ASSAM TIMES POST
গুৱাহাটীঃ অহা ৩১ আগষ্টত উন্নীত ৰাষ্ট্ৰীয় নাগৰিকপঞ্জী প্ৰকাশ পাবলগীয়াৰ পৰিপ্ৰেক্ষিতত শুকুৰবাৰে ৰাজ্যৰ উপায়ুক্ত আৰু আৰক্ষী অধীক্ষকসকলৰ সৈতে বৈঠকত বহে মুখ্যমন্ত্ৰী সৰ্বানন্দ সোণোৱাল।
অসম প্ৰশাসনীয় পদাধিকাৰী মহাবিদ্যালয়ত অনুষ্ঠিত এই বৈঠকত মুখ্যমন্ত্ৰীজনে ৰাজ্যৰ সাম্প্ৰতিক আইন আৰু শৃংখলাজনিত পৰিস্থিতিৰ বুজ লয়। এনআৰচিক লৈ মানুহৰ মাজত হোৱা ভুল বুজাবুজি নাইকিয়া কৰিবলৈ তেওঁ উপায়ুক্ত, আৰক্ষী অধীক্ষকসকলক আহ্বান জনায়। এনআৰচি প্ৰকাশৰ পাছত উপায়ুক্ত আৰু আৰক্ষী অধীক্ষকসকলে যাতে বিধায়ক, জিলা পৰিষদৰ সদস্য, পঞ্চায়তৰ সদস্য তথা স্বেচ্ছাসেৱী সংগঠনসমূহৰ সহায়ত সুস্থ বাতাবৰণ অক্ষুণ্ণ ৰাখিব পাৰে, তাত মুখ্যমন্ত্ৰীয়ে গুৰুত্ব আৰোপ কৰে।
এই বৈঠকত ৰাজ্যৰ আৰক্ষী সঞ্চালকপ্ৰধান কুলধৰ শইকীয়া, মুখ্য সচিব আলোক কুমাৰ, মুখ্যমন্ত্ৰীৰ আইন আৰু সংবাদ উপদেষ্টাদ্বয় ক্ৰমে শান্তনু ভৰালী আৰু হৃষীকেশ গোস্বামী, গৃহ আৰু ৰাজনৈতিক বিভাগৰ উচ্চপদস্থ বিষয়া-বৰ্গ উপস্থিত থাকে।
