ASSAM TIMES POST
নগাঁও: বিগত ২৪ মাৰ্চৰ পৰা অব্যাহত থকা লকডাউনৰ নীতি নিৰ্দেশনাৰ বাবে সমাজৰ একাংশ লোক কৰ্মহীন হৈ পৰে বিশেষকৈ লকডাউন আৰম্ভ হোৱা সময়ৰ পৰা ধোবা, কে’ৰচিন তেলৰ হ’কাৰ,মুচিকে ধৰি সাধাৰণ শ্ৰেণীৰ শ্ৰমিক সকলৰ জীৱিকাৰ পথ প্ৰায় বন্ধ হৈ পৰে।
লকডাউনৰ বাবে এই শ্ৰমিক সকলৰ উপাৰ্জনৰ পথ বন্ধহৈ পৰাত এওঁলোকৰ জীৱন নিৰ্বাহৰ ক্ষেত্ৰত হাহাকাৰ অৱস্থাৰ সৃষ্টি হয় । আনহাতে বিভিন্ন জনে ব্যক্তিগত ভাবে এই সকল শ্ৰমজীৱি লোকক সহায়ৰ হাত আগবঢ়ায় যদিও এওঁলোকৰ বহুতে চৰকাৰী সাহাৰ্য লাভ কৰা নাই। এই সকল ধোবা ,কে’ৰচিন তেলৰ হ’কাৰ,মুচি আদি ব্যৱসায়ৰ লগত জড়িত সাধাৰণ শ্ৰেণীৰ ব্যৱসায়ী সকলৰ কাষত উপস্থিত হৈ কিছু সহায়ৰ হাত আগবঢ়ালে নগাঁও সদৰ সমষ্টিৰ বিধায়ক ৰূপক শৰ্মাই।
আজি নগাঁও চৰকাৰী উচ্চতৰ মাধ্যমিক বালিকা বিদ্যালয়ত দুই শতাধিক শ্ৰমিক শ্ৰেণী লোকক কিছু অত্যাবশ্যকীয় খাদ্য সামগ্ৰী বিতৰন কৰে বিধায়ক ৰূপক শৰ্মাই। সামাজিক দুৰত্ব বৰ্তাই শ্ৰমিক শ্ৰেণী লোকক অত্যাবশ্যকীয় খাদ্য সামগ্ৰী বিতৰণ কৰি বিধায়ক শৰ্মাই সংবাদ মাধ্যমৰ আগত কয় যে লকডাউনৰ বাবে সাধাৰণ ব্যৱসায়ৰ লগত জৰিত শ্ৰমিক শ্ৰেণী লোকসকলৰ কষ্টৰ সন্মুখীন হবলগা হৈছে ।
জীৱন জীৱিকাৰ ক্ষেত্ৰত বহু সমস্যাৰ সৃষ্টি হৈছে। এই সংকটৰ সময়ত আমি তেওঁলোকক কিছু সকাহ দিয়াৰ প্ৰয়াস কৰিছো । এই লোক সকলক পাৰ্যমানে সহায়ৰ হাত আগবঢ়াবলৈও বিধায়ক গৰাকীয়ে সকলোকে আহবান জনায় । বিধায়ক গৰাকীৰ এনে পদক্ষেপক সকলোৱে প্ৰশংসা কৰে।
