ছাইদুল ইছলাম
ডিফু : এক অচিন ৰোগত আক্রান্ত হৈ সম্প্রতি অতি গুৰুতৰভাৱে অসুস্থ হৈ যোৱা কেইবামাহ ধৰি নিজ ঘৰতে আবদ্ধ হৈ থাকিবলগীয়া হৈছে কাবি আংলং জিলাৰ ডকমকাৰ যুব সাংবাদিক লংকিৰাম টেৰণ (৪৬)।
উল্লেখযোগ্য যে, বিগত প্রায় কুৰি বছৰ কাল সাংবাদিকতা বৃত্তিৰ সৈতে সক্রিয়ভাৱে জড়িত হৈ থকা সুস্বাস্থ্যৱান যুৱ সাংবাদিকগৰাকী যোৱা আগষ্টৰ পৰা কেতবোৰ সৰু সুৰা ৰোগত আক্রান্ত হয়। ইয়াৰ পিছতে যোৱা ছেপ্টেম্বৰ মাহৰ শেষৰ পবা সাংবাদিকগৰাকীৰ দুয়োটা ভৰিৰ সংবেদনহীন হৈ পৰে। ইয়াৰ ফলত যুৱকগৰাকী থিয় হোৱাৰ লগতে খোজকাট়িবলৈও অসমর্থ হৈ পৰে। ইফালে, ৰোগত আক্রান্ত হোৱাৰ পিছৰে পৰা লংকিৰাম টেৰণে ডিফু অসামৰিক চিকিৎসালয়ৰ পৰা আদি কৰি গুৱাহাটীৰ প্রতিষ্ঠিত চিকিৎসা প্রতিষ্ঠানত স্বাস্থ্য পৰীক্ষা কৰি চিকিৎসা গ্রহণ কৰাৰ পিছতো স্বাস্থ্যৰ অৱস্থাৰ কোনো উন্নতি হোৱা পৰিলক্ষিত নহ’ল। ফলত যোৱা কেইবামাহ ধৰি নিজ ঘৰতে আৱদ্ধ হৈ থাকিবলগীয়া হৈছে সাংবাদিকগৰাকী।
ইফালে, ৰোগৰ চিকিৎসাৰ নামত ইতিমধ্যে বুজন অংকৰ ধন ভাঙিও সুফল লাভ কৰিবলৈ সক্ষম নোহোৱা সাংবাদিকগৰাকীয়ে চিকিৎসা ব্যয়ৰ জোৰা মাৰিবলৈ গৈ খেতিৰ মাটি, ভঁৰালৰ ধান, পোহনীয়া গৰু-ছাগলী সকলো বিক্রী কৰি সর্বস্বান্ত হোৱাৰ ফলত চিকিৎসাৰ খৰচৰ জোৰা মাৰিবলৈ গৈ বৃহৎ প্রত্যাহানৰ সন্মুখীন হ’বলগীয়া হৈছে। কেৱল ইমানেই নহয় এগৰাকী সাত বছবীয়া কন্যাৰ লগতে পত্নীসহ পৰিয়াল পোহপালৰ ক্ষেত্রতো সমস্যৰ সম্মুখীন হৈছে সাংবাদিকগৰাকী। সম্প্রতি ডকমকাৰ পূর্বৰ পিতৃৰ ঘৰৰ পিছফালে পৰিত্যক্ত ধাননি পথাৰত দুডাল বাঁহেৰে নির্মাণ কৰি দিয়া ৰেম্পৰ সহায়ত খোজকঢ়াৰ অনুশীলন কৰিবলৈ চেষ্টা অব্যাহত থকা সাংবাদিক টেৰণে সু-চিকিৎসাৰ অভাৱত ভীষণ হতাশাত ভুগিবলৈ আৰম্ভ কৰা দেখিবলৈ পোৱা গৈছে।
উল্লেখযোগ্য যে, জীবনৰ এক গুৰুত্বপূর্ণ সময় সংবাদসেৱাৰ জৰিয়তে জনতাৰ দুখ-দুর্দশাৰ কাহিনী লোকচক্ষুৰ সন্মুখলৈ কট়িয়াই অনা এগৰাকী সাংবাদিকে নিজৰ প্রয়োজনীয় চিকিৎসাধ ব্যয়ৰ বাবে এনেদৰে হাহাকাৰ কৰিবলগীয়া হোৱা পৰিস্থিতি বাৰুকৈয়ে গুৰুত্বপূর্ণ বিবেচিত হৈছে। উন্নত চিকিৎসাৰ বাবে বহিঃবাজ্যলৈ চিকিৎসাৰ বাবে যোৱাৰ নিতান্তই প্রয়োজন হোৱাৰ পিছতো একমাত্র অর্থনৈতিক দুৰবস্থাৰ বাবে থমকি ৰ’বলগীয়া হৈছে সাংবাদিকগৰাকী। সেয়েহে সাংবাদিকগৰাকীয়ে এনে এক দুর্যোগৰ মুহূর্তত যথাসম্ভব সহায়ৰ হাত আগবঢ়োৱাৰ বাবে চৰকাৰৰ লগতে সকলো ৰাইজকে আহব্বান জনাইছে। সাংবাদিকগৰাকীক কোনো ব্যক্তিয়ে এইক্ষেত্রত সহায়ৰ হাত আগবঢ়াব বিচাৰিলে ইউকো বেংকৰ ডকমকা শাখাৰ একাউন্ট নম্বৰ ১৪৫৬০১১০০৭৬১৬৩ (আই এফ এছ চি ক’ড-ইউ চি বি এ ০০০১৪৫৬) যোগে আর্থিক সাহায্য আগবঢ়াব পাৰিব। সাংবাদিক লংকিৰাম টেৰণৰ মোবাইল নম্বৰ ৬০০১৮৯৫৭৪৩।
