দিল্লীত (Delhi) পুনৰ ভাঙি পৰে আন এটা বহুমহলীয়া অট্টালিকা (building collapse)। বুধবাৰে বিয়লি পাঁচ মহলীয়া অট্টালিকাৰ সন্মুখৰ অংশ হঠাতে ভাঙি পৰে। বহু লোক ধ্বংসাৱশেষৰ তলত আবদ্ধ হৈ পৰাৰ আশংকা কৰা হৈছে। উদ্ধাৰৰ কাম চলি আছে।
উত্তৰ-পূব দিল্লীৰ সীমাপুৰী অঞ্চলত বুধবাৰে বিয়লি প্ৰায় ৩.৩০ বজাত এটা ঘৰ ভাঙি পৰে। তাৰ সন্মুখত মাছৰ বজাৰ এখন আছে। তথ্য লাভ কৰাৰ লগে লগে অগ্নিনিৰ্বাপক বাহিনী সেই স্থানত উপস্থিত হয়। ঘটনাস্থলীত আৰক্ষীও উপস্থিত হয়। অঞ্চলটোত যাতায়ত ব্যাহত হৈছে। ধ্বংসাৱশেষত কিমানজন আবদ্ধ হৈ আছে সেয়া এতিয়াও স্পষ্ট হোৱা নাই। ঘৰটো ভাঙি পৰাৰ কাৰণো জানিব পৰা হোৱা নাই। প্ৰথম অৱস্থাত উদ্ধাৰ কামক অগ্ৰাধিকাৰ দিয়া হৈছে। সেই স্থানৰ কিছু ছবি আৰু ভিডিঅ’ত দেখা গৈছে যে ধ্বংসাৱশেষৰ সন্মুখত মানুহ গোট খাইছে। উদ্ধাৰ কামত যোগ দিছে স্থানীয় ৰাইজে। বহুতে খালী হাতেৰে পকী বেৰবোৰ আঁতৰাবলৈ চেষ্টা কৰিছে। দিল্লী যান-বাহন আৰক্ষীয়ে ছ’চিয়েল মিডিয়াত পোষ্ট কৰি বৰ্তমান সীমাপুৰী অঞ্চলৰ পৰা আঁতৰি থাকিবলৈ পৰামৰ্শ দিছে। এম্বুলেন্স আৰু উদ্ধাৰকাৰী বাহনসমূহে যাতে কোনো ধৰণৰ অসুবিধাৰ সন্মুখীন নহয় তাৰ বাবে পথটো মুকলি কৰি দিয়া হৈছে।
উত্তৰ-পূব দিল্লীৰ ডিচিপি আৰ পি মীনাই জানিবলৈ দিয়া মতে, সেই স্থানৰ পৰা পাঁচজন লোকক উদ্ধাৰ কৰি চিকিৎসালয়লৈ প্ৰেৰণ কৰা হৈছে। কিন্তু আৰু কিমানজন আহত হৈছে আৰু কিমান ভিতৰত আবদ্ধ হৈ আছে সেয়া এতিয়াও স্পষ্ট হোৱা নাই।
উল্লেখযোগ্য যে, ৬ ছেপ্টেম্বৰত দিল্লীৰ সত্য নিকেতনত পাঁচ মহলীয়া হোষ্টেল বিল্ডিং এটা ভাঙি পৰিছিল। ধ্বংসাৱশেষৰ পৰা মুঠ ১২ জন লোকক উদ্ধাৰ কৰা হয়। ইয়াৰে ৭ জনৰ মৃত্যু হয়। আহত হয় ৫ জন। অট্টালিকাটো মূলতঃ ছাত্ৰ-ছাত্ৰীসকলে ব্যৱহাৰ কৰিছিল। জানিব পৰা মতে, অট্টালিকাটোৰ বেছমেণ্টত নিৰ্মাণৰ কাম চলি আছিল। কিছুদিন ধৰি অবিৰতভাৱে বৰষুণ দি আছিল। সেইবাবেই হয়তো অট্টালিকাটো ভাঙি যায়। অভিযোগ অনুসৰি, এই ভৱনটো অবৈধভাৱে নিৰ্মাণ কৰা হৈছিল। অগ্নিনিৰ্বাপক বাহিনী বা পৌৰসভাৰ কোনো বিশেষ অনুমতি নাছিল। সেই ঘটনাৰ পিছত দিল্লীৰ ওখ অট্টালিকাসমূহৰ সুৰক্ষাক লৈ প্ৰশ্ন উত্থাপন হৈছিল। সেই ঘটনাৰ চাঞ্চল্য মাৰ নাযাওঁতেই ৰাজধানীত আন এটা পাঁচ মহলীয়া অট্টালিকা ভাঙি পৰে।
