ASSAM TIMES POST
কলকাতাঃ ভাৰতৰ উচ্চতম ন্যায়ালয়ৰ সেউজ সংকেতৰ ভিত্তিত অসমৰ ৬টা ডিটেনচন কেম্পত বন্দী হৈ থকা ৩৩৫ জন বিদেশীক জামিনত মুক্তি প্ৰদান কৰাৰ প্ৰক্ৰিয়া আৰম্ভ কৰিছে অসম চৰকাৰে। এই সম্পৰ্কত মঙলবাৰে অসম চৰকাৰে এখন গেজেট অধিসূচনা প্ৰকাশ কৰে। ইয়াত কয় যে যিসকল বিদেশীয়ে ডিটেনচন কেম্পত ৩ বছৰতকৈ অধিক সময় কটাইছে, তেওঁলোকক জামিন প্ৰদান কৰা হ’ব। কিন্তু ইয়াত থাকিব চৰ্ত। চৰ্ত অনুসৰি, জামিন লাভ কৰা প্ৰতিজন বিদেশীৰ বিপৰীতে থাকিব দুজন ভাৰতীয় জামিনদাৰ আৰু ইয়াৰ ব’ণ্ড হ’ব ১ লাখ টকা।
সমান্তৰালভাৱে মুক্তিৰ পূৰ্বে তেওঁলোকৰ বাঅ’মেট্ৰিক তথ্য সংগ্ৰহ কৰা হ’ব। নিৰ্দিষ্ট ঠিকনা মতে তেওঁলোকক থাকিবলৈ দিয়া হ’ব। আকৌ প্ৰতি সপ্তাহতেই নিৰ্দিষ্ট বিদেশী ন্যায়াধীকৰণত হাজিৰ হ’ব লাগিব এওঁলোক। যদি সুনিৰ্দিষ্ট ঠিকনা সলনি কৰিব খুজে, তেতিয়া সংশ্লিষ্ট কৰ্তৃপক্ষক অৱগত কৰিব লাগিব। এই সন্দৰ্ভত সংশ্লিষ্ট এলেকাৰ আৰক্ষীৰ মুৰব্বীয়ে তিনিমাহৰ মূৰে মূৰে বিদেশী ন্যায়াধীকৰণক প্ৰতিবেদন দাখিল কৰিব লাগিব।
এই সন্দৰ্ভত অসম নাগৰিক অধিকাৰ ৰক্ষা সমিতিৰ সাধাৰণ সম্পাদক সাধন পুৰকায়স্থই কয় যে ডিটেনচন কেম্পত ৫ বছৰৰ অধিক সময় বন্দী হৈ থকা বিদেশীসকলো আছে। তেওঁলোকক চৰ্তসাপেক্ষে জামিন প্ৰদান হ’ব মানৱ অধিকাৰৰ পৰিপন্থী। সেয়ে এনে বন্দীসকলক বিনাচৰ্তে মুক্তি দিব লাগে বুলি তেওঁ কয়।
