নিউজ ডেক্স:
অহা ৫ আগষ্টত অযোধ্যাৰ ৰাম মন্দিৰৰ ভূমি পূজাৰ অনুষ্ঠানত অংশগ্ৰহণ কৰিব প্রধানমন্ত্রী নৰেন্দ্র মোডীয়ে। বুধবাৰ পুৱা ৯:৩০ বজাত দিল্লীৰ পৰা বিমান যোগে লক্ষ্ণৌলৈ ৰাওনা হ’ব প্রধানমন্ত্রী।
লক্ষ্ণৌ বিমানবন্দৰত দিনৰ ১০:৪০ বজাত অৱতৰণ কৰিব প্রধানমন্ত্রীৰ বিমান। ইয়াৰ পিছত তেওঁ তাৰ পৰা অযোধ্যালৈ হেলিকপ্টাৰেৰে যাব৷ দিনৰ ১১:৩০ বজাত অযোধ্যাৰ ছাকেত কলনিত অৱতৰণ কৰিব তেওঁৰ হেলিকপ্টাৰ।
প্রধানমন্ত্রীৰ হেলিকপ্টাৰ অৱতৰণৰ বাবে বিশেষকৈ নিৰ্মাণ কৰা হৈছে এই হেলিপেড। ইয়াৰ পৰা মন্দিৰলৈকে প্রায় ৩ কিলোমিটাৰ পথ৷ হেলিপেডৰ পৰা মন্দিৰ পর্যন্ত পথ বহল কৰা হৈছে। পথৰ দুই কাষে দেৱাল নিৰ্মাণ কৰা হৈছে৷
তদুপৰি ৰামায়ণৰ বিভিন্ন কাহিনীৰ ৰঙীন চিত্ৰ অংকণ কৰা হৈছে৷ এই চিত্ৰ অংকণ কৰিছে স্থানীয় আৰ্ট কলেজৰ বিদ্যাৰ্থীসকলে৷ স্থল পথেৰে দিনৰ ১২ বজাত নাগাদ ৰাম জন্মভূমি উপস্থিত হ’ব প্ৰধান মন্ত্ৰী নৰেন্দ্ৰ মোডী৷
