হাওৰাঘাটত সাংবাদিক আক্ৰমণৰ ঘটনাত বিভিন্নজনৰ গৰিহনা, ২৪ ঘন্টাতো গ্ৰেপ্তাৰ নহ’ল অপৰাধী

ASSAM TIMES POST

ডিফুঃ কালি কাৰ্বি আংলং জিলাৰ হাওৰাঘাট থানাৰ অন্তৰ্গত ৰংকুট কামিনী সৰকাৰ বালিকা উচ্চ মাধ্যমিক বিদ্যালয়ত চলি থকা সংস্কৃত বৰ্ডৰ প্ৰৱেশিকা পৰীক্ষাত চলি থকা দুৰ্ণীতি-অনিয়মৰ বাতৰি সংগ্ৰহ কৰিবলৈ যোৱা অসমীয়া প্ৰতিদিনৰ বিশেষ সংবাদদাতা প্ৰশান্ত বৰা, ইউ বি ফটো সাংবাদিক শঙ্কু দাস আৰু ডি ৱাই 365 ৰ কেমেৰামেন আদিত্য ভুঞাৰ ওপৰত বিদ্যালয়ৰ প্ৰধান শিক্ষক কিৰেন্দ্ৰ সৰকাৰৰ গুন্দা বাহিনীয়ে কৰা আক্ৰমণক কেন্দ্ৰ এতিয়া জাঙুৰ খাই উঠিছে বিভিন্ন দল-সংগঠন ৷

সদৌ অসম ছাত্ৰ সন্থাৰ কেন্দ্ৰীয় কাৰ্যনিৰ্বাহক ভৱেশ গগৈয়ে কঠোৰ ভাষাৰে এই কাণ্ডৰ গৰিহনা দি প্ৰধান শিক্ষক কামিনী সৰকাৰৰ সংস্কৃত বৰ্ডত চলি থকা দুৰ্ণীতিৰ কথা পুনৰ কয় ৷ তেওঁ এইক্ষেত্ৰত অসম চৰকাৰৰ হস্তক্ষেপ দাবী কৰি পৰীক্ষা কেন্দ্ৰ বাতিলৰো দাবী তুলে ৷

ইপিনে, এই কাণ্ডত হাওৰাঘাট মহকুমা প্ৰেছ ক্লাৱ, বকলীয়াঘাট প্ৰেছ ক্লাৱকে আদি কৰি বিভিন্ন দল-সংগঠনে গৰিহনা দি দোষীক অতিশীঘ্ৰে আটক কৰি উচিত শাস্তি প্ৰদান কৰিবলৈ প্ৰশাসনৰ ওচৰত দাবী জনায় ৷

ইতিমধ্যে হাওৰাঘাট থানাত ভাৰতীয় দণ্ডবিধিৰ 147/150/ 341/325 ধাৰাত 57/19 নম্বৰত এক গোচৰ ৰুজু কৰা হৈছে কিন্তু ঘটনাৰ ২৪ ঘন্টা পাৰ হৈ যোৱাৰ পিছতো আৰক্ষীয়ে এজনো দোষীক কৰায়ত্ত কৰিব নোৱাৰাটো দুৰ্ভাগ্যজনক ৷