বাস্তৱ : মাতৃ স্নেহৰ আন এক উদাহৰণ এজনী হাতী

পথত থকা বাধাক অতিক্ৰম কৰিবলৈ এটা হাতী পোৱালিৰ বাৰম্বাৰ চেষ্টা৷ এই বাধাক জয় কৰাবলৈ পোৱালিটোৰ মাকে যি সহায় কৰিলে তাৰ ভিডিঅ’টো সম্প্ৰতি ছচিয়েল মিডিয়াত বিভিন্ন মহলৰ মাজত আলোচ্যৰ বিষয় হৈ পৰিছে৷ হাতী পোৱালিটোৱে পথৰ কাষত থকা যানবাহন চলাচলত বিপদত নপৰিবৰ বাবে দিয়া সৰু পকী বেৰা যাক প্ৰতিবন্ধক ৰূপে ৰখা হয়, সেইখন পাৰ হ’বৰ বাবে যত্ন কৰে৷ মন কৰিব লগা যে মাকৰ সৈতে পাৰ হ’বলৈ লোৱা ঠাইখন হ’ল এনিমেল কৰিডৰ৷

হাতীৰ সৈতে পোৱালিটো সেই স্থান পোৱাৰ পাছতে আহিল সমস্যা৷ মাক হাতীজনে হেলাৰঙে পাৰ হ’ল যদিও প্ৰতিবন্ধক হ’ল পোৱালিটোৰ বাবে৷ পোৱালিটোৱে যত্ন কৰি থকাৰ সময়ত মাক আগবাঢ়ি গৈছিল৷ কিন্তু নিজৰ সন্তানক কাষত নাপায় ঘুৰি চালে৷ দেখিলে পোৱালিটোৱে প্ৰতিবন্ধক অতিক্ৰম কৰিব পৰা নাই৷

তেতিয়া সন্তান স্নেহত বন্দী মাক পোৱালিটোৰ কাষলৈ আহিল৷ প্ৰথমে পোৱালিটোক দেখুৱালে পাৰ হোৱাৰ নিয়ম৷ কিন্তু উপায় নাই৷ সৰু পোৱালিটোৱে নোৱাৰে৷ লগে লগে মাকে পোৱালিটোক শূৰডালেৰে পাছফানৰ পৰা আকোঁৱালি লৈ পথৰ প্ৰতিবন্ধকতা অতিক্ৰম কৰালে৷

তাৰ লগে লগে পোৱালিটোৱে পুনৰ মাকৰ লগত অৰণ্যলৈ আগবাঢ়ি যাবলৈ সক্ষম হ’ল৷ এই সম্পূৰ্ণ দৃশ্য ভিডিঅ’ ৰূপে ৰাখি থলে ভাৰতীয় বন সেৱা (আইএফএছ) বিষয়া সুধা ৰামেনে৷ বিষয়াজনৰ এই ভিডিঅ’ ছচিয়েল মিডিয়াত প্ৰচাৰ হোৱাত বিভিন্নজনৰ বাবে আকৰ্ষণৰ বিষয় হৈ পৰিছে৷