ASSAM TIMES POST
তৃপ্তি সোণোৱালৰ ‘চোনোৱাল কছাৰী ট্ৰাইব’ৰ শুভ-উন্মোচন
অজন্তা তালুকদাৰ
বোকাখাত : বোকাখাতত অভিলাষ প্ৰকাশনৰ উদ্যোগত আজি এক ব্যতিক্ৰমী গ্ৰন্থ উন্মোচনী অনুষ্ঠান অনুষ্ঠিত হৈ যায়। বোকাখাত জেডিএচজি মহাবিদ্যালয়ৰ অসমীয়া বিভাগৰ মূৰব্বী অধ্যাপিকা ড° ৰুবী বৰাৰ একমাত্ৰ সন্তান অভিলাষ বৰাৰ সোঁৱৰণত প্ৰতিটো জন্মদিনত ‘অভিলাষ প্ৰকাশন’ৰ উদ্যোগত বোকাখাতত ১৫ জুনত বৰ্ণাধ্য কাৰ্যসূচীৰে অনুষ্ঠিত হৈ আহিছে এক গাম্ভীৰ্যপূৰ্ণ অনুষ্ঠান। সম্প্ৰতি দেশত চলি থকা কৰ’ণা মহামাৰীৰ সংক্ৰমণৰ প্ৰতি লক্ষ্য ৰাখি এই বৰ্ষ মুষ্টিমেয় আমন্ত্ৰিত বিশিষ্ট ব্যক্তিৰ উপস্থিতিতহে অনুষ্ঠিত হোৱা দেখা গ’ল এই গ্ৰন্থ উন্মোচনী অনুষ্ঠান। আজিও অভিলাষৰ ২৬ সংখ্যক জন্মদিন উপলক্ষ্যে ‘অভিলাষ প্ৰকাশন’ৰ স্বত্বাধিকাৰ তথা অসমৰ আগশাৰীৰ প্ৰৱন্ধকাৰ, গল্পকাৰ ড° ৰুবী বৰাৰ বোকাখাতৰ ম’হমাইকী গাঁৱৰ নিজা বাসগৃহত অনুষ্ঠিত হয় অনুষ্ঠানটি। অনুষ্ঠানৰ আৰম্ভণিতে বোকাখাত জেডিএচজি মহাবিদ্যালয়ৰ অৱসৰপ্ৰাপ্ত ভাৰপ্ৰাপ্ত অধ্যক্ষ তথা জ্যেষ্ঠ সাংবাদিক ড° বাবুলাল ম’ৰে বন্তি প্ৰজ্বলন কৰে।
ইয়াৰ পাছতেই বিশিষ্ট কবি অজিত গগৈয়ে উদীয়মান যুৱ লেখিকা তৃপ্তি সোণোৱালৰ ‘চোনোৱাল কছাৰী ট্ৰাইব, এন এথনিক পাৰ্ট অৱ নৰ্থ ইষ্ট’ নামৰ ইংৰাজী ভাষাত লিখা গ্ৰন্থখনিৰ শুভ উন্মোচন কৰে। সাংস্কৃতিক কৰ্মী ৰূপজ্যোতি ভড়ালীয়ে আঁট ধৰা অনুষ্ঠানত গ্ৰন্থ উন্মোচন কৰি শুভেচ্ছামূলক বক্তব্য প্ৰদান কৰে উন্মোচক অজিত গগৈয়ে। অনুষ্ঠানত আৰু বক্তব্য প্ৰদান কৰে ক্ৰমে ড° বাবুলাল ম’ৰ, উন্মোচিত গ্ৰন্থৰ লেখিকা তৃপ্তি সোনোৱাল, গুৱাহাটী অনাতাঁৰ কেন্দ্ৰৰ পৰিচালন কাৰ্যবাহী বিষয়া তথা বিশিষ্ট নাট্যকাৰ ঋতুপৰ্ণ দাস, বোকাখাত জে ডি এচ জি মহাবিদ্যালয়ৰ অসমীয়া বিভাগৰ অধ্যাপক ড° অৰুণ বৰা, বিশিষ্ট অতিথি তথা উন্মোচিত গ্ৰন্থৰ লেখিকাৰ পিতৃ ক্ৰমে নিন সোণোৱাল আৰু ড° বৰাৰ আত্মীয় তথা অতিথি ক্ৰমে জীৱেশ্বৰ বৰা, শিক্ষয়িত্ৰী ৰুমী বৰা আৰু বিশিষ্ট ক্ৰীড়া সংগঠক মনোজ বৰা, কবি-সাংবাদিক অজন্তা তালুকদাৰ, বিশিষ্ট ভাস্কৰ্য শিল্পী পাপু ঘোষ, শিক্ষয়িত্ৰী তথা কবি-লেখিকাদ্বয় ক্ৰমে গীতিৰেখা দত্ত আৰু বন্দিতা পাথৰি আদিয়ে। অনুষ্ঠানত ড° ৰুবী বৰাৰ মাতৃ মাকন বৰা, অসম ফাইন আৰ্টচ্ একাডেমীৰ হৈ দিবাকৰ শৰ্মা, আত্মীয় ৰীতা কলিতা বৰা, অভিনেতা-পৰিচালক তৰুণ তীৰ্থ শইকীয়া, স্থানীয় অতিথি জয়ন্ত বড়িৰ লগতে ড° বৰাৰ কিছুসংখ্যক আত্মীয় স্বজন আৰু স্থানীয় গণ্যমান্য ব্যক্তি উপস্থিত থাকে।
