ষ্টাফ ৰিপ’ৰ্টাৰ:
ডিফু : ডাইনীৰ সন্দেহত একাংশ উন্মত্ত লােকে যােৱা ত্রিশ ছেপ্টেম্বৰত কার্বি আংলং জিলাৰ ডকমকা থানাৰ অন্তর্গত ৰহিমাপুৰত দুজন নিৰীহ লােকক কোবাই কোবাই নৃশংসভাবে হত্যা কৰাৰ ঘটনাই ৰাজ্যজুৰি চাঞ্চল্যৰ সৃষ্টি কৰাৰ সময়তে কালিৰে পৰা এলেকাটোত সহযােগ অসম’ শীর্ষক বে-চৰকাৰী সংস্থাটোৰ উদ্যোগত ডাইনী সম্পর্কীয় অন্ধবিশ্বাসৰ বিৰুদ্ধে এলানি সজাগতা অনুষ্ঠান অনুষ্ঠিত কৰা হয়।
স্থানীয় কেইবাগৰাকী বিশিষ্ট লােকৰ সহযােগত সংস্থাটোৱে এনে সজাগতা অনুষ্ঠান অনুষ্ঠিত কৰাৰ লগতে কালি বিয়লি ডকমকা থানাৰ স্থায়ী সভাপতি নির্মল বৰাৰ সভাপতিত্বত এখনি ৰাজহুৱা সভাও অনুষ্ঠিত কৰে।
উক্ত সভাত সহযােগ অসমৰ অধ্যক্ষা পূৰবী বৰুৱা আৰু কার্যকৰী সদস্যা ইনু শর্মাই ভাষণ প্রদান কৰি গাঁওবাসীক এখন অন্ধবিশ্বাসমুক্ত সমাজ গঢ়াৰ আহ্বান জনায়। অন্ধ বিশ্বাসৰ বিভিন্ন কাৰক সম্পর্কে ব্যাখ্যা আগবঢোৱাৰ লগতে বৈজ্ঞানিক মানসিকতাৰে নিজকে গঢ় দিয়াৰ বাবে সকলােকে আহ্বান জনায়।
লগতে সংস্থাটোৰ তৰফৰ পৰা যােবা বছৰৰ পৰা কার্যকৰী হােৱা ডাইনী হত্যা ৰােধকৰণ আইন সম্পর্কেও বিস্তৃত ব্যাখ্যা আগবঢ়ায়। আজি সংস্থাটোৰ উদ্যোগত ডকমকাৰ পাণজুৰি গাঁৱতাে অনুৰূপ এক কার্যসূচী ৰূপায়ণ কৰা হয়।
