কলকাতা-ছাইৰাং এক্সপ্ৰেছখন (Digaru train accident) ৰে’লপথৰ পৰা আঁতৰি যোৱাৰ পিছতো চুঁচৰি বহু দূৰলৈ আগবাঢ়ি যায়। ৰে’লখনৰ এজন যাত্ৰীয়ে এনে এক অভিজ্ঞতাৰ কথা ব্যক্ত কৰে। ৰে’লৰ পেণ্ট্ৰি কাৰৰ মেনেজাৰৰো একে অভিজ্ঞতা আছিল। তেওঁ কয় যে দুৰ্ঘটনা সংঘটিত হোৱাৰ সময়ত তেওঁলোক শুই আছিল। প্ৰচণ্ড শব্দত তেওঁ আচৰিত হৈ পৰে। তেওঁ উপলব্ধি কৰে যে ৰে’লখন ৰে’ললাইনৰ পৰা ওলাই গৈছে। তাৰ বাবে তেওঁ আসনৰ পৰা চিটিকি পৰে। কিন্তু ৰে’লখন বেছি বেগেৰে গতি নকৰাৰ বাবে বৃহৎ দুৰ্ঘটনাৰ পৰা হাত সাৰিব পৰা গ’ল বুলি মেনেজাৰজনে কয়। উল্লেখ্য যে বুধবাৰে পুৱা ৬৫৪ বজাত অসমৰ ডিগাৰু ষ্টেচনৰ সমীপত কলকাতাৰ পৰা ছাইৰাং অভিমুখী এখন ৰে’ল দুৰ্ঘটনাত পতিত হয়। প্ৰথমে ইঞ্জিনটো ৰে’লপথৰ পৰা ওলাই যায়। ইয়াৰ পিছত এটা এটাকৈ পাঁচটা ডবা ৰে’লপথৰ পৰা ওলাই যায়। এই দুৰ্ঘটনাত আহত হয় কেইবাজনো লোক। যদিও কোনো ডাঙৰ দুৰ্ঘটনা সংঘটিত নহ’ল, তথাপিও যাত্ৰী আৰু ৰে’লৰ কৰ্মচাৰীৰ মুখত আতংক দেখা গৈছিল। অভিজ্ঞতাৰ কথা কওঁতে বাৰে বাৰে কঁপি উঠিছিল তেওঁলোকৰ কণ্ঠ।
পেণ্ট্ৰি কাৰৰ মেনেজাৰজনে সংবাদ সংস্থা এএনআইক জনোৱা মতে, “আমি সকলোৱে শুই আছিলোঁ। গুৱাহাটীলৈকে সকলো ঠিকেই আছিল। গুৱাহাটী ষ্টেচনত ৰে’লখন ৰখায়। তাৰ পিছত ৰে’লখনে আকৌ গতি কৰিবলৈ ধৰে। গতি ভাল আছিল। অৱশ্যে ডিগাৰু ষ্টেচন পাৰ হোৱাৰ পিছত গতি কমি গ’ল। ষ্টেচনটোৰ প্লেটফৰ্ম পাৰ হোৱাৰ পিছত মই এটা ডাঙৰ শব্দ শুনিলোঁ। গাড়ীখন কঁপি উঠিল। মই মোৰ আসনৰ পৰা চিটিকি পৰিলোঁ।”
মেনেজাৰজনে কয় যে শব্দ শুনি তেওঁ উপলব্ধি কৰে যে এক্সপ্ৰেছ ৰে’লখন ৰেলপথৰ পৰা ওলাই গৈছে। পিণ্টু সৰকাৰ নামৰ এজন পেণ্ট্ৰী কাৰ কৰ্মচাৰীয়ে কয় যে তেওঁলোকে পুৱাৰে পৰা কাম আৰম্ভ কৰাৰ প্ৰস্তুতি চলাইছিল। সেই সময়ত সংঘটিত হয় এই দুৰ্ঘটনা। ৰে’লপথৰ পৰা বাগৰি পৰাৰ বাবে তেওঁ গাড়ীৰ ভিতৰত বাগৰি পৰে। জোকাৰণি উঠে। দুৰ্ঘটনাটোৰ কেইঘণ্টামান পাৰ হ’লেও পিণ্টুৰ আতংক কমি যোৱা নাই। আন যাত্ৰীৰ অভিজ্ঞতাও প্ৰায় একেই। এজন যাত্ৰীয়ে কয় যে ৰে’লখন দুৰ্ঘটনাত পতিত হোৱাৰ কথা গম পাই ডবাটোৰ সকলোৱে নামিবলৈ চেষ্টা কৰে। কিন্তু ক্ষতিগ্ৰস্ত ডবাবোৰৰ মাজেৰে ওলাই অহাটো অতি কঠিন হৈ পৰিছিল। গাড়ী দুখনৰ মাজৰ ঠাইখিনি সংকীৰ্ণ হৈ পৰিছিল।
কি কাৰণত দুৰ্ঘটনাটো ঘটিল? প্ৰাথমিক তদন্তৰ অন্তত ৰে’লৱেই এক অধিসূচনা জাৰি কৰি কয় যে কলকাতা-ছাইৰাং এক্সপ্ৰেছক ‘লুপ’ লাইনলৈ প্ৰেৰণ কৰি আন এখন ৰে’লৰ বাবে বাট মুকলি কৰা হৈছিল। ‘লুপ’ লাইনলৈ যোৱাৰ সময়তে চালকজনে নিয়ন্ত্ৰণ হেৰুৱাই পেলায়। কিন্তু এটা ভিডিঅ’ মুকলি কৰা হৈছে। তাত দাবী কৰা হৈছে যে ভিডিঅ’টো ৰে’লপথৰ পৰা ওলাই যোৱাৰ পূৰ্বে চালকৰ কেবিনৰ পৰা লোৱা হৈছিল। ভিডিঅ’টোত চালকজনে কোৱা শুনা যায়, “ছিগনেল ৰেড। ইমাৰ্জেন্সী ছিষ্টেমে কাম কৰা নাই। একোৱেই কাম কৰা নাই।” ইয়াৰ কেইছেকেণ্ডমানৰ ভিতৰতে তীব্ৰ শব্দৰে ৰে’লখন ৰে’ললাইনৰ পৰা ওলাই যায়।
