ASSAM TIMES POST
নগাঁওঃ গাঁৱৰ এখন তেনেই সাধাৰণ ঘৰ। ঘৰখনত দাৰিদ্ৰতাৰ চাপ। এই ঘৰখনৰ চোতালত এখন প্লাষ্টিকৰ চকীত নিৰ্বিকাৰ ভাৱে বহি আছে নব্বৈৰ উৰ্দ্ধৰ এজন বৃদ্ধলোক।বৃদ্ধলোকজনৰ দুয়ো ভৰিত এডাল শিকলিৰে বান্ধি থোৱা অৱস্থাত আছে। মাজে মাজে ইফালে সিফালে চাই থকা বৃদ্ধজনৰ কাৰো প্ৰতি কোনো ভ্ৰূক্ষেপ নাই। কিন্তু এই বৃদ্ধলোকজনৰ এটা বিশেষ পৰিচয় আছে। ১৯৪২ চনৰ স্বাধীনতা আন্দোলনত দেশক পৰাধীনতাৰ শিকলিৰ পৰা মুক্ত কৰিবলৈ গৈ শ্বহীদ হোৱা গুণাভিৰাম বৰদলৈৰ জ্যেষ্ঠ পুত্ৰ হৈছে দুভৰিত শিকলিৰে বান্ধি থোৱা এইজন ডিম্বেশ্বৰ বৰদলৈ ।
শ্বহীদ গৰাকীৰ জ্যেষ্ঠ পুত্ৰ ডিম্বেশ্বৰ বৰদলৈ স্মৃতি বিভ্ৰাট (আলজেইমাৰ) ৰোগত আক্ৰান্ত। সেয়ে তেওঁৰ অসহায় পুত্ৰ অৰ্থাৎ শ্বহীদ গুণাভিৰাম বৰদলৈৰ নাতি গোলাপ বৰদলৈয়ে পৰিয়ালৰ লোকসকল কামত ব্যস্ত থকা সময়ত নিৰুপায় হৈ ছহিদ পুত্ৰ ডিম্বেশ্বৰ বৰদলৈক চকীত বহুৱাই এডাল দীঘল শিকলিৰে ভৰিত বান্ধি এনেদৰে তলা মাৰি থয় উল্লেখ্য, আলজেইমাৰ ৰোগত আক্ৰান্ত হোৱাৰ পিছৰে পৰা ডিম্বেশ্বৰ বৰদলৈ ঘৰৰ মানুহৰ অজ্ঞাতে কেতিয়াবা অকলে ঘৰৰ পৰা ওলাই যায়।
ঘৰত কাকো নজনোৱাকৈ বহু দূৰ পৰ্যন্ত গুচি যায় বৰদলৈ।ফলস্বৰূপে পৰিয়ালৰ লোকে অসহায় হৈ এনেদৰে শিকলিৰে ভৰিত বান্ধি থব লগা অৱস্থা হৈছে। তদুপৰি আৰ্থিক দুৰাবস্থাই কোঙা কৰা পৰিয়ালটো দীৰ্ঘদিন ধৰি চৰকাৰৰ ঘৰৰ পৰা অৱহেলিত হৈ আহিছে। শ্বহীদ পুত্ৰৰ এনে দুৰ্গতিৰ বিিষয়ে জানিব পাৰি শুক্ৰবাৰে বটদ্ৰৱা বিধান সভা সমষ্টিৰ বিধায়িকা আঙুৰলতা ডেকা,মৰিগাঁও জিলাৰ উপায়ুক্ত আৰু মৰিগাঁও জিলাৰ আৰক্ষী অধীক্ষক উপস্থিত হয়হি শ্বহীদ পৰিয়ালৰ গৃহত ।
উল্লেখ্য, বিধায়িকা গৰাকীৰ বাসগৃহৰ নাতিদূৰৰে কপাহেৰা শান্তিপুৰ মৰাপাট আদৰ্শ গাঁওস্থিত স্বাধীনতা সংগ্ৰামৰ শ্বহীদ গুনাভিৰাম বৰদলৈৰ জ্যেষ্ঠ পুত্ৰ থকা গৃহত উপস্থিত হোৱা বিধায়িকা আঙুৰলতা ডেকাই বিভিন্ন প্ৰতিশ্ৰুতি দিয়ে।জটিল মানসিক ৰোগত আক্ৰান্ত শ্বহীদ গুনাভিৰাম বৰদলৈৰ জ্যেষ্ঠ পুত্ৰ ডিম্বেশ্বৰ বৰদলৈৰ সু চিকিৎসাৰ ব্যৱস্থা কৰাৰ প্ৰতিশ্ৰুতি দিয়ে।
