জিতেন বৰকটকী:
নগাঁও : উত্তৰ-পূৰ্বাঞ্চলৰ বৃহৎ অৰাজনৈতিক-ধৰ্মীয়-শৈক্ষিক-সামাজিক অনুষ্ঠান শ্ৰীমন্ত শঙ্কৰদেৱ সঙ্ঘৰ প্ৰতীক কোনো লোকে অকাৰণত ব্যৱহাৰ কৰা সম্পৰ্কত শ্ৰীমন্ত শঙ্কৰদেৱ সঙ্ঘৰ শীৰ্ষ নেতৃত্বই প্ৰতিক্ৰিয়া প্ৰকাশ কৰে ৷
সঙ্ঘৰ পদাধিকাৰ কমলাকান্ত গগৈ আৰু প্ৰধান সম্পাদক বাবুল বৰাই স্বাক্ষৰ কৰা এখন পত্ৰযোগে জানিবলৈ দিয়া মতে, সামাজিক মাধ্যমত বহুলোকে শ্ৰীমন্ত শঙ্কৰদেৱ সঙ্ঘৰ পতাকা আৰু প্ৰতীক অকৰ্তৃত্বশীল ভাৱে ব্যৱহাৰ কৰিছে ৷ সঙ্ঘৰ যি পতাকা আৰু প্ৰতীক সেয়া কেৱল সঙ্ঘই সাংবিধানিক ভাৱে গঠন কৰা প্ৰাথমিকৰ পৰা আৰম্ভ কৰি মূলৰ লগতে সঙ্ঘৰ আন-আন উপসমিতি সমূহেহে ব্যৱহাৰ কৰিব পাৰে ৷
দুৰ্ভাগ্যজনক ভাৱে বহুতেই কৰা এনে কাৰ্যক গৰিহণা দিয়াৰ লগতে আগলৈ এনে দুষ্কাৰ্য নকৰিবলৈ সকিয়নী প্ৰদান কৰে । লগতে অনতিপলমে ফেচবুক বা ৱাটচআপৰ গ্ৰুপৰ পৰা সঙ্ঘৰ কেন্দ্ৰীয় নেতৃত্বৰ অনুমতি অবিহনে অকৰ্তৃত্বশীল ব্যৱহাৰ কৰা পতাকা আৰু প্ৰতীক পোন্ধৰ দিনৰ ভিতৰত আতৰ নকৰিলে বা অনুমতি নল’লে আইনী ব্যৱস্থা ল’বলৈও সঙ্ঘ পৰিয়াল সাজু বুলি পদাধিকাৰ আৰু প্ৰধান সম্পাদকে সদৰি কৰে ৷
আনহাতে, এটা সংবাদ গোষ্ঠীয়ে নিজৰ ফেচবুক পেজত প্ৰকাশ কৰা এক বিতৰ্কিত বাৰ্তাক কেন্দ্ৰ কৰিও শ্ৰীমন্ত শঙ্কৰদেৱ সঙ্ঘই প্ৰতিক্ৰিয়া প্ৰকাশ কৰে ৷ সঙ্ঘৰ নেতৃত্বই জনোৱা মতে, পেজটোত শ্ৰীমন্ত শঙ্কৰদেৱ সঙ্ঘৰ পদাধিকাৰ আসনখনত এগৰাকী বিশেষ ব্যক্তিক অধিষ্ঠিত কৰাৰ বাবে সদৌ অসম সংখ্যালঘু যুৱ ছাত্ৰ পৰিষদ নামৰ এটা সংগঠনে দাবী তুলিছে ৷
মহাপুৰুষ শঙ্কৰদেৱ গুৰুজনাৰ নামত প্ৰতিষ্ঠিত এটা পৱিত্ৰ ধৰ্মীয় আৰু আধ্যাত্মিক অনুষ্ঠানৰ সৰ্বোচ্চ সন্মানীয় আসনখনকলৈ কৰা বিতৰ্কিত প’ষ্টটোৰ সৈতে যিটো সংগঠনৰ নাম জড়িত কৰা হৈছে তেওঁলোকৰ নেতৃত্বক ইয়াৰ সত্যতা সম্পৰ্কে স্থিতি স্পষ্ট কৰিবলৈও সঙ্ঘই আহ্বান জনায় ।
লগতে যিটো ডিজিটেল সংবাদ গোষ্ঠীয়ে এই বাৰ্তা প্ৰচাৰ কৰিছে তেওঁলোককো শীঘ্ৰেই বাতৰিৰ সত্যতাৰ তথ্য ৰাজহুৱা কৰিবলৈ শ্ৰীমন্ত শঙ্কৰদেৱ সঙ্ঘৰ কেন্দ্ৰীয় নেতৃত্বই প্ৰত্যাহ্বান জনায়৷ আনহাতে এই বিতৰ্কিত প’ষ্টটোৰ সন্দৰ্ভত ইতিমধ্যেই শ্ৰীমন্ত শঙ্কৰদেৱ সঙ্ঘ আইনী প্ৰক্ৰিয়াৰ দিশে আগবাঢ়িছে বুলিও শ্ৰীমন্ত শঙ্কৰদেৱ সঙ্ঘৰ প্ৰধান সম্পাদক গৰাকীয়ে জানিবলৈ দিয়ে৷
