ASSAM TIMES POST
মৰিগাঁৱৰ পৰা অজন্তা তালুকদাৰঃ
যোৱা ৮ মাৰ্চত মৰিগাঁও জিলা পুথিভঁড়ালত সফল মঞ্চস্থ হৈ যায় অসমৰ আগশাৰীৰ নাট্যগোষ্ঠী মৰিগাঁৱৰ লালিলাং দ্যা থিয়েটাৰ ৰিডমৰ দশম নাট প্ৰযোজনা “ডাকোৱাল দ্যা পষ্টমেন” পূৰ্ণাংগ নাটৰ।
কবি, নাট্যকাৰ-পৰিচালক জ্যোতিপ্ৰসাদ ভূঞাৰ ৰচনা আৰু আঁশীৰ দশকত এক নতুন নাট্যান্দোলনেৰে অসমৰ এমেচাৰ নাটকক নতুন গতিৰে প্ৰৱাহিত কৰোৱা ৰফিকুল হোছেইনৰ পৰিচালনাত মঞ্চায়ন হোৱা কাব্য-নাটখনিয়ে প্ৰেক্ষাগৃহ ভৰ্তি দৰ্শকৰ মন জয় কৰিবলৈ সক্ষম হয়।
মৰিগাঁৱৰ প্ৰবীণ-নৱীন শিল্পীৰ সমাহাৰ ঘটা নাটখনিৰ মূল চৰিত্ৰত হৃষিকেশ কৌশিক, জ্যোৎস্না বসুমতাৰী , অংকিতা বৰা, ৰোহিণী কুমাৰ ডেকাৰ লগতে লগতে আন আন চৰিত্ৰত সাৱলীল অভিনয়েৰে দৰ্শকৰ মন জয় কৰে ক্ৰমে মানস হাজৰিকা, বোকাখাতৰ আমন্ত্ৰিত শিল্পী অজন্তা তালুকদাৰ, শিৱৰাজ দেৱনাথ, দিৱস প্ৰতীম দাস, ৰাজিকুল আহমেদ (দুলাল), ৰিণ্টুমনি দাস, ভাস্কৰ নাথ, ৰিচামনি কাকতি, অলকানন্দ কাকতি, চয়নিকা শইকীয়া, জ্যোতিস্মিতা শৰ্মা, শিশু শিল্পীদ্বয় প্ৰতীক্ষা ডেকা আৰু ফাৰিহা ৰাব্বানিয়ে।
নাটখনিৰ সংগীত শংকৰ মহন্তৰ, পোহৰ মিতুল বৰকাকতিৰ, কলা নিৰ্দেশনা ৰাজু দাসৰ আৰু ৰূপসজ্জাত আছে ক্ৰমে নৱনীতা শইকীয়া, ৰোহিনী ডেকা আৰু অজন্তা তালুকদাৰ।
অনুষ্ঠানতে মঞ্চস্থ হৈ যোৱা নাটখনিৰ নাট্যকাৰ জ্যোতিপ্ৰসাদ ভূঞা, পৰিচালক ৰফিকুল হোছেইনৰ লগতে বিশ্ব নাৰীদিৱসৰ সৈতে সংগতি ৰাখি মৰিগাঁও লেখিকা সমাৰোহ সমিতিৰ প্ৰাক্তন উপ সভানেত্ৰী চন্দ্ৰলেখা লাহন, মৰিগাঁও বালিকা উচ্চতৰ মাধ্যমিক বিদ্যালয়ৰ অৱসৰপ্ৰাপ্ত ভাৰপ্ৰাপ্ত অধ্যক্ষা জ্যোতিৰ্ময়ী হাজৰিকাক ভিন্ন সময়ত মৰিগাঁৱৰ শৈক্ষিক, সাংস্কৃতিক আৰু সমাজ জীৱনলৈ আগবঢ়োৱা অৰিহণাৰ বাবে একোখনিকৈ ফুলাম গামোচা , সম্বৰ্দ্ধনা পত্ৰ আৰু একোটিকৈ ফুলৰ তোৰাৰে লালিলাং দ্যা থিয়েটাৰ ৰিদমৰ তৰফৰ পৰা সম্বৰ্দ্ধনা জনোৱা হয়। সমগ্ৰ অনুষ্ঠানটোৰ আঁত ধৰে নাট্যগোষ্ঠীটোৰ সম্পাদক জ্ঞানমোহন ডেকাই।
