ASSAM TIMES POST
নিউজ ডেস্ক:
দুষ্কৃতিকাৰী ধৰিবলৈ গৈ হোৱা এনকাউণ্টাৰত এজন ডেপুটি পুলিচ চুপাৰ, তিনিজন ছাব ইনস্পেক্টৰ, চাৰিজন কনস্টেবলসহ মুঠ আঠজন আৰক্ষীৰ মৃত্যু হৈছে কানপুৰত। আন চাৰিজন আহত অৱস্থাত হস্পিটেলত চিকিৎসাধীন হ’বলগা হৈছে। আনহাতে, আৰক্ষীৰ গুলিত মৃত্যু হৈছে তিনিজন দুষ্কৃতিকাৰীৰো।
বৃহস্পতিবাৰে মাজনিশা এই ঘটনা ঘটিছে উত্তৰ প্রদেশৰ কানপুৰৰ বিকাৰু গাঁৱত। আৰক্ষী লোক কেইজনৰ মৃত্যুত শোক প্রকাশ কৰিছে উত্তৰ প্রদেশৰ মুখ্যমন্ত্রী যোগী আদিত্যনাথে।আৰক্ষী সূত্রত প্ৰকাশ, বিকাশ ডুবে নামৰ এক কুখ্যাত দুষ্কৃতিকাৰীক ধৰিবলৈ বিকাৰুলৈ গৈছিল আৰক্ষীৰ দলটো। বিকাশৰ নামত ৬০টাৰো অধিক গোচৰ আছে। সম্প্রতি এক হত্যাৰ গোচৰত নাম জড়িত হৈ পৰাত তাক ধৰিবলৈ যায় আৰক্ষী।
কিন্তু গাঁৱত প্ৰৱেশৰ পথ আছিল বন্ধ। জেচিবি ৰাখি পথ বন্ধ কৰি দিয়া হৈছিল। ফলত গাড়ীৰ পৰা নামি আৰক্ষী গাঁৱত প্ৰৱেশ কৰিব লওঁতেই ধাৰাসাৰ গুলিবৰ্ষণ আৰম্ভ কৰে দুষ্কৃতিকাৰীৰ দলটোৱে। আৰক্ষীয়ে জনোৱা মতে, ঘৰৰ ছাদত উঠি তিনি দিশৰ পৰা আৰক্ষীৰ ওপৰত গুলি চলোৱা হয়। তাতেই মৃত্যু হয় আঠগৰাকী আৰক্ষীৰ। আৰক্ষীৰ প্ৰত্যুত্তৰত বিকাশৰ তিনি সঙ্গীৰ মৃত্যু হ’লেও বিকাশক ধৰিব নোৱাৰে আৰক্ষীয়ে।
বিকাশৰ বিৰুদ্ধে অভিযানৰ খবৰ পায়ে পৰিকল্পনা কৰিয়েই এই দুষ্কৃতিকাৰীয়ে আক্ৰমণ চলাইছিল বুলি দাবী আৰক্ষী বিষয়াৰ। কানপুৰৰ এডিজি জেএন সিঙে জনোৱা মতে, পৰিস্থিতিৰ মোকাবিলাত কনৌজ আৰু কানপুৰৰ দেহাতৰ পৰা বিশাল আৰক্ষী বাহিনী অনা হৈছে।ইফালে নিহত আৰক্ষীৰ পৰিয়ালৰ প্রতি সমবেদনা ব্যক্ত কৰিছে উত্তৰ প্রদেশৰ মুখ্যমন্ত্রী যোগী আদিত্যনাথে। ঘটনাৰ প্ৰতিবেদনো বিচাৰিছে তেওঁ। দুষ্কৃতিকাৰীৰ বিৰুদ্ধে কঠোৰ ব্যৱস্থা লোৱাৰ বাবে ডিজিপি এইচচি অবস্তীক নির্দেশ দিছে আদিত্যনাথে।
