নিউজ ডেক্স:
দেশৰ আন ৰাজ্যবোৰৰ লগতে অসমত এতিয়াও অব্যাহত আছে ক’ৰোনাৰ ভয়াৱহ সংক্ৰমণ। ক’ৰোনাৰ ভয়াৱহতাৰ প্ৰতি লক্ষ্য ৰাখি যোৱা ছমাহ ধৰি বন্ধ হৈ আছে ৰাজ্যৰ শিক্ষানুষ্ঠানবোৰ। ফলত ছাত্ৰ-ছাত্ৰীসকলৰ শিক্ষা গ্ৰহণত ব্যাপক সমস্যাৰ সৃষ্টি হৈছে৷
ক’ৰোনা সংক্ৰমণ চলি থকাৰ মাজতে দেশৰ আন ৰাজ্যৰ লগতে অসমতো শিক্ষানুষ্ঠানবোৰ পুনৰ খোলিবলৈ চিন্তা-চৰ্চা অব্যাহত আছে৷ ইতিমধ্যে শিক্ষকসকলক ক’ৰোনা পৰীক্ষা কৰা হৈছে৷ লকডাউনৰ সময়তে শিক্ষানুষ্ঠানবোৰ বন্ধ হৈ পৰাৰ লগে লগে অনলাইনৰ জৰিয়তে শিক্ষকে পাঠদান আৰম্ভ কৰা হয়৷ কিন্তু এই ব্যৱস্থাত উপকৃত হ’ব পৰা নাই অধিকাংশ ছাত্ৰ-ছাত্ৰী।
ইপিনে ৰাজ্যত শনিবাৰৰ পৰা আৰম্ভ হ’ল আনল’ক ৪। কিছুদিন পিছতে ৰাজ্যৰ বন্ধ হৈ থকা শিক্ষানুষ্ঠানসমূহ খোলা হ’ব বুলি স্পষ্ট ইংগিত দিছে ৰাজ্য চৰকাৰে। বিগত ছমাহে পাঠদান বন্ধ থকাৰ বাবে যথেষ্ট লোকচানৰ সন্মুখীন হ’বলগীয়া হৈছে শিক্ষাৰ্থীসকল। সেই লোকচানৰ পৰা শিক্ষাৰ্থীক উদ্ধাৰ কৰিবৰ বাবে চেষ্টা কৰিছে শিক্ষা বিভাগে।
ফলত বিদ্যালয় খোলাৰ লাগে লাগে শনিবাৰ আৰু দেওবাৰেও পাঠদান কৰিব লাগিব শিক্ষকসকলে। শনিবাৰে ৫৯ সংখ্যক শিক্ষক দিৱসৰ দিনা এই ঘোষণা কৰিছে শিক্ষামন্ত্ৰী ড° হিমন্ত বিশ্ব শৰ্মাই। এই সন্দৰ্ভত মন্ত্ৰীজনে কয় যে লকডাউনত ছাত্ৰ-ছাত্ৰীৰ ক্ষতি হোৱা সময়বোৰ ঘূৰাই দিবৰ বাবে শিক্ষক-শিক্ষয়িত্ৰীসকলে শনিবাৰ আৰু দেওবাৰে অবিৰামভাবে আহিব লাগিব বিদ্যালয় অথবা মহাবিদ্যালয়লৈ।
হয়তো বছৰটোৰ পাঠ্যক্ৰম শেষ নোহোৱা পৰ্যন্ত প্ৰতিটো শনিবাৰ আৰু দেওবাৰেও বিদ্যালয়লৈ আহিবলগীয়া হ’ব পাৰে শিক্ষকসকল। যোৱা সাতটা মাহে চিকিৎসকে জনসাধাৰণক পি পি ই কিট পিন্ধি সেৱা আগবঢ়াই অহাৰ নিচিনাকৈ বিদ্যালয় খোলাৰ পিছত তেনেদৰে সেৱা আগবঢ়াব লাগিব শিক্ষকসকলে।
