ভাড়ালৈ গৈ গাড়ীসহ নিখোজ ডিফুৰ যুৱ চালক

ষ্টাফ ৰিপ’ৰ্টাৰ

ডিফু : ডিফুৰ পৰা নগাঁও জিলালৈ গাড়ী ভাড়ালৈ গৈ ঘুৰি নাহিল ডিফুৰ যুৱ চালক ৷ প্ৰাপ্ত খবৰ অনুসৰি যোৱা ৩ জানুৱাৰীত ডিফু ট্ৰাক ষ্টেণ্ডৰ পৰা আফজল আলিৰ সৈতে ডিফু গাৰোৱান পট্টিৰ পৰা ঘৰৰ মাল-বস্তুলৈ হোজাই জিলাৰ যমুনামুখ যোৱাৰ ভাড়াত চুক্তিবদ্ধ হয় ৷ সেই মৰ্মে ডিফুৰ পৰা দুপৰীয়াৰ ভাগত চালক আফজল আলিয়ে নিজৰ AS02 CC 2604 TATA YUDHA খনত ভাড়াৰ বয়-বস্তু বোজাই কৰি যমুনামুখলৈ গৈ গাড়ীখালী কৰি আন এটা ভাড়া মাৰিবৰ বাবে নগাওঁলৈ যায় ৷ নিশা প্ৰায় ৮ মান বজাত চালক আফজল আলিয়ে ডিফুত থকা শেষ কথোপকথনত তেওঁৰ অহা কিছু পলম হ’ব বুলি জনায় ৷

ইয়াৰ পিছৰ পৰাই আফজল আলিৰ মোবাইল ছুইছঅফ হৈ যায় ৷ আজি ৫ দিন অতিবাহিত হোৱাৰ পিছতো চালক আফজলৰ লগতে গাড়ীখন সন্ধানহীন পৰিছে ৷ ইফালে আফজলৰ পৰিয়ালৰ লোকৰ মাজত আফজলক লৈ হাহাকাৰ পৰিস্থিৰ সৃষ্টি হৈছে ৷ এই সন্দৰ্ভত আফজলৰ পৰিয়ালৰ লোকে নগাঁও সদৰ থানাত এক এজাহাৰ দাখিল কৰিছে বুলি জানিব পৰা গৈছে ৷ এইলৈ কাৰবি আংলং মটৰ পৰিবহন চালক আৰু শ্ৰমিক সন্থাৰ সভাপতি আব্দুল নুৰ আৰু সাধাৰণ সম্পাদক কৃষ্ণ ভট্টৰায়ে সংশ্লিষ্ট তদন্তকাৰী আৰক্ষীক উচিত তদন্তৰ জৰিয়তে আফজলৰ সন্ধান উলিয়াবলৈ অনুৰোধ কৰিছে ৷
উল্লেখযোগ্য যে নিৰিহ চালকক পূৰ্বে বহুবাৰ এনেদৰে ভাড়ালৈ নি দুষ্কৃতিকাৰীয়ে হত্যা কৰি গাড়ীলৈ উধাও হোৱা বহু নজিৰ আছে৷