শিকলিৰে বন্দিত্বৰ জীৱন কটোৱা ডিম্বেশ্বৰ বৰদলৈক শৃংখল মুক্ত কৰাৰ বাবে আছুতীয়া কক্ষৰ ব্যৱস্থা কৰা,শ্বহীদ গুনাভিৰাম বৰদলৈৰ বাসগৃহলৈ যোৱা পথৰ উন্নীতকৰণ কৰা,শ্বহীদ গুনাভিৰাম বৰদলৈৰ এটা প্ৰতিমূৰ্তি নিৰ্মাণ কৰা,শ্বহীদ গৰাকীৰ নাতি তথা শিল্পী গোলাপ বৰদলৈৰ বাবে শিল্পী পেঞ্চনৰ ব্যৱস্থা কৰা আদি বহু প্ৰতিশ্ৰুতি প্ৰদান কৰে। শ্বহীদ গৰাকীৰ নাতিয়েক গোলাপ বৰদলৈয়ে বিধায়িকা আঙুৰলতা ডেকাই প্ৰদান কৰা প্ৰতিশ্ৰুতি কাৰ্যকৰী হব বুলি আশাবাদী যদিও সম্পূৰ্ণ ৰূপে আশ্বস্ত হব পৰা নাই।
কিয়নো পূৰ্বৰ বহু জনপ্ৰতিনিধিয়ে দিয়া প্ৰতিশ্ৰুতি কাৰ্যকৰী হোৱা নাছিল। উল্লেখ্য, ১৯৪২ চনত বৃটিছৰ গুলিত প্ৰাণ আহুতি দিছিল গুনাভিৰাম বৰদলৈয়ে।শ্বহীদ গুনাভিৰাম বৰদলৈয়ে মৃত্যুৰ সময়ত এৰি থৈ গৈছিল দুটাকৈ নাবালক পুত্ৰ ডিম্বেশ্বৰ বৰদলৈ আৰু থুলেশ্বৰ বৰদলৈ।পিতৃৰ মৃত্যুৰ পিছত দুৰ্ভগীয়া সন্তান দুটিয়ে আৰ্থিক দীনতাৰ মাজৰে জীৱন অতিবাহিত কৰিবলগীয়া হৈছিল।আনৰ ঘৰত কামো কৰিব লগীয়া হৈছিল।শ্বহীদগৰাকীৰ দ্বিতীয়জন পুত্ৰ থুলেশ্বৰ বৰদলৈৰ ইতিমধ্যে মৃত্যু হৈছে।
শ্বহীদগৰাকীৰ জ্যেষ্ঠ পুত্ৰ ডিম্বেশ্বৰ বৰদলৈ তেওঁৰ জ্যেষ্ঠ পুত্ৰ গোলাপ বৰদলৈৰ লগত থাকে।সম্প্ৰতি বয়সৰ জোখাৰে ৯০ বছৰ অতিক্ৰম কৰা ডিম্বেশ্বৰ বৰদলৈ আৰু তেওঁৰ পৰিয়ালে আৰ্থিক দুৰাবস্থাৰ মাজৰে জীৱন অতিবাহিত কৰিব লগীয়া হৈছে।ডিম্বেশ্বৰ বৰদলৈয়ে মূল ঘৰৰ পৰা কিছু আতৰলৈ উঠি আহি বটদ্ৰৱা বিধান সভা সমষ্টিৰ অন্তৰ্গত কপাহেৰা শান্তিপুৰ মৰাপাট আদৰ্শ গাঁৱত স্বাধীনতাৰ পৰবৰ্তী সময়ত তদানীন্তন চৰকাৰে প্ৰদান কৰা ভূমিত এখন সৰু পাম নিৰ্মাণ কৰি বসবাস কৰি আহিছে ।
এটা সৰু পুখুৰীত মৎস উৎপাদন কৰি সেই মাছ বিক্ৰী তেওঁলোকে অতি কষ্টৰে জীৱন নির্বাহ কৰি আহিছে । ডিম্বেশ্বৰ বৰদলৈৰ জ্যেষ্ঠ পুত্ৰ গোলাপ বৰদলৈয়ে আনকি আনৰ ঘৰৰ বিবাহকে ধৰি মাংগলিক অনুষ্ঠানত বেণ্ড বজাইও (বেণ্ড-পাৰ্টি) জীৱন নিৰ্বাহৰ বাবে অৰ্থ সংগ্ৰহ কৰিবলগীয়া হৈছে।
