ডিফু: এটা সুচল পথৰ বাবে বছৰৰ পিছত বছৰ ধৰি চৰকাৰৰ মুখলৈ চায়ো কোনো সুফল নাপাই অৱশেষত প্ৰতিবাদী কাৰ্যসূচী গ্ৰহণ কৰিবলৈ বাধ্য হ’ল বোকাজান মহকুমাৰ ছখনকৈ গাঁৱৰ ৰাইজে। স্থানীয় লোকসকলে দাবী কৰা অনুসৰি বোকাজান মহকুমাৰ সৰুপথাৰ পৰিষদীয় সমষ্টিৰ অন্তৰ্গত দুহেজাৰৰো অধিক জনবসতিপূৰ্ণ চেছং বে’, লাইচান গাঁও, মহৰি টকবি গাঁও, চিকাৰী বে’ গাঁও, চিনি টেৰণ গাঁও আৰু হেমছিং হাঞ্চে আদি গাঁওসমূহ স্থাপন হোৱা শতবৰ্ষ অতিক্ৰম কৰিছে যদিও এলেকাটোৰ উন্নয়নৰ বাবে চৰকাৰে আজি পৰ্যন্ত কোনো গুৰুত্ব প্ৰদান কৰা নাই।
৩৯ নং ৰাষ্ট্ৰীয় ঘাইপথৰ সৈতে সংযোজিত হৈ থকা উক্ত গাঁওসমূহলৈ আহ-যাহ কৰা পথছোৱা নিৰ্মাণৰ বাবে স্থানীয় গাঁওবাসীয়ে বহু আবেদন নিবেদন কৰি অহাৰ পিছতো আজি পৰ্যন্ত এইসকল লোকৰ এনে আবেদনক কোনো গুৰুত্ব প্ৰদান কৰা নহ’ল। এলেকাটোৰ পথছোৱাৰ মাজত থকা লাইচান নামৰ জানটোৰ ওপৰত কোনো দলং আদি নিৰ্মাণৰ ব্যৱস্থা নোহোৱাৰ ফলত ৰাইজে বিপদসংকুলভাৱে উক্ত পথেৰে যাতায়ত কৰিবলগীয়া হৈ আহিছে।
উক্ত পথছোৱাৰ চৰম দুৰৱস্থাৰ পিছতো চৰকাৰে ইয়াক যাতায়তৰ সুচল কৰি তোলাৰ কোনো ব্যৱস্থা গ্ৰহণ নকৰাৰ প্ৰতিবাদত গাঁও কেইখনৰ লোকসকলে আজি ওলাই আহি এক অভিনৱ প্ৰতিবাদ সাব্যস্ত কৰে। গাঁৱৰ যুৱকসকলে আজি পথছোৱাৰ ওপৰত থিয় দি অৰ্ধ উলংগ প্ৰতিবাদ সাব্যস্ত কৰাৰ লগতে অনতিপলমে পথছোৱা নিৰ্মাণ অথবা মেৰামতিৰ ব্যৱস্থা হাতত নল’লে অনাগত দিনত নিৰ্বাচন বৰ্জনৰ দৰে সিদ্ধান্ত লোৱাৰো হুংকাৰ প্ৰদান কৰে।
প্ৰতিবাদকাৰীসকলে লগতে “ন ৰোড ন ভোট” শ্লোগানেৰে পৰিবেশ উত্তাল কৰি তোলে। আনহাতে স্থানীয় লোকসকলৰ এনে প্ৰতিবাদী কাৰ্যসূচীৰ পিছতো চৰকাৰে ৰাইজৰ দাবীৰ প্ৰতি কোনো গুৰুত্ব প্ৰদান নকৰিলে অনাগত দিনত সম্পূৰ্ণ উলংগ প্ৰতিবাদ কৰাৰো হুংকাৰ দিয়ে প্ৰতিবাদী ৰাইজে।
