নিউজ ডেস্ক:
কোভিড আক্ৰান্ত হৈ আজি দেশৰ প্ৰসিদ্ধ কবি তথা গীতিকাৰ ৰাহত ইন্দোৰীয়ে শেষ নিশ্বাস ত্যাগ কৰে। তেওঁ কোভিড পজিটিভ আছিল আৰু মধ্যপ্ৰদেশৰ অৰবিন্দ হস্পিটেলত ভৰ্তি কৰোৱা হৈছিল।
অৰবিন্দ হস্পিটেলৰ সূত্ৰত জনোৱা মতে, সোমবাৰে নিশা তেওঁক হস্পিটেলত ভৰ্তি কৰোৱা হৈছিল।
তেওঁৰ অৱস্থা সংকটজনক হোৱাত এখন ব্যক্তিগত হস্পিটেলৰ পৰা তালৈ অনা হৈছিল। আজি বিয়লি ৪.১৫-৪.৩০ৰ ভিতৰত তেওঁৰ মৃত্যু হয় বুলিও লগতে প্ৰকাশ কৰে।উল্লেখযোগ্য যে মধ্যপ্ৰদেশৰ মুখ্যমন্ত্ৰী শিৱৰাজ সিং চৌহানে তেওঁৰ আশু আৰোগ্য কামনা কৰি টুইট কৰিছিল।
৭০ বছৰীয়া উৰ্দু কবিগৰাকীৰ জন্ম হৈছিল ১৯৫০ চনৰ ১ জানুৱাৰীত ইন্দোৰত। তেওঁ ভুজ বিশ্ববিদ্যালয়ৰ পৰা উৰ্দু সাহিত্যত ডক্টৰেট ডিগ্ৰী লাভ কৰিছিল।
উৰ্দু সাহিত্যৰ এগৰাকী প্ৰথিতযশা কবিৰ লগতে বলিউডৰ কেইবাটাও জনপ্ৰিয় গীত লিখি গৈছে। মুন্না ভাই এমবিবিএছ, মাৰ্ডাৰ আদিৰ দৰে ছবিৰ গীত তেওঁ লিখি গৈছে।
