কৃষি বিভাগৰ জৰীপ চলাবলৈ যোৱা জৰীপকাৰ (Surveyor)ক শিশু অপহৰণকাৰী আৰু সোপাধৰাৰ সন্দেহত বান্ধি গুৰুলাগুৰুলকৈ মাৰপিট কৰাৰ অভিযোগ এদল উন্মাদ লোকৰ বিৰুদ্ধে। যোৱা ৪ অক্টোবৰত গোলাঘাট কৃষি বিভাগৰ অধীনস্থ দলৌজান (Doloujan of Golaghat) ৱাৰ্ডত জৰীপ চলাবলৈ যোৱা সময়ত আদিত্য দত্ত (Aditya Dutta) নামৰ জৰীপকাৰজনে অচিনাকী ঠাইসমূহ চিনি পাবৰ বাবে সহায় লৈছিল স্থানীয় তিনিটা শিশু-কিশোৰৰ। প্ৰথমে তিনি শিশু কিশোৰৰ লগত স্থানীয় বিপিন হাজৰিকাৰ ঘৰলৈ যায়। হাজৰিকাৰ ঘৰৰ পৰা মাটি জৰীপ কৰিবলৈ যাওঁতে লগত শিশু কিশোৰ তিনিওটাও ওলাল।
শিশু কিশোৰৰ লগত খোজকাঢ়ি গৈ থকা অৱস্থাত স্থানীয় কোনো লোকে শিশু অপহৰণকাৰীৰ অভিযোগ তুলি হুলস্থুল কৰি আদিত্য দত্তক কৰায়ত্ব কৰি পঘাৰে বান্ধি লয়। আৰু তাৰ পাছত কোনো বাচ বিচাৰ নোহোৱাকৈ সোপাধৰাৰ অন্ধবিশ্বাসত মত্ত উন্মাদ একাংশ লোকে উপৰ্যুপৰি প্ৰহাৰ কৰে জৰীপকাৰ আদিত্য দত্তক। অৱশেষত খবৰটো বিয়পি পৰাত যুৱকজনৰ আত্মীয় আৰু গাঁওৰক্ষী বাহিনীয়ে ফৰকাটিং আৰক্ষীৰ সহায়ত ঘটনাস্থলীৰ পৰা উদ্ধাৰ কৰে যুৱকজনক। গুৰুতৰভাৱে আহত যুৱকজন বৰ্তমান চিকিৎসাধীন গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ত। ঘটনা সন্দৰ্ভত ফৰকাটিং আৰক্ষী থানাত এজাহাৰ দিয়ে ভোক্তভোগী আদিত্য দত্তই। ঘটনাক কেন্দ্ৰ কৰি সংবাদ মাধ্যমকো বিপথে পৰিচালিত কৰাৰ অভিযোগ একাংশ লোকৰ বিৰুদ্ধে।
