ASSAM TIMES POST
অজন্তা তালুকদাৰ, বোকাখাত
লক-ডাউনৰ মাজতে বোকাখাতৰ কৃষকৰ মনলৈ প্ৰকৃতিয়ে আনিলে উছাহ। বোকাখাতত বিস্তীৰ্ণ এলেকা জুৰি এতিয়া বড়োখেতিৰ সময়। প্ৰাক-বৰ্ষাকালীন ৰুক্ষ কালচোৱাত বড়োখেতিত দিবলৈ কৃষকৰ প্ৰয়োজন হৈছিল প্ৰচুৰ পৰিমাণে পানী।
কিন্তু এইবেলি বসন্তত পৰ্যাপ্ত বৰষুণৰ অভাৱ আৰু সম্প্ৰতি দেশত লক-ডাউন চলি থকাৰ বাবে বোকাখাত মহকুমাৰ একাংশ কৃষকে সময়মতে পাম্প চলাবলৈ প্ৰয়োজনীয় ইন্ধনৰ লগতে সাৰ, কীটনাশক আদি খেতিৰ বাবে প্ৰয়োজনীয় আহিলা সময়মতে সংগ্ৰহ কৰি ল’ব নোৱাৰি যথেষ্ট অসুবিধাৰ সন্মুখীন হৈছিল। এনে সময়তে প্ৰকৃতিয়ে যেন চকু মেলি চালে এইসকল কৃষকলৈ।
যোৱা নিশাৰ লগতে পুৱাৰে পৰা দি থকা বৰষুণজাকে পথাৰত বড়োখেতিৰ বাবে প্ৰয়োজনীয় পানী যোগান ধৰি কৃষকক সকাহ দিলে। পাম্প নচলোৱাকৈ বড়োখেতিৰ বাবে পানী যোগান সম্ভৱ হ’ল। সম্প্ৰতি কৰ’ণা প্ৰতিৰোধৰ বাবে দেশ জুৰি চলি থকা লক-ডাউনৰ প্ৰভাৱ যেন প্ৰকৃতিৰ ওপৰতো পৰিছেহি। বিগত সময়তকৈ ফাগুন-চ’ত মহীয়া প্ৰকৃতি ৰুক্ষ হ’ল তুলনামূলকভাবে। এইবেলি বসন্তও ৰুক্ষ প্ৰকৃতিৰ প্ৰকোপত চেগা চোৰোকা ৰূপতহে দেখা দিলে।
তাতে ব’হাগৰ আৰম্ভণিতে হৈ যোৱা শুকান ধূলি ধুমুহাত বসন্তৰ সেউজ সম্ভাৰ ধূলিত পোত গ’ল। সেয়েহে যোৱা নিশাৰ বৰষুণজাকে যেন নোৱাই ধুৱাই ন ৰূপত সজাই তুলিলে সেউজ প্ৰকৃতিক। সেউজ হৈ ন ৰূপত ধৰা দিছে পথাৰ। বোকাখাতৰ কৃষকে এতিয়া এইজাক বৰষুণৰ পৰা সকাহ পোৱাৰ লগতে উছাহেৰে সৃষ্টিৰ নতুন সপোন দেখিবলৈ আৰম্ভ কৰিছে সেউজ পথাৰক লৈ।
