ASSAM TIMES POST
বিজেপি চৰকাৰে সমাজৰ সকলো শ্ৰেণী লোকৰ
উন্নয়নত মনোনিবেশ কৰি আহিছে : বিধায়ক ৰূপক শৰ্মা
নগাঁও : নগাঁও সদৰ সমষ্টিৰ অন্তৰ্গত খাগৰিজান উন্নয়ন খন্ডৰ অধীনস্থ লাওগাঁও পঞ্চায়তত প্ৰধানমন্ত্ৰী আৱাসগৃহ গ্ৰামীণ আচঁনিৰ অধীনত নিৰ্মাণ কৰি উলিওৱা ২৫০ টা আৱাসগৃহৰ কালি শুভ উদ্ধোধন কৰে নগাঁও সদৰ সমষ্টিৰ বিধায়ক ৰূপক শৰ্মাই।
বিধায়ক শৰ্মাই একেদিনাই পঞ্চায়তটোৰ ২৫০ টা আৱাসগৃহৰ উদ্ধোধন কৰাৰ লগতে পঞ্চায়তটোৰ চান্দমাৰী গড়কাপ্তানি পথৰ পৰা চহিদুল ইছলামৰ ঘৰ আৰু চান্দমাৰী গড়কাপ্তানি পথৰ পৰা আনিছুৰ মাষ্টৰৰ বাসগৃহ লৈকে ৪০০ মিটাৰ চি চি ব্লক পথৰ নিৰ্মাণ কামৰ উদ্বোধন কৰে ।
ইয়াৰ উপৰি ইটাপাৰা প্ৰাথমিক বিদ্যালয় চৌহদৰ প্ৰবেশ দ্বাৰ সহ পকী দেৱাল আৰু বেলতলি বজাৰ গৃহৰো শুভ উদ্ধোধন কৰে। আৱাসগৃহ ,পথ নিৰ্মাণ , পকী দেৱাল ,বজাৰ গৃহ আদি উদ্ধোধন কৰি দিয়া ভাষণত বিধায়ক শৰ্মাই বিজেপি চৰকাৰে সমাজৰ সকলো শ্ৰেণীলোকৰ উন্নয়নত মনোনিবেশ কৰি আহিছে বুলি মন্তব্য কৰে।
প্ৰধান মন্ত্ৰী আৱাস গৃহ গ্ৰামীণ আচঁনিৰ অধীনত আৱাসগৃহ লাভ কৰা আৰ্থিকভাৱে দুৰ্বল গ্ৰামাঞ্চলৰ হিতাধিকাৰীসকল যথেষ্ট উপকৃত হব বুলি বিধায়ক গৰাকীয়ে আশা প্ৰকাশ কৰে । উদ্ধোধনী অনুষ্ঠানত খাগৰিজান উন্নয়ন খন্ডৰ খন্ড উন্নয়ন বিযয়া শেৱালি চক্ৰৱৰ্তী, ভকতগাঁও জিলা পৰিষদৰ সভাপতি ওৱাজিউল্লা কবিৰ,পঞ্চায়তৰ সভাপতি ৰফিকুল ইচলামৰ লগতে পঞ্চায়তৰ কৰ্মী সকল উপস্থিত থাকে।
