ASSAM TIMES POST
অজন্তা তালুকদাৰ:
বিষাক্ত সৰ্প দংশনত বোকাখাত মহকুমাৰ দ্বিতীয় পৰঙনীয়া নেপালীখুঁটিৰ বুলি শইকীয়া(৩৫) নামৰ মহিলা গৰাকীৰ আজি পুৱাৰ ভাগতে শোকাবহভাৱে আকস্মিক মৃত্যু হয়।পৰিয়ালৰ লোকৰ পৰা জানিবলৈ পোৱা মতে বুলি শইকীয়াৰ ঘৰৰ কাঠেৰে নিৰ্মিত পোহনীয়া পাৰ চৰাইৰ বাহত এদাল বিষাক্ত সাপ সোমাই পোহনীয়া পাৰ চৰাই এজনীক দংশন কৰাত চৰাইজনীয়ে যন্ত্ৰণাত ধৰফৰাই উঠি চৰাইজনী ততালিকে মৃত্যু মুখত পৰে।
পাৰ চৰাইৰ ধৰফৰণি শুনি উৎসুক হৈ বুলি শইকীয়াই পাৰৰ বাহটোৰ ভিতৰলৈ হাত ভৰাই চৰাইজনীৰ কি হৈছে চাবলৈ বিচাৰোতেই বাহটোত ইতিমধ্যে সোমাই থকা সাপদালে ততালিকে তেওঁৰ সোঁহাতত দংশন কৰে।
মহিলা গৰাকীৰ তীক্ষ্ণ আৰ্তনাদ শুনি পৰিয়ালৰ আৰু নিকতবৰ্তী আন লোক আহি তৎক্ষনাৎ তেওঁক বোকাখাত শ্বহীদ কমলা মিৰি অসামৰিক চিকিৎসালয়লৈ চিকিৎসাৰ বাবে আনে যদিও চিকিৎসা আৰম্ভ কৰিবলৈ নৌ পাওঁতেই মহিলা গৰাকীৰ মৃত্যু ঘটে বুলি সেই সময়ত দায়িত্বত থকা মহকুমা চিকিৎসা আৰু স্বাস্থ্য বিষয়া ডাঃ অজিত দলৈৰ পৰা জানিব পৰা গৈছে। সৰ্প দংশনৰ সময়ত বুলি শইকীয়াৰ স্বামী ধৰ্মেশ্বৰ শইকীয়া ঘৰৰ পৰা দূৰৈৰ এখন চাহ বাগিছাত নিজৰ কৰ্তব্য স্থানত কৰ্মৰত আছিল।
উল্লেখ্য যে চিকিৎসালয়ত চিকিৎসকে বুলি শইকীয়াক মৃত ঘোষণা কৰাৰ পাছতো পৰিয়ালৰ লোকে মৃতা শইকীয়াৰ শৱ দাহ-সংস্কাৰ কৰিবলৈ নিয়াৰ পৰিবৰ্তে বেজ আনি জৰা-ফুকা কৰি মহিলাগৰাকী পুণৰ জী উঠাৰ আশাত বহু সময় নিজ গৃহ প্ৰাংগনতে ৰাখি থোৱাৰ কথাই একাংশ সচেতন ব্যক্তিক সচকিত কৰি তোলে।বাৰিষা এনে সৰ্প দংশনৰ দুৰ্ঘটনাৰ অধিক সম্ভাৱনা।
সেয়েহে চিকিৎসালয়খনত এই বিষয়ে জৰুৰীকালীন চিকিৎসা সন্দৰ্ভত জানিব বিচৰাত বোকাখাত শ্বহীদ কমলা মিৰি অসামৰিক চিকিৎসালয়ৰ ভাৰপ্ৰাপ্ত অধীক্ষক ডাঃ মিলন কুমাৰ লস্কৰে জনায় যে সাধাৰণতে বোকাখাত অঞ্চলত ১ বা ২ শতাংশ লোকহে এনে বিষাক্ত সাপৰ দংশনৰ চিকিৎসা ল’বলৈ আহে। এনে অহা ৰোগীৰ সংখ্যা তেনেই বিৰল।
অধীক্ষক গৰাকীয়ে আৰু জনায় যে হস্পিটেলখনত বিষাক্ত সৰ্প দংশনৰ চিকিৎসাৰ বাবে প্ৰয়োজনীয় দৰৱ “এণ্টি-স্নেক ভেনম” মজুত আছে যদিও এনে দৰৱৰ ব্যৱহাৰৰ বাবে বিশেষজ্ঞ চিকিৎসক আৰু আই চি ইউ হস্পিটেলখনত বৰ্তমান উপলব্ধ নহয়। তেনে ক্ষেত্ৰত কাৎসিৎ অহা এনে ৰোগীক প্ৰাথমিক চিকিৎসা প্ৰদান কৰি নিকতবৰ্তী আন উন্নত চিকিৎসালয়লৈ প্ৰেৰণ কৰা হয়।
তাৰ বাহিৰে আন কম বিষযুক্ত সাধাৰণ সৰ্পৰ দংশনৰ চিকিৎসাৰ বাবে হস্পিটেলখনলৈ অহা দুই এক ৰোগীক এই চিকিৎসালয়তে উপলব্ধ সাধাৰণ চিকিৎসা পদ্ধতিৰে আৰোগ্য কৰি তোলা হয়।এগৰাকী জনপ্ৰিয়, সৰল আৰু তেনেই স্বল্পবয়সীয়া মহিলাৰ এনে আকস্মিক মৃত্যুত অঞ্চলটোত শোকৰ ছাঁ পৰিছে। বুলি শইকীয়াই স্বামী ধৰ্মেশ্বৰ শইকীয়াৰ লগতে দুই পুত্ৰ কণ্যা, ভালে সংখ্যক আত্মীয়-স্বজনৰ লগতে বহু সংখ্যক গুণমুগ্ধক এৰি থৈ গৈছে।
