ASSAM TIMES POST
গুৱাহাটী, ১৭ মাৰ্চঃ ৰাজ্যসভাত মিত্ৰতা পিছত এইবাৰ বিটিচি নিৰ্বাচনত যৌথভাৱে আগবাঢ়িব কংগ্ৰেছ-এআইইউডিএফ। বিটিচি পৰিষদীয় ৪০খন আসনৰ ২০খনত প্ৰাৰ্থীত্ব প্ৰদান কৰিব দুই যৌথ শক্তিয়ে। ১৩খনত কংগ্ৰেছ ৭ খনত এআইইউডিএফে প্ৰদান কৰিব প্ৰাৰ্থীত্ব। এইকথা মংগলবাৰে দুয়োটা দলে যুটীয়াভাৱে এক সংবাদমেল সম্বোধন কৰি ঘোষণা কৰে।
মহানগৰী হাটীগাঁও গ্ৰেণ্ড মেজিষ্টি হোটেলত সম্বোধন কৰা সংবাদমেলখনত উপস্থিত থাকি কংগ্ৰেছ নেতা দুৰ্গা দাস বড়োৱে কয়, “বিটিচিত আমাৰ সহায় অবিহনে নহয়, কোনো দলৰে চৰকাৰ নহয়। বিজেপি বাহিৰে যিসকল দলৰ সৈতে আমাৰ মতাদৰ্শ মিলে তেনে সকলো দলক চৰকাৰৰ গঠনত সহযোগ কৰা হ’ব”।
বিজেপিৰ ৰামধেনু সাতোৰং সদৃশ ঐক্য আজি ওলোটা হ’ল। ইতিমধ্যে ৰাভা-তিৱা কাউঞ্চিল শেষ হৈছে। মিছিংসকলৰ ৰনোজ পেগু আজি ৰং সলনি হৈছে। এইবাৰ বিজেপি টাৰ্গেত বিপিএফ বুলি উল্লেখ কৰি বড়োৱে কয়, “বিপিএফক ৰাজনৈতিক ড্ৰেগাৰ মাৰিলে”।
ইফালে, আজি সংবাদমেলতে এআইইউদিএফ দলে ঘোষণা কৰে ছয়জনীয় প্ৰথমখন প্ৰাৰ্থী তালিকা। সেই অনুসৰি ১নং পৰ্বত জুড়াত দিলীপ কুমাৰ ব্ৰহ্ম, ফকীৰাগ্ৰামত আনোৱাৰ হুছেইন, থৈৰীবাডী খলিলোৰ ৰহমান, ধনশ্ৰীত মিথাৰাম বসুমতাৰী, মধৈবাৰীত ৱাচিম আক্রাম চৌধুৰী অন্য এজন ফাৰহাদ হুছেইন। ইফালে, মানস চেফাংত প্ৰাৰ্থী ঘোষণা কৰিবলৈ এতিয়াও বাকী আছে।
আনহাতে, কংগ্ৰেছৰ প্ৰাৰ্থী তালিকা ইতিমধ্যে প্ৰকাশ পাইছে। গুৰুত্বপূৰ্ণ কথা এই যে ক’ৰনা বাবে বিটিচি নিৰ্বাচনত প্ৰভাৱ পৰিব বুলি উল্লেখ কৰি দুৰ্গা দাস বড়োৱে কয়, “ৰাজ্য চৰকাৰে বিটিছি জনতা প্ৰতি দায়িত্ব ল’ব লাগে। যদি নিৰ্বাচন হয় আমি সহযোগ কৰিম কিন্তু কৰ’না বাবে যদি বিটিচিৰ জনসাধাৰণৰ প্ৰতি ভাবুকি আহে তেন্তে তাৰ বাবে দায়ী হ’ব চৰকাৰ”।
আনহাতে, দুয়োটা দলে চৰকাৰ গঠনৰ অংশীদাৰ হ’লে বড়ো-অবড়ো মাজত বিটিআৰে সৃষ্টি কৰা সংঘাত নিৰ্মূল কৰিম। বিভাজনৰ ৰাজনীতি শেষ কৰা হ’ব।
উল্লেখ যে, সংবাদমেলত উপস্থিত আছিল কংগ্ৰেছৰ ৱাজেদ আলি চৌধুৰী, এআইইউডিএফৰ আমিনুল ইছলাম, বাচিল চাহাব প্ৰমুখ্যে দুয়োটা দলৰ বহুকেইজন নেতা।
