰ্ষণ (Kidnapping and rape) কৰাৰ অভিযোগ। আৰক্ষীৰ সূত্ৰ অনুসৰি, তেওঁলোকক এটা পৰিত্যক্ত ঘৰলৈ লৈ গৈ ধৰ্ষণ কৰে। ইয়াৰ পিছতে অভিযুক্তই পলায়ন কৰে।
অভিযোগ অনুসৰি, কিশোৰীদুজনীক এই বিষয়ে লিখিতভাৱেও কাকো অৱগত নকৰিবলৈ সকীয়াই দিয়া হৈছিল। নহ’লে তেওঁলোকক হত্যা কৰা হ’লহেঁতেন। আৰক্ষীৰ সূত্ৰ অনুসৰি, কিশোৰী দুগৰাকীয়ে ভয় আৰু আতংকৰ বাবে ঘৰত একো কোৱা নাছিল। শিক্ষকৰ ঘৰলৈ গৈ পঢ়া-শুনা কৰিবলৈও ইচ্ছুক নাছিল।
কিশোৰী দুগৰাকীৰ পৰিয়ালে দাবী কৰিছে যে কেইবাদিনো ধৰি তেওঁলোকৰ আচৰণত কিছু অস্বাভাৱিকতা আছিল। তাৰে এগৰাকী কিশোৰীয়ে কিছুদিন পিছতে ঘৰত এই বিষয়ে জনায়। সমগ্ৰ ঘটনাৰ বিষয়ে জানিব পাৰি কিশোৰী দুগৰাকীৰ পৰিয়ালে আৰক্ষীৰ ওচৰত এজাহাৰ দাখিল কৰে।
এজাহাৰ লাভ কৰাৰ পিছতে আৰক্ষীয়ে যুৱককেইজনৰ সন্ধান আৰম্ভ কৰে। শুকুৰবাৰে গ্ৰেপ্তাৰ কৰা হয় তিনি অভিযুক্তক। বাকী এজন পলাতক হৈ আছে। আৰক্ষীৰ সূত্ৰৰ পৰা জানিব পৰা মতে, শিক্ষকৰ ঘৰৰ পৰা দুগৰাকী ছোৱালী ঘূৰি অহাৰ সময়ত চাৰিজন যুৱক তেওঁলোকৰ পিছে পিছে গৈ আছিল। বাটতে এটা পৰিত্যক্ত ঘৰ আছিল। সেই পথেৰে ছোৱালীকেইজনীয়ে পাৰ হৈ যোৱাৰ সময়তে যুৱককেইজনে পথ অৱৰোধ কৰে। ইয়াৰ পিছত হত্যাৰ ভাবুকি দি পৰিত্যক্ত ঘৰটোলৈ লৈ যায়। তাতে তেওঁলোকক ধৰ্ষণ কৰা হয়।