উল্লেখ্য যে বিগত ২০১১ বৰ্ষত ড° বৰাৰ একমাত্ৰ সন্তান তথা উচ্চতৰ মাধ্যমিকৰ ছাত্ৰ অভিলাষ বৰাৰ আকস্মিক অসুস্থতাত মৃত্যু হয় আৰু অভিলাষৰ স্মৃতি ধৰি ৰখাৰ অৰ্থে আৰু সমাজৰ উত্তৰ পুৰুষক উত্তৰণৰ এখন মঞ্চ প্ৰদান কৰাৰ অৰ্থে লেখিকা গৰাকীয়ে সমূহ শুভাকাংক্ষীৰ সহযোগত ২০১৩ বৰ্ষত জন্ম দিয়ে “অভিলাষ প্ৰকাশন”ৰ।
বিগত বৰ্ষসমূহত অভিলাষ প্ৰকাশনে অসমৰ শংকৰী সংস্কৃতিৰ একনিষ্ঠ গৱেষক, শংকৰদেৱ বঁটা প্ৰাপক তথা ডিব্ৰুগড় বিশ্ববিদ্যালয়ৰ অসমীয়া বিভাগৰ অৱসৰপ্ৰাপ্ত মূৰব্বী অধ্যাপক প্ৰয়াত ড° কেশৱানন্দ দেৱগোস্বামী সংকলিত চৈধ্যখন চৰিত বংশাৱলীৰ একত্ৰ সংকলন ‘ভকতমালা আৰু চৰিত বংশাৱলী’ আৰু শিশু সাহিত্য ‘ৰমাহঁতৰ গাঁৱৰ কথা’, প্ৰয়াত কবি মৃদুল বৰুৱাৰ কাব্য সংকলন ‘জুই ফুলৰ আউল’, কবি-ঔপন্যাসিক অজিত গগৈৰ তিনিখন উপন্যাসৰ একত্ৰ সংকলন ‘মায়া শয্যা’, ড° অৰুণ বৰাৰ ‘সাহিত্য-শিল্পৰ লেছেৰি’, ড° ৰুবী বৰাৰ শিশু সাহিত্য ক্ৰমে ‘জয়মতী’ আৰু ‘বকুলপুৰৰ বকুল কথা’, যুৱ সাংবাদিক ধ্ৰুৱজ্যোতি সাহাৰ ‘কাজিৰঙাৰ গাইড’, কবি ড° দিপালী বৰাৰ অনুবাদ কবিতাৰ সংকলন ‘ভিনৰঙী জীৱনৰ সুৰ’, বোকাখাতৰ ভালেকেইজন কবিৰ কবিতাৰ পটভূমিত ৰচিত গল্প সংকলন ঋতুপৰ্ণ দাসৰ সম্পাদনাৰে ‘কাব্যগল্প’, অধ্যাপক তথা ক্ৰীড়াবীদ সুবোধ বৰাৰ খেল বিষয়ক গ্ৰন্থ ‘বিষয়ঃ খেল, খেলুৱৈ, ক্ৰীড়া পৰিৱেশ ইত্যাদি’ৰ লগতে শেহতীয়াকৈ তৃপ্তী সোণোৱালৰ ইংৰাজী ভাষাত লিখা আজি উন্মোচিত গ্ৰন্থখনিকে ধৰি এই পৰ্যন্ত ১৫ খনকৈ মূল্যবান গ্ৰন্থ প্ৰকাশ কৰিছে।
তদুপৰি ২০১৭ বৰ্ষৰ পৰা বোকাখাতত এই বিশেষ তাৰিখে প্ৰায় দুই সহস্ৰাধিক শিশুৰ মাজত অনুষ্ঠিত হৈ আহিছে ‘অভিলাষ প্ৰকাশন’ৰ উদ্যোগত আৰু ‘আচাম ফাইন আৰ্টচ একাডেমী’ৰ সহযোগত গোলাঘাট জিলা ভিত্তিত বিশেষভাৱে প্ৰচাৰ লাভ কৰা চিত্ৰাংকন প্ৰতিযোগিতা ‘ৰঙৰ পৃথিৱী’। ড° বৰাৰ এই প্ৰচেষ্টা সম্প্ৰতি ব্যক্তি জীৱনৰ পৰা সমাজ জীৱনলৈ পৰ্যবসিত হোৱা বুলি আৰু বিগত বৰ্ষ সমূহত ‘অভিলাষ প্ৰকাশন’ৰ উদ্যোগত সম্পন্ন হোৱা বিবিধ সৃষ্টিশীল আৰু কল্যাণমূলক কাৰ্যসূচীয়ে উত্তৰ পুৰুষলৈ সমাজ উত্তৰণৰ এক উজ্জ্বল বাট কাটি দিছে বুলি আজিৰ অনুষ্ঠানত উপস্থিত ব্যক্তি সকলে মত পোষণ কৰে।
