ASSAM TIMES POST
নিউজ ডেস্ক
ভাৰতত প্ৰথমবাৰৰ বাবে মৃত্যুৰ ওচৰত হাৰ মানিলে এগৰাকী ক’ৰ’ণা-যোদ্ধাই। চাৰি দিন পূর্বে মধ্য প্ৰদেশৰ ইন্দোৰত covid-19ৰ পৰীক্ষাত ধনাত্মক ফলাফল ওলাইছিল ডাক্তৰ শত্ৰুঘ্ন পঞ্জৱানীৰ। আজি মৃত্যুৰ কোলাত ঢলি পৰে ৬২ বছৰীয়া এইগৰাকী জেনেৰেল ফিজিছিয়ান। ভাৰতত ক’ৰ’ণা ভাইৰাছ জনিত কাৰণত এয়াই প্ৰথম কোনো চিকিৎসকৰ মৃত্যু।
ইন্দোৰৰ অৰবিন্দ মেডিকেল কলেজত ভর্তি আছিল তেওঁ। আজি পুৱা তাতেই তেওঁ শেষ নিশ্বাস ত্যাগ কৰে। উল্লেখযোগ্য যে তেওঁৰ পত্নী আৰু তিনি সন্তান থাকে অষ্ট্ৰেলিয়াত। লকডাউনৰ বাবে এতিয়া স্বামী-পিতৃক শেষবাৰৰ বাবে দেখা কৰাও তেওঁলোকৰ বাবে সম্ভৱ নহয়।
তেওঁৰ এগৰাকী সহকৰ্মী ডি নাটবৰে জনোৱা মতে, ডাক্তৰ পঞ্জাৱানি প্রত্যক্ষভাৱে ক’ৰ’ণা আক্ৰান্ত ৰোগীৰ চিকিৎসাত জড়িত নাছিল। কিন্তু তেওঁৰ চেম্বাৰলৈ অহা ৰোগীসকলৰ বেছিভাগেই স্থানীয় বস্তি অঞ্চলৰ নিম্নবিত্ত লোক। তেওঁ প্ৰায় বিনামূলীয়াকৈয়ে তেওঁলোকৰ চিকিৎসা কৰিছিল।
এতিয়া সেই ৰোগীসকলৰ কাৰোবাৰ পৰাই তেওঁৰ দেহলৈ ক’ৰ’ণা সংক্ৰমণৰ সন্দেহ কৰা হৈছে। সেয়েহে তেওঁৰ গাত covid-19 ধৰা পৰাৰ পিছতেই এই বস্তিত ক’ৰ’ণা আক্ৰান্তৰ সন্ধান আৰম্ভ হৈছে।
