ষ্টাফ ৰিপ’ৰ্টাৰ:
শনিবাৰে মুখ্যমন্ত্ৰী সৰ্বানন্দ সোণোৱালক সাক্ষাৎ কৰাক লৈ নৱপ্ৰজন্মৰ হাৰ্টথ শিল্পী জুবিন গাৰ্গৰ স্পষ্টীকৰণ।’আমাৰ অসম’ কাকতত শিল্পী গৰাকীয়ে এই সন্দৰ্ভত প্ৰকাশ কৰিছে নিজৰ প্ৰতিক্ৰিয়া।
“বহুদিনৰ এটা পৰিকল্পনা হাতত লৈ আমি মুখ্যমন্ত্ৰী ওচৰলৈ গৈছিলোঁ।অসমৰ থলুৱা বস্তুবোৰ লৈ এটা অৰ্থনৈতিক আন্দোলনৰ সপোন মই বহু দিনৰ পৰাই দেখি আহিছো।তাৰ বাবে সাংবাদিক মনোৰম গগৈ, মনালিছাহতৰ থলগিৰি’ৰ আৰু সীতাজখলা সৈতে জড়িত হৈ আছোঁ।আমাৰ নিজৰ গাখীৰ আছে যেতিয়া, বেলেগৰ পৰা কিয় আনিব লাগে? এইটো তেনেকুৱা এটাই পৰিকল্পনা-কেৱল এইটো বহলকৈ ভাবিছোঁ।সময়ত সকলো গম পাব।পৰিকল্পনা সফল কৰিব পাৰিলে আমাৰ বহু লৰা-ছোৱালী সংস্থাপন পাব।দুপইচা উপাৰ্জন কৰিব পাৰিব।তাৰ বাবে মুখ্যমন্ত্ৰীক লগ ধৰিব গৈছিলো”-জুবিনে এইদৰে প্ৰকাশ কৰিছে।
আমি ভবা কামটো সফল কৰিবলৈ ৰাইজৰ লগতে চৰকাৰৰো সহায় লাগিব বুলি প্ৰকাশ কৰি শিল্পী জুবিনে উল্লেখ কৰিছে এইদৰে- সৰ্বাদাক মই বানপানীৰ কথা কিনো ভাবিছে সেই সন্দৰ্ভত প্ৰশ্ন কৰিছিলোঁ।বাহিৰৰ পৰা বিশেষজ্ঞ টিম আনিম বুলি কৈছে।ক’ৰোনা আৰু লকডাউনে বিধ্বস্ত কৰা শিল্পী আৰু কলা-কৌশলী বাবে কিবা কৰিবলৈ আকৌ কৈ আহিছোঁ”।
অসম আৰু অসমীয়া স্বাৰ্থত দিছপুৰে আগবঢ়াব লাগিব সহায়ৰ হাত।সকলোতে ৰাজনীতি নহব।মাটি আৰু মানুহ ৰাজনীতিৰ উদ্ধত।সেই কথা বুজি পাব লাগিব। নুবুজিলে সময় আৰু ইতিহাসে ৰেহাই নিদিব-শিল্পী জুবিনে উল্লেখ কৰিছে এইদৰে।
অসম আৰু অসমীয়া বাবে যত যেনেকৈ প্ৰয়োজন হৈছে মাত মাতিছোঁ।কা’ আন্দোলনৰ সময়ত অসমীয়া মানুহৰ হৈ মুখ্যমন্ত্ৰীক গালি পাৰিছোঁ, মুকলি চিঠি লিখিছোঁ।এতিয়া বিশেষ কামত মূখ্যমন্ত্ৰীক সাক্ষাৎ কৰিছোঁ।কোন মুখ্যমন্ত্ৰী সেইটো ডাঙৰ কথা নহয়, কিন্তু অসমৰ কামত আহিব পৰা কাম এটা মুখ্যমন্ত্ৰীজনক লগ ধৰি আমাৰ কথাবোৰ কব লাগিব।
অসম আৰু অসমীয়াৰ স্বাৰ্থত প্ৰয়োজন হলে আন্দোলন কৰিছোঁ আৰু প্ৰয়োজনত দিছপুৰৰো ওচৰ চাপিম।কা’ তেতিয়াও মনা নাই আৰু এতিয়াও নামানো।অৰ্থনৈতিক আন্দোলনত সকলো একলগ লাগে।অসমীয়াক ক্ষতি কৰা কা’ কেতিয়াও মানি নলও, কা বাতিল হবই লাগিব- শিল্পী গৰাকীয়ে এইদৰে উল্লেখ কৰিছে।
বানপানী আৰু বিদেশীৰ বিষয়ত ৰাজনীতি কৰিব নাপায়।অসম- অসমীয়া ক্ষতি হয়।অসম আৰু অসমীয়াক ক্ষতি কৰি কৰা ৰাজনীতি অৰ্থহীন, মূল্যহীন, ভৱিষ্যতশূন্য বুলি উল্লেখ কৰি জুবিনে উল্লেখ কৰিছে এইদৰে- মুখ্যমন্ত্ৰী ঘৰত মই ভাত খাব যোৱা নাই।নিজৰ কামটো যোৱা নাই। অসমৰ কামত আহিব পৰা প্ৰকল্প এটা কাম হাতত লৈ গৈছিলোঁ”।
গুৰুত্বপূৰ্ণ কথা এই যে মূখ্যমন্ত্ৰীক সাক্ষাৎ কৰাৰ পাছতে জুবিনক লৈ সামাজিক মাধ্যমত আৰম্ভ হৈছিল সমালোচনা।
