মণিপুৰৰ কাংপোকপি জিলাত (Kangpokpi district of Manipur) এটা সশস্ত্ৰ সংগঠনৰ আক্ৰমণত নিহত এজন লোকৰ কটা মূৰ ঘূৰাই দিয়াৰ দাবীত নগা নাগৰিক সংস্থাই ৪৮ ঘণ্টীয়া সময়সীমা নিৰ্ধাৰণ কৰিছে। শনিবাৰে মাকুই আছাং গাঁৱত সন্দেহযুক্ত উগ্ৰপন্থীৰ আক্ৰমণত নিহত (Killed in a militant attack) হয় ৫২ বছৰীয়া অজিনবাউ ৰিংকাংমাই। দেওবাৰে নিশা তেওঁৰ মুণ্ডহীন মৃতদেহ ইম্ফলৰ জৱাহৰলাল নেহৰু ইনষ্টিটিউট অব মেডিকেল ছায়েন্সলৈ মৰণোত্তৰ পৰীক্ষাৰ বাবে অনা হয়। কিন্তু শনিবাৰে ভাইৰেল হোৱা এটা ভিডিঅ’ত দেখা গৈছে যে অজিনবাউৰ কটা মূৰটো অস্ত্ৰ-শস্ত্ৰৰে সজ্জিত আৰু সেনাৰ পোছাক পিন্ধা উগ্ৰপন্থীৰ মাজত পৰি আছে।
দেওবাৰে যুটীয়া জনজাতি পৰিষদ মণিপুৰে এক বিবৃতিত কয় যে অজিনবাউৰ কটা মূৰটো এতিয়াও সন্ধানহীন হৈ আছে। এই মুণ্ড মৰ্যাদাপূৰ্ণ শেষ অনুষ্ঠানৰ বাবে পৰিয়ালক গতাই নিদিয়ালৈকে মৰণোত্তৰ পৰীক্ষা কৰা নহ’ব। বিবৃতিটোত ক্ষোভ প্ৰকাশ কৰি কয়, “উগ্ৰপন্থীয়ে তেওঁৰ কটা মূৰটো ট্ৰফী হিচাপে ব্যৱহাৰ কৰিছে, এই পৰিস্থিতিত আমি ৰাজ্য প্ৰশাসনক মৃতদেহটো আৰু অধিক বিভাজিত কৰিবলৈ নিদিওঁ।”
নতুন হিংসাৰ বাবে ৰাজ্য আৰু কেন্দ্ৰীয় চৰকাৰক প্ৰত্যক্ষভাৱে দোষাৰোপ কৰি সংগঠনটোৱে ইয়াক “মানৱতাৰ চূড়ান্ত অপমান” বুলি অভিহিত কৰে। নিৰ্দিষ্ট সময়ৰ ভিতৰত মূৰটো ঘূৰাই নিদিলে ন্যায়ৰ স্বাৰ্থত কঠোৰ ব্যৱস্থা গ্ৰহণ কৰা হ’ব বুলি সকীয়াই দিছে । লগতে কটা মূৰ বিচাৰি উলিয়াবলৈ আৰু ঘূৰাই দিবলৈ ৪৮ ঘণ্টাৰ সময়সীমা নিৰ্ধাৰণ কৰিছে।
উল্লেখ্য যে মণিপুৰৰ কামজং, উখৰুল আৰু কাংপকপি জিলাত শুকুৰবাৰ আৰু শনিবাৰে পৃথক পৃথক গুলীচালনাত কমেও ৯ জন লোক নিহত হোৱাৰ ফলত ৰাজ্যত নতুনকৈ হিংসাত্মক পৰিস্থিতিৰ সৃষ্টি হয়। আৰক্ষী সূত্ৰই জনোৱা মতে, শুকুৰবাৰে নিশা কামজং জিলাৰ কুকি প্ৰধান চাছাদ গাঁৱত পাঁচ সন্তানৰ এগৰাকী ২২ বছৰীয়া মাতৃক অচিনাক্ত দুৰ্বৃত্তই গুলীয়াই হত্যা কৰাৰ পিছতে শেহতীয়া হিংসাত্মক পৰিস্থিতিৰ সৃষ্টি হয়। এই হত্যাকাণ্ডৰ পিছতে শনিবাৰে পুৱালৈকে কুকি আৰু নগা সশস্ত্ৰ সংগঠনৰ মাজত প্ৰচণ্ড গুলীচালনা চলি থাকে।
ৰাজ্যৰ মুখ্যমন্ত্ৰী য়ুমনান খেমচান্দ সিঙে এই হত্যাকাণ্ডক তীব্ৰ গৰিহণা দিছে। পৰিস্থিতি নিয়ন্ত্ৰণ, শান্তি-শৃংখলা পুনৰুদ্ধাৰ আৰু সকলো নাগৰিকৰ সুৰক্ষা নিশ্চিত কৰাৰ বাবে সংশ্লিষ্ট কৰ্তৃপক্ষক তাৎক্ষণিক আৰু ফলপ্ৰসূ ব্যৱস্থা গ্ৰহণ কৰিবলৈ নিৰ্দেশ দিছে।
