ASSAM TIMES POST
নগাঁওঃ নগাঁও চহৰকে ধৰি ইয়াৰ পাৰ্শ্বৱতী কেতবোৰ স্থানত ড্ৰাগছ মাফিয়াই অবাধে নিচাযুক্ত ড্ৰাগছৰ ৰমৰমীয়া বেহা চলাই থকাত উদ্বিগ্ন হৈ পৰিছে নাগৰিকসকল। চহৰখনত নিষিদ্ধ ড্ৰাগছ সুলভ হৈ পৰাত ইয়াৰ কবলত পৰি যুৱ প্ৰজন্মৰ একাংশৰ জীৱনলৈ অমানিশা নামি আহিছে। ড্ৰাগছৰ কবলত পৰি ইতিমধ্যে চহৰখনৰ কেবাজনো যুৱকে অকালতে মৃত্যুক সাৱটি ল’বলগীয়া হৈছে ।
নগাঁও আৰক্ষীয়ে চহৰখনত ড্ৰাগছৰ বিৰুদ্ধে সময়ে সময়ে অভিযান চলাই ইতিপূর্বে কেইবাজনো কুখ্যাত ড্রাগছ মাফিয়া, ড্ৰাগছ সৰবৰাহকাৰী, ড্ৰাগছ বিক্ৰেতাক গ্ৰেপ্তাৰ কৰাৰ লগতে বুজন পৰিমাণৰ ড্ৰাগছ জব্দ কৰিছে যদিও ড্ৰাগছ ব্যৱসায়ক সম্পূর্ণৰূপে উৎখাত কৰাত সফল হোৱা নাই আৰক্ষী । দুদিন পূৰ্বে নগাঁও আৰক্ষীয়ে অভিযান চলাই চহৰখনৰ মৰিকলং বাছষ্টেণ্ডৰ সমীপৰ পৰা চাব্বিৰ আহমেদ, বিহাৰী কুমাৰ সাহা আৰু নিজাম হুছেইন নামৰ তিনি ড্ৰাগছ ব্যৱসায়ীক বুজন পৰিমাণৰ ব্ৰাউন চুগাৰ সহ গ্ৰেপ্তাৰ কৰে। ড্ৰাগছ মাফিয়াই নিষিদ্ধ ড্ৰাগছ সৰবৰাহত একাংশ মহিলাক ব্যৱহাৰ কৰাৰ লগতে সুযোগ বুজি আচুতীয়া ঘৰ,পৰিত্যক্ত কাৰ্যালয় আদিত ড্ৰাগছৰ আড্ডা গঢ়ি তুলিছে ।
আনকি বন্ধ হৈ থকা শিক্ষা প্ৰতিষ্ঠানত ড্ৰাগছ মাফিয়াই ড্ৰাগছৰ আড্ডা চলাই শিক্ষা প্ৰতিষ্ঠানৰ পৱিত্রতাত কালিমা সানিছে । নগাঁও চহৰৰ মধুপুৰ উচ্চ মাধ্যমিক বিদ্যালয় চৌহদত আজি পুৱা বুজন পৰিমাণৰ নিচাযুক্ত ঔষধৰ খালি বাকচ উদ্ধাৰ হোৱাক লৈ অঞ্চলটোত প্ৰতিক্ৰিয়াৰ সৃষ্টি হৈছে। স্থানীয় ৰাইজে অভিযোগ কৰা মতে ঈদৰ বাবে বিদ্যালয় বন্ধ থকাৰ সুযোগ লৈ দূষ্ট চক্রই যোৱানিশা বিদ্যালয়খনত নিচাযুক্ত ড্ৰাগছৰ ড্ৰাগছৰ আড্ডা চলায়।
আজি পুৱা বিদ্যালয় খোলাৰ পাচত নিচাযুক্ত ঔষধৰ খালি বাকচ সমূহ বিদ্যালয়খনৰ শিক্ষক আৰু স্থানীয় একাংশ লোকৰ চকুত পৰে। বিদ্যালয়ৰ চৌহদত এনেদৰে দুষ্ট চক্রই ড্ৰাগছৰ আড্ডা চলোৱা কাৰ্যক অঞ্চলটোৰ ৰাইজে উদ্বিগ্নতা প্ৰকাশ কৰাৰ লগতে অঞ্চলটোত ড্ৰাগছৰ বিৰুদ্ধে তীব্র অভিযান চলাবলৈ আৰক্ষী প্ৰশাসনক দাবী জনায়।
আনহাতে ৰফিকুল, বাবু আৰু আশ্ৰফ নামৰ তিনি ড্ৰাগছ মাফিয়াই উক্ত কাৰ্য সংঘটিত কৰা বুলি স্হানীয় ৰাইজে সন্দেহ প্ৰকাশ কৰিছে । স্থানীয় ৰাইজে জনোৱা মতে ইয়াৰ পূর্বে শিয়ালমাৰী আৰু মধুপুৰ অঞ্চলৰ ৰাইজে এই তিনি ড্ৰাগছ সৰবৰাহকাৰীক হাতে লোটে ধৰি আৰক্ষীক গতাই দিছিল। অৱশ্যে যোৱানিশাৰ ঘটনাৰ লগত কোন দুষ্কৃতিকাৰী জড়িত সেয়া আৰক্ষীৰ তদন্তত হে পোহৰলৈ আহিব।
